އެމްޑީޕީގެ އޮފީހުގެ ބިއްލޫރިގަނޑެއް މައްސަލައިގައި ދައުވާކޮށްފި

އެމްޑީޕީގެ އޮފީހުގެ ބިއްލޫރިގަނޑު ތަޅައިލި މައްސަލައިގައި މިދިޔަ ހަފުތާގައި ދައުވާ އުފުލައިފި އެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުގެ މީޑިއާ އޮފިޝަލް އަދި ޕަބްލިކް ޕްރޮސެކިއުޓާ އަހުމަދު ޝަފީއު މިއަދު ވިދާޅުވީ، މިދިޔަ އޭޕްރީލް 13 ގައި އެމްޑީޕީގެ އޮފީހުގެ ބިއްލޫރިގަނޑު ތަޅައިލި މައްސަލައިގައި ހަތަރު މީހެއްގެ މައްޗަށް ދައުވާ ކޮށްދިނުމަށް އެދި ފުލުހުން ހުށަހެޅި ކަމަށެވެ.

އޭގެ ތެރެއިން ތިން މީހެއްގެ މައްޗަށް ދައުވާ ކުރެވޭ ވަރަށް ހެކި ނެތުމުން މައްސަލަ އަނބުރާ ފޮނުވައިލީ އެވެ. އެހެންވެ، ދައުވާ އުފުލާފައި ވަނީ އަހުމަދު ޝިމާދު މޫސާގެ މައްޗަށް އެކަންޏެވެ.

އެ މައްސަލައިގައި މިދިޔަ ބުދަ ދުވަހު އޭނާގެ މައްޗަށް އުފުލާފައިވަނީ މުދަލަށް ގެއްލުން ދިނުމުގެ ކުށުގެ ދައުވާ އެވެ.

އެމްޑީޕީގެ އޮފީހަށް ގެއްލުންދިން މައްސަލައިގައި މީގެ ކުރިން ތިން ފިރިހެނަކު ހައްޔަރުކުރި އެވެ. އެއީ އުމުރުން 23 އަހަރާއި 24 އަހަރު އަދި 36 އަހަރުގެ މީހެކެވެ.