ދަރިންގެ އަމަލުތަކުގެ ޒިންމާ ބެލެނިވެރިން ނަގަންޖެހެނީ ކިހާ ވަރަކަށް

ދަރިފުޅުގެ ކިބައިން ނޭދެވޭ އަމަލުތަކެއް ފެންނަން ފެށުމުން އެންމެންގެ އިނގިލި އަމާޒު ވަނީ ދަރިފުޅުގެ މައިންބަފައިންނަށެވެ.

މައިންނަކީ ދަރިންގެ ކުރިމަގު ބައްޓަންކުރުމުގެ ހުރިހާ ބާރެއް އޮންނަ ފަރާތް ހެއްޔެވެ؟ ބެލެނިވެރިން ބޭނުންވާ ގޮތަށް ދަރިން ބަލައި ބޮޑުކުރުމުގައި 100 ޕަސެންޓް ކާމިޔާބުވާނެ ކަމަށް ބަލައިގެން ނުވާނެ އެވެ.

ބޭނުންވާ ގޮތަށް ދަރިން ތަރުބިއްޔަތުކުރެވޭ ނަމަ ދަރިންގެ ކިބައިން ވެސް ފެންނާނީ މައިންބަފައިންގެ ކިބައިގައި ހުންނަ ހުރިހާ ސިފަތަކެކެވެ. ރުޅިއަންނާނީ ވެސް އެއްކަހަލަ ކަންކަމުގަ އެވެ. ގަޔާވާނީ ވާނީ ވެސް އެއްކަހަލަ އެއްޗިއްސަށެވެ.

މައިންބަފައިންގެ ފަރާތުން ދަރިންނަށް ރަނގަޅު ނަތީޖާއެއް ދެއްކޭތަ؟

"ސައިކޮލޮޖީ ޓުޑޭ" ވެބް ސައިޓުގައި މީހަކު ކޮށްފައިވާ ސުވާލުތަކަކަށް ޖަވާބުދެމުން އޭގައި ބުނެފައިވަނީ ދިރިއުޅުމުގައި ކުރިއަރާފައިވާ މައިންގެ ފަރާތުން ދަރިންނަށް ލިބިފައިވާ ތަރުބިއްޔަތު އާންމުގޮތެއްގައި ގޯސްކަން ތަޖުރިބާއިން ފާހަގަވާ ކަމަށެވެ.

ނަފްސާނީ ކަންކަމާ ބެހޭ ގިނަ މައުލޫމާތުތަކެއް ގެނެސްދޭ އެ ވެބްސައިޓުގައި، ނަރުހަކަށް އުޅޭ ޒިންމާދަރު މައެއްގެ ދަރިއަކު މަސްތުވާތަކެތީގެ ޝިކާރައަކަށް ވާންޖެހޭ ސަބަބަކީ ކޮބައިތޯ ސުވާލުކޮށްފައިވެ އެވެ. އަދި އެކި ރޮނގުތަކުން އެންމެ މޮޅު އެވޯޑް ހާސިލް ކުރި ދަރިވަރެއްގެ މުޅި ދިރިއުޅުން ހަލާކުގެ ތެރެއަށް ވައްޓާލަނީ ކޮން ސަބަބުތަކެއް މެދުވެރި ވެގެންތޯ ވެސް ސުވާލުކޮށްފައިވެ އެވެ.

ދަރިން ކުރާ ކަންކަމުގައި ޒިންމާ މައިންބަފައިން ބޮލުގައި

ދަރިންގެ ފަރާތުން ފެންނަ ނޭދެވޭ ކަންކަމުގެ ޒިންމާ އަބަދުވެސް ނަގަންޖެހެނީ މައިންބަފައިންނެވެ. މުޖުތަމައު ދެކޭ ގޮތުގައި، ދަރިންގެ މައްޗަށް މައިންބަފައިންނަށް ހުރިހާ ކޮންޓްރޯލެއް އޮންނާނެ އެވެ. ދަރިން ކުރާ ކޮންމެ ގޯސްކަމެއްގެ ޒިންމާ މައިިންބަފައިން ނަގަންޖެހޭ ނަމަ، ކޮންމެ ކާރު އެކްސިޑެންޓެއްގެ ޒިންމާ ނަގަން ޖެހޭނީ ކާރު ޑްރައިވަރު ކަމަށް "ސައިކޮލޮޖީ ޓުޑޭ" އިން ސިފަކޮށްފައިވެ އެވެ.

މައިންބަފައިންގެ ތެރެއިން ދަރިންގެ މައްޗަށް އޮންނަ ކޮންޓްރޯލް ގެއްލިފައިވާކަން ގަބޫލުކުރާ މީހުންނަކީ ދަރިންނާ މެދު އިހުމާލުވެވިފައި މީހުންނެވެ.

ދަރިން ތަރުބިއްޔަތުކުރުމުގައި ދިމާވާދަތިތައް

ބައެއް ކުދިން ބޮޑުވަމުން އަންނައިރު ވާހަކަ ދެއްކުމާއި ހިނގުން ލަސްވެ، ނުވަތަ ނަފްސާނީ މައްސަލައެއްގެ ސަބަބުން އެތައް ކަމެއް އުނިވެގެންދެ އެވެ. މި ސަބަބުތަކާ ހުރެ، ސްކޫލަށް ގެންދާ ހިސާބުން އެކުދިންނަށް ހާއްސަ މީހުންގެ އެހީ ބޭނުންވެ އެވެ. މައިންބަފައިންނަށް ވެސް އެކުދިންނާ ޑީލް ކުރުމަށް އެކަމަށް ހާއްސަ މީހުންގެ އެހީ ބޭނުންވެ އެވެ.

މަސްތުވާތަކެތީގެ ހިސްޓްރީއެއް އޮންނަ އާއިލާއެއް ނަމަ ދަރިން ތަރުބިއްޔަތުކުރުމުގައި އިތުރު ގޮންޖެހުންތަކެއް ކުރިމަތިވެ އެވެ. އެޑިކްޝަނަކީ ބުނެދޭން ނޭނގޭ ކަމެކެވެ. މައިންބަފައިންގެ ފަރާތުން ނުފެންނަ އެތައް ކަމެއް ދަރިން ބޮޑެތިވަމުން އަންނަ އިރު ފެނިފައިހުރެ އެވެ. ބައެއް ކުދިން މަސްތުވާތަކެތީގެ ވަބާގައި ޖެހި ހަލާކުގެ ތެރެއަށް ވެއްޓިގެންދެ އެވެ. އާއިލާ އަށް އިނގިލި ދިއްކުރެވެ އެވެ.

ދަރިންގެ ފަރާތުން ކުރިމަތިވާ ހުރިހާ ކަމެއްގެ ޒިންމާ މައިންބަފައިންގެ ބޮލުގާ ނާޅުވާށެވެ. ދަރިން ބޮޑުވަމުން އަންނައިރު، އެކުދިންގެ ފަރާތުން ފެންނަ ނޭދެވޭ ކޮންމެ ކަމަކީ އެއްވެސް ދަރިއަކަށް މައިންބަފައިން ދީފައިވާ ތަރުބިއްޔަތުގެ ގޮތުން ދިމާވި ކަމެކޭ ނުބުނާށެވެ.