ހުއްދަދިނަސް ރަޝިއާގެ ސްޕަޓްނިކް ވީ ވެކްސިން އަދި ރާއްޖެއަކު ނެތް: މަބްރޫކް

ކޮވިޑް-19 އިން ދިފާއުވުމަށް ރަޝިއާ އިން އުފައްދާފައިވާ "ސްޕަޓްނިކް ވީ" ވެކްސިން ރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގު އޮތޯރިޓީން (އެމްއެފްޑީއޭ) އިއްޔެ ދިން ނަމަވެސް އެ ބްރޭންޑްގެ ވެކްސިން ސްޓޮކެއް އަދި ނުލިބޭ ކަމަށް ހެލްތު އިމަަޖަންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބުނެފި އެވެ. އެ އިދާރާގެ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، މިހާތަނަށް އެ ވެކްސިންގެ ސްޓޮކެއް ރާއްޖެއަށް ލިބިފައި ނުވިޔަސް އެ ބްރޭންޑްގެ ވެކްސިން ހޯދުމުގެ މަަސައްކަތް ކުރަމުން އަންނަ ކަމަށެވެ. އެކަމަކު އިތުރު ތަފްސީލެއް ނުދެއްވަ އެވެ.

އެމްއެފްޑީއޭ އިން ސްޕަޓްނިކް ވީ ވެކްސިން ބޭނުން ކުރަން ހުއްދަދިނީ "ރެސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ނުވަތަ އިމަޖެންސީގެ ހާލަތުގަ އެވެ. މި ވެކްސިން ހުއްދަ ކޮށްފައިވަނީ އުމުރުން 18 އަހަރުން މަތީގެ މީހުންނަށެވެ.

އެ ވެކްސިނަށް ހުއްދަ ދިނީ އެ ކަމުގައި ފުރިހަމަ ކުރަންޖެހޭ ހުރިހާ ލިޔެކިޔުންތައް ނިންމައި، ބަލަންޖެހޭ ފަންނީ ކަންކަން ފުރިހަމައަށް ބަލައި ދިރާސާ ކޮށްފައި ކަމަށް ވެސް އެމްއެފްޑީއޭ އިން ބުންޏެވެ. އެ އޮތޯރިޓީ އަށް ފަންނީ ލަފާދޭ ނޭޝަނަލް ފާމަސޫޓިކަލް ބޯޑުގެ ލަފާ ހޯދާފައިވެ އެވެ. މިހާރު ވެސް 66 ގައުމެއްގައި އިމަޖެންސީގައި ބޭނުން ކުރުމަށް ހުއްދަ ދީފައިވާ އަދި ބޭނުން ކުރަމުން އަންނަ "ސްޕަޓްނިކް ވީ" ވެކްސިން އުފައްދާފައި ވާނީ ރަޝިއާގެ ކުންފުންޏެއް ކަމަށްވާ "ދި ގަމާލޭޔާ ނޭޝަނަލް ސެންޓަ އޮފް އެޕިޑާމަލޮޖީ އެންޑް މައިކްރޯބައޮލޮޖީ" އިންނެވެ.

އެމްއެފްޑީއޭ އިން ބުނިގޮތުގައި މި ވެކްސިން ބަލަހައްޓަން ޖެހެނީ މައިނަސް 18 ޑިގްރީ ސެލްސިއަސްގެ ފިނިހޫނުމިނެއްގަ އެވެ. އެ އޮތޯރިޓީން މި ވެކްސިނަށް ހުއްދީފައި ވަނީ ރާއްޖެ އެތެރެ ކުރުމުގެ ކުރިން ވާންޖެހޭ ތައްޔާރީތަކާއި ވެކްސިން އެތެރެ ކުރުމަށް ފަހު، އަދި ހިފައި ގެންގުޅުމުގެ ހުރިހާ މަރުހަލާއެއްގައި ވެސް "ކޯލްޑް ޗެއިން" ބެލެހެއްޓުމަށް ޝަރުތު ކޮށްގެންނެވެ.

ރަޝިއާގެ ސްޕަޓްނިކް ވެކްސިނަށް ހުއްދަ ލިބުމާ އެކު ރާއްޖެއިން ކޮވިޑްގެ ޖުމުލަ ހަތަރު ވެކްސިނަކަށް މިވަނީ ހުއްދަދީފަ އެވެ. އެއީ އިންޑިއާގައި އޮކްސްފޯޑް ވެކްސިން އުފައްދާ ސީރަމް އިންސްޓްޓިއުޓްގެ އޮކްސްފޯޑް-އެސްޓްރަޒެނެކާގެ ކޮވިޝީލްޑް ވެކްސިނާއި ޗައިނާގެ ބެއިޖިން އިންސްޓިޓިއުޓް އޮފް ބަޔޮލޮޖިކަލް ޕްރޮޑަކްޓްސް އިން އުފައްދާ ސިނަފޯމް ވެކްސިން އަދި އެމެރިކާގެ ފައިޒާ އާއި ޖަރުމަނުގެ ބަޔޯއެންޓެކް ގުޅިގެން އުފެއްދި ފައިޒާ ވެކްސިނެވެ.