Roadha Mihaaru
މާލޭގެ ކޮވިޑް ކޭސްތައް 1،000 އިން ދަށަށް

ހަފުތާއެއް ފަހުން މާލެ ސަރަހައްދުގެ ކޮވިޑް ކޭސްތައް 1،000 އިން ދަށަށް

25 މެއި 2021

މާލެ ސަރަހައްދުގެ ކޮވިޑް ކޭސްތައް ހަފުތާއެއް ފަހުން 1،000 އިން ދަށަށް ހިނގައްޖެ އެވެ.

މާއިދާ މުހައްމަދު ރަޝާދު މާއިދާ މުހައްމަދު ރަޝާދު

މާލެ ސަރަހައްދުގެ ކޮވިޑް ކޭސްތައް ހަފުތާއެއް ފަހުން 1،000 އިން ދަށަށް ހިނގައްޖެ އެވެ.

އެޗްޕީއޭ އިން މިރޭ އާންމުކުރި ތަފާސްހިސާބުތަކަށް ބަލާއިރު، ފާއިތުވި 24 ގަޑިއިރުގެ ތެރޭގައި 4،030 ސާމްޕަލެއް ނަގާފައިވާއިރު، ކޮވިޑަށް ޕޮޒިޓިވްވެފައި ވަނީ 1،004 މީހެކެވެ. އޭގެ ތެރެއިން މާލެ އާއި ވިލިމާލެ އާއި ހުޅުމާލެ އިން ޕޮޒިޓިވްވި މީހުންގެ އަދަދަކީ 835 އެވެ. ފާއިތުވި ހަ ދުވަހުގައި ވެސް މާލޭ ސަރަހައްދުގެ ކޮވިޑްގެ ކޭސްތައް އުޅުނީ 1،500 އާ ގާތް ކުރާ އަދަދެއްގަ އެވެ.

އިއްޔެ ހަވީރު 6 އިން މިއަދުގެ ހަވީރު 6 އަށް ކޮވިޑަށް އަލަށް ޕޮޒިޓިވްވި މީހުންގެ ތެރެއިން، މާލެ ސަހައްދު ފިޔަވައި އެހެން ރަށްރަށުގެ މީހުންގެ އަދަދަކީ 153 އެވެ. އަދި ރިސޯޓުތަކުން 12 މީހަކާއި ސަފާރީތަކުން ހަތަރު މީހަކު ވެސް ކޮވިޑަށް ޕޮޒިޓިވްވެފައިވެ އެވެ.

މިއާ އެކު ރާއްޖެއިން ކޮވިޑް ޖެހުނު މީހުންގެ ޖުމުލަ އަދަދު މިހާރު 58،345 އަށް އަރަ އެވެ. އަދި މިހާތަނަށް ބަލިން ރަނގަޅުވެފައި ވަނީ 34،159 މީހެއް ކަމުން، އެކްޓިވް ކޭސްތަކުގެ އަދަދު އުޅެނީ 24،033 ގަ އެވެ.

ކޮވިޑް ޖެހިގެން މިވަގުތު 289 މީހަކަށް އަންނަނީ ހޮސްޕިޓަލުތަކުގައި ފަރުވާ ދެމުންނެވެ. އެ ބަލީގައި މިއަދު މަރުވި ދެ މީހުންނާއެކު ރާއްޖެ އިން ކޮވިޑް ފެނުނު ފަހުން މިހާތަނަށް ބަލީގައި މަރުވި މީހުންގެ ޖުމުލަ އަދަދު ވެސް ވަނީ 144 އަށް އަރައިފަ އެވެ. އޭގެ ތެރެއިން މި މަހު އެކަނިވެސް 71 މީހަކު ކޮވިޑަށް ޕޮޒިޓިވްވި އެވެ. އެހެންވެ، މިއީ ރިކޯޑު އަދަދަކަށް ކޮވިޑްގައި މީހުން މަރުވި މަހެކެވެ.

ރާއްޖޭގެ ކޮވިޑްގެ ހާލަތު މިހާ ބޮޑަށް ގޯސްވެފައިވާތީ މާދަމާ އިން ފެށިގެން މާލޭ ސަރަހައްދު ވެސް ލޮކްޑައުން ކުރާނެ އެވެ. އަދި މޮނިޓަރިން އަށް ލާފައިވާ ރަށްރަށުގައި ވެސް ކާފިއު ހިންގަން ސަރުކާރުން ނިންމާފައިވެ އެވެ.