މޭޔަރު ޝިފާ އާއި އިންތިހާބީ މޭޔަރު މުއިއްޒު ބައްދަލުކުރައްވައިފި

މާލޭ ސިޓީގެ މޭޔަރު ޝިފާ މުހައްމަދާއި މާލޭގެ މޭޔަރުކަމަށް އިންތިހާބުވެ ވަޑަައިގެންފައިވާ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު މިއަދު ބައްދަލުކުރައްވައިފި އެވެ.

މާލޭ ސިޓީ ކައުންސިލުން ކުރި ޓްވީޓެއްގައި ބުނީ މޭޔަރު ޝިފާގެ އިތުރުން ޑެޕިއުޓީ މޭޔަރު ޝަމާއު ޝަރީފް ވެސް ބައިވެރިވެވަޑައިގެންނެވި އެ ބައްދަލުކުރެއްވުމުގައި މަޝްވަރާ ކުރައްވާފައި ވަނީ އިންތިހާބީ މޭޔަރާ މަގާމު ހަވާލުކުރުމުގެ ކަންކަމާ ގުޅޭ ގޮތުން ކަމަށެވެ.

މި މަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިހާބުގައި އެމްޑީޕީގެ ކެންޑިޑޭޓު، އަނަސް އަބްދުއްސައްތާރާ ވާދަކުރައްވައި ޕީޕީއެމްގެ ކެންޑިޑޭޓް، ޑރ. މުއިއްޒު މޭޔަރު ކަމަށް އިންތިހާބުވެވަޑައިގަތީ ވޯޓުލީ މީހުންގެ 61 ޕަސެންޓް ވޯޓުންނެވެ.

އަލަށް އިންތިހާބުވި ކައުންސިލް މެމްބަރުން ހުވާކުރުން އޮންނާނީ ރޯދައިގެ ފަހުންނެވެ.

މިއީ މާލޭގެ މޭޔަރު ކަމަށް އެމްޑީޕީ ފިޔަވައި އެހެން ޕާޓީއެއްގެ ކެންޑިޑޭޓަކު އިންތިހާބުވި ފުރަތަމަ ފަހަރެވެ.

މުއިއްޒު މިފަހުން ވަނީ ކޮންސްޓްރަކްޝަން މަސައްކަތްތަކަށް މާލޭގެ މަަގުތައް ބަންދުކުރަން އާންމުންނަށް ފެންނަ އެންމެ ރަނގަޅު ވަގުތަކީ ކޮބާތޯ ބަލަން ވޯޓަކަށް ވެސް އަހައިފަ އެވެ. ގިނަ ބަޔަކު ވޯޓު ދިނީ ރޭގަނޑު އެންމެން ނިދުމުން އެ ހުއްދަ ދިނުމަށެވެ. އެހެންވެ، މުއިއްޒު ވަނީ އެގޮތަށް މަސައްކަތްތައް ބައްޓަން ކުރައްވާނެ ކަމަށް ވެސް ވިދާޅުވެފަ އެވެ.

އިންތިހާބު ކާމިޔާބު ކުރެއްވުމަށް ފަހު މުއިއްޒު ތަކުރާރުކޮށް ވިދާޅުވަނީ މާލޭގެ ރައްޔިތުން މާޔޫސްވިޔަ ނުދެއްވާނެ ކަމަށެވެ.