ކޮވިޝީލްޑްގެ ދެވަނަ ޑޯޒް 16 ހަފުތާގެ ކުރިން ޖެހޭނެ: މަބްރޫކް

ކޮވިޑް-19 އާ ދެކޮޅަށް އިންޑިއާގެ ސީރަމް އިންސްޓިޓިއުޓް އިން އުފައްދަމުން އަންނަ ކޮވިޝީލްޑް ވެކްސިންގެ ދެވަނަ ޑޯޒް، ފުރަތަަމަ ޑޯޒް ޖަހާތާ 16 ހަފުތާވުމުގެ ކުރިން ޖެހުމުން، މައްސަލައެއް ނެތް ކަމަށް ދިރާސާތަކުން ދައްކާ ކަމަށް ރައީސް އޮފީހުގެ ތަރުޖަމާނު، މަބްރޫކް އަޒީޒް ރޭ ވިދާޅުވެއްޖެ އެވެ.

މަބްރޫކް އެގޮތަށް ވިދާޅުވިއިރު، ކޮވިޝީލްޑް ވެކްސިން ލިބުމަށް ދަތިވެ، މިމަހުގެ ހަތަރު ވަނަ ދުވަހު ވަނީ ރާއްޖޭގައި އެ ވެކްސިން ޖެހުން މެދުކަނޑާލައިފަ އެވެ. ރާއްޖެ އިން ގިނަ ބަޔަކު ވަނީ މި ވެކްސިން ޖަހައިފަ އެވެ. ކޮވިޝީލްޑް ވެކްސިންގެ ދެވަނަ ޑޯޒް ޖަހައިދެމުން އައީ 8-12 ހަފުތާއާ ދެމެދުގަ އެވެ.

މީގެ ކުރިން ޑޮކްޓަރުން ބާރު އަޅަމުންް އައީ ކޮވިޝީލްޑް ވެކްސިންގެ ފުރަތަމަ ޑޯޒު ޖެހި ފަހުން އަށް ހަފުތާ ވި މީހުން ވީ އެންމެ އަވަހަށް ވެކްސިންގެ ދެވަނަ ޑޯޒު ޖެހުމަށެވެ. އެއީ ވެކްސިން ޖެހުން ލަސްވާ ނަމަ ހަށިގަނޑުގެ ދިފާއުގެ މިންވަރު ދަށަށް ދާނެ ކަމަށް ޑޮކްޓަރުން ބުނެ އެވެ.

އެކަމަކު ވެކްސިން ހުސްވެ، ވެކްސިނޭޝަން ޕްރޮގްރާމު މެދުކަނޑާލަން ޖެހުނުއިރު ފުރަތަމަ ޑޯޒް ޖެހިތާ އަށް ހަފުތާވި ގިނަ ބަޔަކު ވެސް ވެކްސިން ނުޖަހައި އެބަތިއްބެވެ.

ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި މަބްރޫކް ރޭ ވިދާޅުވީ ކޮވިޝީލްޑްގެ ދެވަނަ ޑޯޒްއާ ގުޅޭގޮތުން ހަދާފައިވާ ދިރާސާއާ ގުޅޭ ބައެއް މައުލޫމާތު ޑޮކްޓަރުން ހިއްސާ ކޮށްފައިވާ ކަމަށެވެ. އެގޮތުން ޓެގް ޓީމުން ނިންމާފައި ވަނީ ކޮވިޝީލްޑްގެ ދެވަނަ ޑޯޒް ޖެހުން 16 ހަފުތާއަށް ވުރެ ލަސް ނުވާ ނަމަ، ރަނގަޅުވާނެ ކަމަށެވެ.

"އެހެން ގައުމުތަކުން ވެސް މިގޮތަށް އަމަލު ކުރަމުން އަންނަ ކަމަށް. ސްޕެއިން، ކެނެޑާ ފަދަ ގައުމުތައް އެބޭފުޅުން ފާހަގަ ކުރައްވައިފައިވޭ،" މަބްރޫކްް ވިދާޅުވި އެވެ.

ކޮވިޝީލްޑްގެ ދެވަނަ ޑޯޒް ޖެހުމުގެ މުއްދަތާ ގުޅޭ މައުލޫމާތު ހިއްސާކުރަން ޓެކްނިކަލް އެޑްވައިޒަރީ ގްރޫޕް (ޓެގް) ގެ ފަރާތުން މީޑިއާއާ ބައްދަލުކުރާނެ ކަަމަށް ވެސް މަބްރޫކް ވިދާޅުވެ އެވެ.

އޭނާ ވިދާޅުވި ގޮތުގައި ކޮވިޝީލްޑް ވެކްސިން ވީހާ ވެސް އަވަހަށް ހޯދުމުގެ މަސައްކަތް ސަރުކާރުން އަންނަނީ ކުރަމުންނެވެ. އެގޮތުން އަންނަ ޖޫން މަހުގެ ތެރޭގައި އެސްޓްރަޒެނެކާ ވެކްސިންގެ ޝިޕްމަންޓެއް ލިބޭނެ ކަމަށް ހެލްތު މިނިސްޓަރު އަހުމަދު ނަސީމްް ވެސް ވިދާޅުވެފައިވާ ކަމަށް މަބްރޫކް ވިދާޅުވި އެވެ.

ރާއްޖެ އަށް އިންޑިއާ އިން ހަދިޔާކުރި ކޮވިޝީލްޑްގެ ޑޯޒްތައް ހުސްވުމުން މިހާރު ޖަހަނީ އިންޑިއާ އިން ގަނެގެން ގެނެސްފައިވާ ވެކްސިނާއި ޑަބްލިޔު އެޗްއޯގެ ކޮވެކްސް ފެސިލިޓީން ދީފައިވާ ކޮވިޝީލްޑް އަދި ފައިޒާ ވެކްސިންގެ އިތުރުން ޗައިނާ އިން ހަދިޔާކޮށްފައިވާ ސައިނޮފާމް ވެކްސިނެވެ.

މީގެ އިތުރުން އެސްޓްރަޒެނެކާ ކުންފުނިން ވެކްސިންގެ 700،000 ޑޯޒް ގަންނަން އެއްބަސްވުމެއް ހަދާފައިވެ އެވެ. އަންނަ މަހު ލިބެން ފަށާނެ ކަމަށް މަބްރޫކް އިޝާރާތް އެކުރެއްވީ މި ވެކްސިނަށެވެ. ކޮވިޝީލްޑަކީ އެސްޓްރަޒެނެކާ ވެކްސިން އިންޑިއާގައި އުފައްދާ މާކެޓްކުރާ ނަމެވެ.

ރާއްޖެ އިން މިހާތަނަށް 302،097 މީހަކު ވެކްސިން ޖަހާފައިވެ އެވެ. އޭގެ ތެރެއިން 138،890 މީހުންނަކީ ދެ ޑޯޒް ފުރިހަމަކޮށްފައިވާ މީހުންނެވެ.