ކޮވިޑް: މާލެ ސަރަހައްދުގެ ހަރުކަށި ފިޔަވަޅުތައް އަންގާރަ ދުވަހާ ހަމައަށް އިތުރުކޮށްފި

ކޮވިޑް-19 އިން ރައްކާތެރިވުމަށް މިދިޔަ މަހުގެ 25 އިން ފެށިގެން ދެ ހަފުތާގެ މުއްދަތަށް އެޗްޕީއޭ އިން މާލެ ސަރަހައްދުގައި އެޅި ފިޔަވަޅުތައް އަންނަ އަންގާރަ ދުވަހާ ހަމައަށް ދަންމާލައިފި އެވެ.

ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު މިރޭ ނެރުއްވި އެންގުމުގައި ވަނީ، ކޮވިޑުން ރައްކާތެރިވުމަށް މާލެ އާއި ވިލިމާލެ އާއި ހުޅުމާލޭގައި އަޅާފައިވާ ފިޔަވަޅުތަކުގެ މުއްދަތު އިތުރު ހަތް ދުވަހަށް ދަންމާލާފައިވާ ކަމަށެވެ. އެއީ މި މަހުގެ 15 ވަނަ ދުވަހުގެ ނިޔަލަށެވެ.

މާލެ ސަރަހައްދުގައި ކޮވިޑް ކޭސްތައް އާދަޔާ ހިލާފަށް މައްޗަށް ދާން ފެށުމުން އެ ބަލި ފެތުރުން ކޮންޓްރޯލް ކުރުމަށް މިދިޔަ މަހުގެ 25 އިން ފެށިގެން ވަނީ ލޮކްޑައުން އިއުލާންކޮށްފަ އެވެ. ކޮންމެ ދުވަހެއްގެ ހަވީރު 4 އިން ހެނދުނު 8 އަށް ކާފިއު ހިންގާފައިވާއިރު، އެ ނޫން ގަޑިތަކުގައި ވެސް އެއްވެސް މީހަކަށް ބޭރުތެރޭގައި އުޅެވެނީ ފުލުހުންގެ ހާއްސަ ހުއްދައެއް ލިބިގެންނެވެ. އަދި އެ މުއްދަތުގެ މާ ކުރިން ފެށިގެން ވަނީ މާލެ ސަރަހައްދުގެ ކެފޭ/ރެސްޓޯރަންޓުތައް ވެސް ބަންދުކޮށްފަ އެވެ. އެ ތަންތަނުން ހަމައެކަނި ދެވެނީ ޑެލިވަރީ/ޓޭކްއަވޭގެ ހިދުމަތެވެ.

ހަރުކަށި ފިޔަވަޅުތަކާ ގުޅިގެން، މާލެ ސަރަހައްދުން ކޮންމެ ދުވަހަކު ކޮވިޑަށް ޕޮޒިޓިވްވާ މީހުންގެ އަދަދު މިހާރު ވަނީ ދަށްވާން ފަށައިފަ އެވެ.

މިއަދު ބޭއްވި މީޑިއާ ބްރީފިންގައި ރައީސް އިބްރާހިމް މުހައްމަދު ސޯލިހު ވިދާޅުވި، މާލެ ސަރަހައްދުގައި އަޅާފައިވާ ހަރުކަށި ފިޔަވަޅުތަކަށް ހަފުތާއެއް ފަހުން ލުޔެއް ދެވޭތޯ ބަލަމުން އަންނަ ކަމަށެވެ.