ޝަހީމްގެ ޝަކުވާ އަށް އިސްލާމިކް މިނިސްޓަރުގެ ރައްދެއް

އިސްލާމީ މަރުކަޒުގައި އިމާމުވެ ދަމު ނަމާދު ކުރަން ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ފުރުސަތު ލިބިވަޑައި ނުގެންނެވި ސަބަބު އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެ އެވެ.

ސޯޝަލް މީޑިއާގައި ޝަހީމް ވަނީ މި ރޯދަމަހު އިސްލާމީ މަރުކަޒުގައި އިމާމުވެ ދަމު ނަމާދުކުރަން ފުރުސަތު ލިބިވަޑައިނުގަންނަވާތީ ކަންބޮޑުވުން ފާޅުކުރައްވައިފަ އެވެ. އެކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ޝަހީމް ފާޑުވިދާޅުވި އެވެ.

ޝަހީމް ވިދާޅުވީ ހިޔާލު ތަފާތުވިޔަސް ކުރީގެ ރައީސް ނަޝީދުގެ ހަނދާން ވަނީ މިފަދަ ދުވަހެއްގައި ކަމަށާއި އެމަނިކުފާނުގެ ވެރިކަމުގައި އެންމެ ހިޔާލު ތަފާތުވިއިރު ވެސް އިސްލާމީ މަރުކަޒުގައި އިމާމުވެ ދަމު ނަމާދުކުރަން ފުރުސަތު ދެއްވި ކަމަށެވެ.

"މިފަހަރު އެކަން ވާ ގޮތެއް ނުވި،" ޝަހީމް ވިދާޅުވި އެވެ.

އެ ވާހަކައާ ގުޅިގެން އިސްލާމިކް މިނިސްޓަރު ޑރ. ޒާހިރު ވިދާޅުވީ އިމާމުވެ ދަމު ނަމާދުކުރެއްވުމުގެ ފުރުސަތު ހޯއްދެވުމަށް މި މަހު 27ގައި އެ މިނިސްޓްރީ އަށް ޝަހީމް ފޮނުއްވި ސިޓީގައި އެދިވަޑައިގެންފައި އޮތީ "ކޮންމެވެސް މިސްކިތެއް" ހަމަޖައްސައިދިނުމަށް ކަމަށެވެ.

އެކަމަކު މިނިސްޓްރީގެ މިސްކިތްތަކާ ގުޅޭ ބައިން ޝަހީމަށް ގުޅައި، ބޭނުންވާ ވަކި މިސްކިތެއް އޮތްތޯ ބެލި އިރު އިސްލާމީ މަރުކަޒު ކަމަށް ވިދާޅުވި ކަމަށާއި ނަމަވެސް އޭގެ މާ ކުރިން އޮތީ އެ ތަނަށް އިމާމަަކު ހަމަޖައްސާފައި ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ހުޅުމާލޭ ފިތުރޯނުމަގުގައި ހުންނަ ދިގަލި މިސްކިތުގައި ޝަހީމަށް އިމާމުވެ ދަމު ނަމާދުކުރެވޭނެ އިންތިޒާމު މިހާރު ހަމަޖައްސާފައިވާ ކަމަށެވެ.

ސޯޝަލް މީޑިއާގައި އެފަދަ ގޮތަކަށް ޝަހީމް ވާހަކަ ދެއްކެވުމުން ރައްޔިތުންނަށް ކަމުގެ ހަގީގަތް އޮޅި ހިތުގައި ނުތަނަވަސްކަން އުފެދޭނެ ކަމަށް ވިދާޅުވެ، މި ވާހަކަ ސިޔާސީ ކަންކަމާ ގުޅުވީތީ މިނިސްޓަރު ކަންބޮޑުވުން ފާޅުކުރެއްވި އެވެ.