މޭނޭ ޕިޔާރު ކިޔާގެ ބަގިޔާޝްރީ ކޮބާ؟

ސަލްމާން ޚާން ބޮޑު ސްޓާރަކަށް ބަދަލުކޮށްލި ފިލްމު "މޭނޭ ޕިޔާރު ކިޔާ" ގެ ބަތަލާ ބަގިޔާޝްރީގެ މަތިން ހަނދާންވޭ ހެއްޔެވެ؟ އެ ފިލްމުގައި އޭނާ ކުޅުނު މައުސޫމް ސުމަންގެ ކެރެކްޓާ އަކީ ބެލުންތެރިންގެ ހިތްތަކުން ޖާގަ ހޯދި ކެރެކްޓާއެކެވެ.

ސޫރަޖް ބަހަރްޖަތިއާގެ އަލަތު ޑައިރެކްޝަންގެ ގޮތުގައި 1989 ގައި ގެނެސްދިން "މޭނޭ ޕިޔާރު ކިޔާ" އިން ބޮޑު މަޝްހޫރުކަމެއް ލިބި، އެތައް ހުށަހެޅުމެއް ލިބުނަސް ބަގިޔާޝްރީ އަކީ ވަރަށް އަވަހަށް ފިލްމީ ދާއިރާ އިން ގެއްލުނު ތަރިއެކެވެ. މާ ގިނަ ފިލްމުތަކެއް ކުޅެފައެއް ނެތެވެ. އޭނާ ކައިވެނިކޮށް އެންމެ ޒުވާން އުމުރުގައި ބަދަލުވީ ގެވެހި އަންބަކަށެވެ.

ބަގިޔާޝްރީ އާއި ހިމާލަޔާ ދައްސާނީ ކައިވެނިކުރީ "މޭނޭ ޕިޔާރު ކިޔާ" ރިލީޒްކުރިތާ އަހަރެއް ފަހުންނެވެ. އެއީ 1990 ގަ އެވެ. އެ ކައިވެންޏަށް ލިބުނު ދެ ދަރިން ވެސް މިހާރު ބޮޑެތިވެއްޖެ އެވެ. ފިރިހެން ދަރިފުޅު އަބިމަންޔޫ ދައްސާނީ، 31، އަކީ ވެސް މިހާރު ބޮލީވުޑްގެ އެކްޓަރެކެވެ.

އޭނާގެ އަލަތު ފިލްމަކީ 2019 ގެ "މަރުދު ކޯ ދަރުދު ނެހީ ހޯތާ" އެވެ. އުންމީދީ އެކްޓަރުގެ ކުރިއަށް ހުރި ފިލްމުތަކުގެ ތެރޭގައި ޝިލްޕާ ޝެޓީގެ "ނިކައްމާ" އާއި ސާނިއާ މަލްއުތުރާއާ އެކު ކުޅެފައިވާ "މީނާކްޝީ ސުންދަރޭޝްވަރް" އާއި ޑައިރެކްޓަރު އުމޭޝް ޝުކްލާގެ "އާނކް މިޗޯލީ" ހިމެނެ އެވެ.

ބަގިޔާޝްރީގެ އަންހެން ދަރިފުޅު އަވަންތިކާ ދައްސާނީ، 26، އޭނާގެ ބައްޕަ ފަދައިން ފިލްމީ ދާއިރާގެ އެއްވެސް ކަމަކާ އުޅޭ މީހެއް ނޫނެވެ.

ބަގިޔާޝްރީގެ ކެރިއަރުގައި "މޭނޭ ޕިޔާރު ކިޔާ" ފިޔަވައި މާ ހާއްސަ އިތުރު ފިލްމެއް ނެތެވެ. އެކަމަކު ހިންދީ ފިލްމުތަކުގެ އިތުރުން އޭނާ ވަނީ މަރާޓީ އާއި ބޯޖްޕޫރީ އާއި ބެންގާލީ އާއި ކަންނާޑާ ބަހުން ހަދާފައިވާ ފިލްމުތަކެއްގައި ވެސް މަސައްކަތްކޮށްފަ އެވެ.

ބަގިޔާޝްރީގެ ދެ ފިލްމެއް މިހާރު ރިލީޒްވާން އެބައޮތެވެ. އެއީ ކުރިން މި މަހުގެ 23 ގައި ރިލީޒްކުރަން އޮއްވައި ކޮވިޑާ ހެދި ފަސްކޮށްފައިވާ ކަންގަނާ ރަނާވަތުގެ "ތަލައިވީ" އާއި ޕްރަބާސްގެ "ރާދޭ ޝާމް" އެވެ.

ކަންގަނާގެ ޖަޔަލަލީތާގެ ރޯލު ކުޅެފައިވާ "ތަލައިވީ" ގައި ބަގިޔާޝްރީ ކުޅެފައި ވަނީ ކަންގަނާގެ މަންމަ ސަންދިއާގެ ރޯލެވެ. ބަގިޔާޝްރީ އަނެއްކާ ވެސް ސަޕޯޓިން ރޯލެއް ކުޅެފައިވާ "ރާދޭ ޝާމް" އަކީ މި އަހަރުގެ ޖުލައި 30 ގައި ގެނެސްދޭން ތާވަލުކޮށްފައި އޮތް ފިލްމެކެވެ.

ބައެއް ޓީވީ ޝޯތަކުގައި ވެސް ބަގިޔާޝްރީ މަސައްކަތްކޮށްފައިވެ އެވެ. އޭގެ ތެރޭގައި "ސީއައިޑީ"، "ކަބީ ކަބީ" އަދި "ލޯޓް އާއޯ ޓްރިޝާ" ހިމެނެ އެވެ. ކަލާޒްގެ ޑާންސް ޝޯ "ޖަލަކް ދިކްލާޖާ" ގެ ސީޒަން ތިނެއްގައި 2009 ގައި ބަގިޔާޝްރީ ވާދަކޮށްފައިވެ އެވެ.