ޖައްވީ ދަތުރުގެ ހާއްސަ ސީޓް 28 މިލިއަނަށް ވިކިއްޖެ

ބްލޫ އޮރިޖިންގެ ޖައްވީ ދަތުރުގެ ހާއްސަ ސީޓް 28 މިލިއަން ޑޮލަރަށް ވިކިއްޖެ

14 ޖޫން 2021

ދުނިޔޭގެ އެންމެ ބޮޑު މަހުޖަނު އެމެޒޯން ކުންފުނީގެ ވެރިޔާ ޖެފް ބެޒޯސްގެ ބްލޫ އޮރޮޖިން އިން އަންނަ މަހު ޖައްވަށް ކުރާ ފުރަތަމަ ދަތުރަށް ނީލަން އުސޫލުން ވިއްކަން ނިންމި ސީޓަށް 28 މިލިއަން ޑޮލަރު ލިބި، ނީލަން ހޮނިހިރު ދުވަހު ނިންމާލައިފި އެވެ.

އަހުމަދު އަދްޝަން

މަސް ދުވަހުގެ މުއްދަތަށް އޮންލައިންކޮށް ކުރިއަށް ގެންދިޔަ ނީލަން ފެށި ފަހުން އެކި ފަހަރު މަތިން އަގު އަރަމުން ގޮސް ނީލަން ނިންމައިލަން 10 މިނިޓަށްވެފައި ވަނިކޮށް އެންމެ ބޮޑު އަގަކަށް ހުށަހެޅީ 28 މިލިއަނެވެ. އެ އަގާ އެކު ނިލަން ނިންމައިލި ނަމަވެސް ސީޓް ކާމިޔާބުކުރި މީހާގެ ނަމެއް ހާމައެއްނުކުރެ އެވެ.

ނަމަވެސް ވަރަށް އަވަހަށް އޭނާގެ ނަމާ އެކު، ދަތުރުގައި ބައިވެރިވާ އިތުރު މީހުންގެ މައުލޫމާތު އާންމުކުރާނެ ކަމަށް ބްލޫ އޮރިޖިން އިން ބުންޏެވެ.

The auction for the very first seat on #NewShepard has concluded with a winning bid of $28 million. The winning bid amount will be donated to Blue Origin’s foundation, @ClubforFuture. Full replay of the auction webcast: https://t.co/5Vc8IvWxJR pic.twitter.com/IlGbgOFmhx
— Blue Origin (@blueorigin) June 12, 2021

އެ ކުންފުނިން ބުނެފައިވާ ގޮތުގައި ނީލަމުގައި ވިއްކަން ނިންމި ސީޓަށް 159 ގައުމަކުން 7،600 މީހަކު ޝައުގުވެރިކަން ފާޅުކޮށް، ނީލަމަށް ރަޖިސްޓްރީކުރި އެވެ.

The name of the auction winner will be released in the weeks following the auction’s conclusion. Then, the fourth and final crew member will be announced – stay tuned.
— Blue Origin (@blueorigin) June 12, 2021

އަންނަ މަހުގެ 20 ގައި ބާއްވާ ބްލޫ އޮރިޖިންގެ ފުރަތަމަ ދަތުރުގައި ޖެފްގެ އިތުރުން އޭނާގެ ކޮއްކޮ މާކް ބެޒޯސް ވެސް ބައިވެރިވާނެ އެވެ.

މި ދަތުރަށް ބޭނުން ކުރާނީ ބްލޫ އޮރިޖިން އިން ބަނދެފައިވާ ހަ ސީޓްގެ "ނިއު ޝެފަޑް" އެވެ. މިއީ ރޮކެޓް ފަރުމާ އަށް ހަދާފައިވާ 60 ފޫޓް ދިގު އެއްޗެކެވެ. މި އުޅަނދުގައި ޖައްވުގެ ތެރޭގައި 10 މިނިޓްގެ މައިކްރޮގްރެވިޓީ ތަޖުރިބާކޮށްލެވޭނެ އެވެ.

އަންނަ ބާއްވާ ދަތުރަށް ފަހު މި އަހަރުގެ ފަހުކޮޅު އިތުރު ދަތުރުތަކެއް ބާއްވަން ވެސް ބާއްވާނެ ކަމަށް ބްލޫ އޮރިޖިން އިން ބުނެފައިވެ އެވެ.