ޕާކިސްތާނުގެ ލަގްޒަރީ ހޮޓަލަށް ދިން ހަމަލާގެ އަމާޒަކީ ޗައިނާ ސަފީރު؟

ގުއެޓާ (އެޕްރީލް 22) - ޕާކިސްތާނުގެ ހުޅަނގު ދެކުނުގެ ގުއެޓާ ސިޓީގައި ޗައިނާގެ ސަފީރު ހުންނެވުމަށް ހަމަޖެހިފައިވާ ލަގްޒަރީ ހޮޓަލަކަށް އަމާޒުކޮށް ދިން ބޮމުގެ ހަމަލާގައި ހަތަރު މީހުން މަރުވެއްޖެ އެވެ.

ބޮމުގެ ހަމަލާ ދީފައި ވަނީ ސެރީނާ ހޮޓަލުގެ ކާރު ޕާކިންގަ އެވެ. މަރުވި މީހުންގެ ތެރޭގައި އެ ހޮޓަލުގެ ދެ ސެކިއުރިޓީ ގާޑު ހިމެނެ އެވެ. ހަމަލާ ދިން ނަމަވެސް ހޮޓަލުގައި ތިބި އެއްވެސް ގެސްޓަކަށް ގެއްލުމެއް ލިބިފައެއް ނުވެ އެވެ.

"ހަމަލާގައި ހަތަރު މީހުން މަރުވެ 12 މީހުން ޒަޚަމްވި،" ޕާކިސްތާނުގެ ދާޚިލީ ވަޒީރު ޝެއިޚް ރާޝިދު އަހުމަދު އޭއެފްޕީ އަށް ވިދާޅުވި އެވެ. "އެއީ ޓެރަރިޒަމްގެ ހަމަލާއެއް."

އޭނާ ވިދާޅުވީ އަފްޣާނިސްތާން ބޯޑަރާ ކައިރީގައި އޮންނަ ބަލޮޗިސްތާން ޕްރޮވިންސްގެ ވެރިރަށުގެ ސެރީނާ ހޮޓަލުގައި ޗައިނާގެ ސަފީރު ނޮންގް ރޮންގް ހިމެނޭ ގޮތަށް ހަތަރު މީހުންގެ ވަފުދެއް ރޭ މަޑުކުރަން އޮތީ ހަމަޖެހިފައި ކަމަށެވެ. ނަމަވެސް ހޮޓަލުގައި ހަމަލާ ދިން ވަގުތު ސަފީރުވީ ބައްދަލުވުމަކަށް ވަޑައިގެންފައި ކަމަށް މިނިސްޓަރު ވިދާޅުވި އެވެ.

ހަމަލާގެ ޒިންމާ އުފުލާ ކަމަށް ބުނެފައި ވަނީ ޕާކިސްތާނީ ތާލިބާނުންނެވެ.

ބަލޮޗިސްތާނަކީ ހަނގުރާމަވެރި ޖަމާއަތްތައް ވަރަށް ބޮޑަށް ހަރަކާތްތެރިވާ ޕްރޮވިންސެކެވެ. އެ ސަރަހައްދުގައި ޗައިނާ އިން ކުރިއަށްގެންދާ އިންފްރާސްޓްރަކްޗާ ޕްރޮޖެކްޓްތަކާ ހަނގުރާމަވެރި ޖަމާއަތްތަކުން ދެކޮޅެވެ.