ސްކޫލުތަކުން ތަފާތު މަންޒަރެއް

ކުދިންގެ މޫނުމަތިން ފެންނަނީ އުފާވެރިކަމެވެ. ރިޕޯޓް ފޮތް ހިފައިގެން ބެލެނިވެރިންނާ އެކު ނުކުމެގެން އައިއިރު، އެ ކުދިން ތިބީ ހެވިފަ އެވެ. އެއްފަހަރު ރިޕޯޓް ފޮތް ބަލާލައިގެން ހިތްހަމަނުޖެހުމުން އެތައް ފަހަރަކު ތަކުރާރުކޮށް، އެ ފޮތް ހުޅުވާލައިގެން ބަލަ އެވެ. ރަށްޓެހި ކުދިންނަށް ވެސް ދައްކަ އެވެ. ރަނގަޅު ނަތީޖާއެއް ލިބުމުން އެކަމުގެ އުފާ ލިބިގަތުމަށެވެ.

ކަލާފާނު ސްކޫލުގެ ގްރޭޑް އެކެއް މި އަހަރު ނިންމި ހަސަން އިކްޒާން އަށް ވެސް މިއަދަކީ އެފަދަ އުފާވެރި ދުވަހެކެވެ. ހުރިހާ އެސައިންމަންޓަކުން އެންމެ މަތިން މާކްސް ލިބިގެން އޭނާ ހުރީ އުފަލުންނެވެ. އޭނާގެ އަޒުމަކީ އަންނަ އަހަރު ވެސް އެ ނަތީޖާ ހޯދުމެވެ.

"މަންމަމެންގެ އެހީ ވަރަށް ބޮޑަށް ލިބުނު. ވަރަށް ހެޕީވޭ،" އިކްޒާން ބުންޏެވެ.

އެންމެ ކުޑަކުދިންގެ ގްރޭޑްތަކަށް ވުރެ ވާދަވެރި ބޮޑެތި ގްރޭޑްތަކުގެ ކުދިންނަށް މިއަދު ފެށިގެން އައީ ހާސްކަމެއްގެ ތެރެއިންނެވެ. ހާއްސަކޮށް، ގްރޭޑް ހަތެއް ނިންމުމަށް ފަހު ސެކަންޑްރީ އަށް ދާ ދަރިވަރުން މިއަދު ރިޕޯޓް ފޮތް ބަލާ ދިޔައީ ރަނގަޅު ނަތީޖާއެއް ލިބޭނެ ކަމާ މެދު ކުރެވޭ އުންމީދާ އެކު، ވާނެ ވަކި ގޮތެއް ނޭނގޭތީ ލިބޭ ނުތަނަވަސްކަމާ ވެސް އެކު އެވެ. ފާސް ނުވެއްޖެ ނަމަ ގްރޭޑް އަށަކަށް ނުދެވިދާނެތީ ވަރަށް ގިނަ ކުދިން ތިބީ ހާސްވެފަ އެވެ.

ނަމަވެސް، ރިޕޯޓް ފޮތް ލިބުމާ އެކު ގިނަ ކުދިންގެ މޫނުމަތިން ފެނުނީ އުފާވެރިކަމެވެ. ކުރިން ފެނުނު ހާސްކަން އެއްކޮށް ފިލައިގެން ގޮސް، ހިނިތުންވުން ފެނުނެވެ. އެންމެ ކުޑަކުދިންހެން އެ ކުދިން ވެސް އަވަސްވެގަތީ ކައިރީގައި ތިބި ރަށްޓެހި ކުދިންނަށް ރިޕޯޓް ފޮތް ދައްކައި އެކި މާއްދާތަކުން ލިބިފައިވާ މާކްސްތަކާއި ގްރޭޑްތައް އަޅާކިޔާށެވެ. އެއާ އެކު، ޓީޗަރުން ދީފައިވާ ކޮމެންޓްތަކުން ވެސް އުފާވެރިކަން ލިބިގަތެވެ.

"ބައެއް މާއްދާތަކުން އެހާ ރަނގަޅެއް ނޫން. އެކަމަކު، އެންމެ ބޮޑަށް ކިޔެވި އެއްޗިހިން އޯކޭ. ދެން އަންނަ އަހަރު އިތުރަށް މަސައްކަތްކުރަންޖެހޭނެ،" ޖަމާލުއްދީން ސްކޫލްގެ ގްރޭޑް ހަތެއް ނިންމައި ގްރޭޑް އަށަކަށް ޕްރޮމޯޓްވި އައިޝަތު މާޝާ ބުންޏެވެ.

ގިނަ ކުދިންނަށް އުފާވެރި ދުވަހަކަށްވީ ނަމަވެސް، ބައެއް ކުދިން ތިބީ ދެރަވެފަ އެވެ. އޭގެ ތެރެއިން ބައެއް ކުދިން ރޮވޭ ހިސާބުގައި ތިބިއިރު، އެކަން ބެލެނިވެރިންގެ ކިބައިން ވެސް ފެންނަން ހުއްޓެވެ. ބައެއް ބެލެނިވެރިން އެ މީހެއްގެ ކުއްޖަކަށް ހިތްވަރު ދެމުން ދިޔައިރު، ބައެއް ކުދިން ރިޕޯޓް ފޮތަށް ބަލައި ވެސް ނުލަ އެވެ. އެންމެ ބޭނުންވި ނަތީޖާ ނުލިބުމުން އިތުރަށް އެކަމުގެ ހިތާމަ ލިބެން ބޭނުން ނުވާތީ އެވެ.

"ފުދޭ ވަރަކަށް ކިޔެވިން. އެކަމަކު، ދިވެހި، އިސްލާމުން ފާހެއް ނުވި،" މަންމައާ އެކު ސްކޫލްގެ ގޯތި ތެރޭގައި ހުރި، ޖަމާލުއްދީން ސްކޫލްގެ ގްރޭޑް ހައެއް ނިންމި އަހުމަދު ނާޒިމް ވަރަށް ދެރަވެލާފައި ބުންޏެވެ.

ތައުލީމީ ގޮތުން ކޮންމެ ނަތީޖާއެއް ލިބުނު ނަމަވެސް، ހުރިހާ ކުދިންނަށް ވެސް މި ނިމުނު ދިރާސީ އަހަރަކީ ވަރަށް ބޮޑު ތަޖުރިބާއެކެވެ. ހާއްސަކޮށް، ގްރޭޑް އެކެއް މި އަހަރު އަލަށް ނިންމި ކުދިން މުޅި އަހަރު ހޭދަކުރީ އާ ކަންކަން ދަސްކުރުމުގަ އެވެ. ޕްރީ ސްކޫލްއާ މުޅިން ތަފާތު، ފިލާވަޅުތަކެވެ. އާ މާއްދާތަކެކެވެ. ކުރިއަށް ވުރެ ތަންކޮޅެއް "ސީރިއަސް" ކަންކަން ގިނަ އެވެ. ޓީޗަރުން ފިލާވަޅު ނަގައިދޭ ގޮތް ވެސް ތަފާތެވެ.

އެއާ އެކު، ބޮޑު ގްރޫޕަކާ އެކު ސްކޫލްގައި އުޅުމަކީ ވެސް ވަރަށް ތަފާތު ތަޖުރިބާއެކެވެ. ކިޔެވުމުގެ އިތުރަށް، ކުޅިވަރުތަކާއި ތަފާތު އިތުރު ހަރަކާތްތަކުގައި ގިނަ ކުދިންތަކަކާ އެކު ބައިވެރިވުމަކީ ވަރަށް ގިނަ ކުދިންނަށް ޝައުގުވެރިކަމެކެވެ. ބައެއް ފަހަރު ފުދޭ ވަރަކަށް ޗެލެންޖިން ކަމަކެެވެ. ނަމަވެސް، ހުރިހާ ގޮތަކުން ވެސް ތަފާތު ތަޖުރިބާއެކެވެ. މަޖާ ކަމެކެވެ.

"ހުރިހާ ފްރެންޑްސް ވަރަށް މިސްވާނެ ޗުއްޓީގައި،" ކަލާފާނު ސްކޫލްގެ އިކްޒާން ބުންޏެވެ.

ދިރާސީ އަހަރު ނިމުމާ އެކު ކުދިންނާއި ބެެލެނިވެރިން މިހާރު ތައްޔާރުވަނީ އަރާމުކޮށްލުމަށެވެ. ޗުއްޓީ ތެރޭގައި ވެސް ކޮންމެވެސް ވަރަކަށް ކިޔެވުން ކުރިއަށް ގެންދިއުމާ އެކީގައި، ބައެއް ކުދިން ބެލެނިވެރިންނާ އެކު ޗުއްޓީ ހޭދަކޮށްލުމަށް ކޮންމެވެސް ތަނަކަށް ދިއުމަށެވެ. އެއާ އެކު، އަންނަ އަހަރުގެ ދިރާސީ އަހަރު ފެށުމުގެ ކުރިން، ފޮތް ލިސްޓަށް އެއްޗެހި ހަމަކޮށް، ރަނގަޅަށް ތައްޔާރުވުމަށެވެ. އަނެއްކާ ވެސް އަނެއް ތަފާތު ތަޖުރިބާއެއް ފެށުމުގެ އުންމީދުގަ އެވެ.