މައްސަލައެއް ބެލުމުން ތަނާޒުލްވި ފަނޑިޔާރަކަށް ފިޔަވަޅު އަޅަނީ

ގާނޫނާ ޚިލާފަށް މައްސަލައެއްގައިި ތަނާޒުލްވި ފަނޑިޔާރަކަށް ފިޔަވަޅު އަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން ނެރުނު ބަޔާނެއްގައިވަނީ ނ. ޅޮހީ ކޯޓަށް ހުށަހެޅުނު ދެ މައްސަލައެއްގައި އެ ކޯޓުގެ އިސް މެޖިސްޓްރޭޓް އަހުމަދު ހަސަން މަނިކު އެ މައްސަލަ ބެލުމުން ތަނާޒުލްވެފައިވަނީ ގާނޫނުގައި މައްސަލަތައް ބެލުމުން ތަނާޒުލްވެވޭނެ ފަދަ ހާލަތެއްގައި ނޫން ކަމަށެވެ. އޭނާގެ އެ އަމަލަކީ ފަނޑިޔާރެއްގެ ސުލޫކާ ޚިލާފް އަމަލެއް ކަމަށްވާތީ ސުލޫކީ ފިޔަވަޅެއްގެ ގޮތުން އޭނާއަށް ނަސޭހަތް ދިނުމާ އެކު، އެ ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަ ކުރަން އެންގުމަށް އެ ކޮމިޝަނުން ނިންމާފައިވާ ކަމަށް އެ ބަޔާނުގައިވެ އެވެ.

ފަނޑިޔާރުންގެ ގާނޫނު އޮންނަ ގޮތުން ފަނޑިޔާރެއްގެ މަސްލަހަތު ހިމެނޭ މައްސަލަތަކާއި އާއިލީ ގޮތުން ވަކި މިންވަރަކަށް ގުޅިފައިވާ މީހުންގެ މައްސަލަތައް އެ ފަނޑިޔާރަކު ބަލައިގެން ނުވާނެ އެވެ. އެހެން ނަމަވެސް މައްސަލަތައް ބެލުމުން ތަނާޒުލްވާން ޖެހޭނެ ގޮތްތަކެއް ކަނޑައެޅިފައިވެ އެވެ. މިއީ މައްސަލައެއް ބެލުމުން ތަނާޒުލްވި ފަނޑިޔާރަކަށް ފިޔަވަޅު އެޅި ފުރަތަމަ ފަހަރެވެ.