ބޫސްޓަ ޑޯޒް ނުޖަހާ ނަމަ، 14 ދުވަހަށް ކަރަންޓީން ވާން ޖެހޭ ގޮތަށް ހަދަން މަޝްވަރާކުރަނީ

ކޮވިޑް-19 އިން ދިފާއުވުމަށް ޖަހަން ޖެހޭ ވެކްސިންގެ ބޫސްޓަ ޑޯޒް ނުޖަހާ ނަމަ 14 ދުވަހަށް ކަރަންޓީން ވާން ޖެހޭ ގޮތަށް އުސޫލެއް ހަދަން ސަރުކާރުން މިއަދު މަޝްވަރާ ކުރަން ފަށައިފި އެވެ.

"މިހާރު" އަށް އެނގިފައިވާ ގޮތުގައި، ސަރުކާރުން މި ގޮތަށް އުސޫލެއް ހަދަން މަޝްވަރާ ކުރަން ފެށީ މި ދުވަސްވަރު ރާއްޖޭގައި ކޮވިޑްގެ ހާލަތު ގޯސްވެފައި ވުމާއި ބޫސްޓަ ޑޯޒް ޖަހަން ދާ މީހުންގެ އަދަދު ވެސް މަދުވުމުންނެވެ.

ކޮވިޑް ވެކްސިންގެ ތިންވަނަ ޑޯޒް ނުވަތަ ބޫސްޓަ ޑޯޒް ޖަހަނީ ދެވަނަ ޑޯޒް ޖެހި ފަހުން ހަ މަސް ވެފައިވާ ނަމަ އެވެ. ސަރުކާރުން ކަރަންޓީނުގައި ބައިތިއްބަން ބޭނުންވަނީ އެ މުއްދަތު ހަމަވުމުން ވެސް ބޫސްޓަ ޑޯޒް ނުޖަހާ ނުވާ މީހުންނެވެ.

އާންމު އުސޫލުގެ ދަށުން މިހާރު ކަރަންޓީންގައި މީހުން ބައިތިއްބަނީ ހަތް ދުވަހަށް ކަމަށް ވިޔަސް ބޫސްޓަ ޑޯޒް ޖަހަން ޖެހޭ މުއްދަތު ހަމަވެ ނުޖަހާ ނަމަ، ރަށްރަށަށް ދަތުރުކުރާއިރު 14 ދުވަހަށް ކަރަންޓީން ވާން ޖެހޭ ގޮތް ހަދަން ސަރުކާރުން އަންނަނީ މަޝްވަރާ ކުރަމުންނެވެ.

ނަަމަވެސް، މި އުސޫލަށް އަމަލުކުރަން ފަށާނެ ދުވަހެއް އަދި ސާފެއް ނުވެ އެވެ.

ކުރިން ވެސް ސަރުކާރުން ވަނީ ކޮވިޑްގެ ވެކްސިންގެ ދެ ޑޯޒް ފުރިހަމަ ނުކުރާ މީހުންނަށް ދަތުރުކުރުމުގައި ލުއި ނުލިބޭ ގޮތަށް ފިޔަވަޅުތައް އަޅައިފަ އެވެ.

ރާއްޖޭގައި އުމުރުން 18 އަހަރު މަތީގެ އެންމެންނަށް ބޫސްޓަ ޑޯޒް ޖަހަން ފެށީ މި މަހު އެވެ. މިހާތަނަށް 50،000 އާ ގާތްކުރާ އަދަދަކަށް ވަނީ ބޫސްޓަ ޑޯޒް ޖަހައިފަ އެވެ.

ރާއްޖޭގައި މިހާރު ކޮވިޑް ވެކްސިންގެ ދެ ޑޯޒް ފުރިހަމަކުރި މީހުންގެ އަދަދު އުޅެނީ 369،000 އިން މަތީގަ އެެވެ.