ސިލްސިލާ "ކުޗް ރަންގް ޕިޔާރު ކޭ އޭސޭ ބީ" ގެ އާ ސީޒަން ކަށަވަރުކޮށް ދީފި

ސޮނީ ޓީވީން ދެ ސީޒަނަކަށް ގެނެސްދީފައިވާ ކާމިޔާބު ސިލްސިލާ "ކުޗް ރަންގް ޕިޔާރު ކޭ އޭސޭ ބީ" ގެ ތިން ވަނަ ސީޒަނެއް ގެނެސްދޭން ތައްޔާރުވަމުން އަންނަކަން ސޮނީން ކަށަވަރުކޮށް ދީފި އެވެ.

ސިލްސިލާގައި ލީޑް ރޯލު ކުޅުނު ޝަހީރު ޝެއިހާއި އެރިކާގެ ފޮޓޯއަކާ އެކު އެކު ސޮނީން އިންސްޓަގްރާމްގައި ބުނީ ސިލްސިލާގެ ފަސްޓްލުކް ވަރަށް އަވަހަށް އާންމުކުރާނެ ކަމަށެވެ. "ކުޗް ރަންގް ޕިޔާރު ކޭ އޭސޭ ބީ" އަކީ ސޮނީން 2016-2017 އަށް ގެނެސްދިން ސިލްސިލާއެކެވެ. ދެ ސީޒަނަކަށް ސިލްސިލާ ގެނެސްދިން އިރު 414 އެޕިސޯޑް ގެނެސްދީފައިވެ އެވެ.

އާ ސީޒަނާ އެކު ސިލްސިލާ އަލުން ގެނެސްދޭން ތައްޔާރުވަމުން އަންނަ އިރު އެރިކާ އާއި ޝަހީރާ އެކު، ކުރިން ވެސް ސިލްސިލާގައި މުހިއްމު ރޯލެއް ކުޅުނު ސުޕްރިޔާ ޕިލްގާއޯންކަރް ވެސް ހިމެނޭނެ އެވެ.

އެރިކާ އާއި ޝަހީރު ވެސް ވަނީ އެ މީހުން އަލުން ކުރީގެ ކެރެކްޓާތަކުން ފެންނާނެކަން ދާދި ފަހުން މީޑިއާތަކަށް ކަށަވަރުކޮށް ދީފަ އެވެ.

ޝަހީރު އެންމެ ފަހުން ކުޅުނު ސިލްސިލާ އަކީ މިދިޔަ އަހަރު ސްޓާ ޕްލަސް އިން ނިންމައިލި "ޔޭ ރިޝްތޭ ހޭ ޕިޔާރު ކޭ" އެވެ. އަދި އެރިކާ އެންމެ ފަހުން ކުޅުނީ ސްޓާ ޕްލަސް އިން މިދިޔަ އަހަރު ނިންމައިލި "ކަސޯޓީ ޒިންދަގީ ކީ" އެވެ.