އަޕްޑޭޓް ނުކޮށްފި ނަމަ ބައެއް އައިފޯންތައް ހަލާކުވެދާނެ

އައިއޯއެސް 12 ބޭނުންކުރާ ކުރީގެ އައިފޯންތަކުގެ މެމަރީ އަށް ދިމާވެދާނެ މައްސަލަތަކެއް ހުރުމުން ވީހާ ވެސް އަވަހަކަށް ފޯނުގެ ސޮފްޓްވެއާ އަޕްޑޭޓް ކުރަން އެޕަލް އިން އެދެފި އެވެ.

އެ ކުންފުނިން ބުނީ 12.5.4 އަށް އަޕްޑޭޓްކުރަން ޖެހޭ ޑިވައިސްތަކަކީ އައިފޯން 5އެސް، އައިފޯން6، އައިފޯން 6 ޕްލަސް އަދި އައިޕެޑް އެއާ ކަމަށެވެ.

"އައިއޯސް 12.5.4 އާ އެކު އެ ޑިވައިސްތަކަށް ވަރަށް މުހިއްމު ސެކިއުރިޓީ އަޕްޑޭޓްތަކެއް ލިބޭނެ. އެހެންވީމަ ފާހަގަކުރި ކުރީގެ ޑިވައިސްތައް ބޭނުންކުރާ ހުރިހާ އެންމެން ވެސް ވީހާ އަވަހަށް އަޕްޑޭޓްކުރަން އެދެން." އެޕަލް އިން ބުންޏެވެ. "އެހެން ނޫނީ މި ޑިވައިސްތަކުގެ މެމޮރީ ކޮރަޕްޓުވެ، ޑިވައިސް ބޭނުން ނުކުރެވޭ ހާލަތަކަށް ހިނގައިދާނެ."

މައްސަލަ ދިމާވެދާނެ ކަމަށް އެ ކުންފުނިން ފާހަގަކުރި ޑިވައިސްތަކަކީ 2013 އާއި 2014 ގައި ނެރެފައިވާ އެއްޗިއްސެވެ. ނެރުނުތާ ދުވަސްވީ ނަމަވެސް ޑިވައިސްތަކަށް މިހާތަނަށް ވެސް އެޕަލް އިން ގެންދިޔައީ ސެކިއުރިޓީ އަޕްޑޭޓް ދެމުންނެވެ. އެކަމަކު އައިއޯއެސް 13 އާ އެކު، އެ ޑިވައިސްތަކަށް އާ ފީޗާތަކެއް ދޫކޮށްފައެއް ނުވެ އެވެ.

ޑިވައިސް އެޓްލަސް އިން މިދިޔަ އަހަރު ހަދާފައިވާ ދިރާސާއަކުން ދައްކާ ގޮތުން އައިފޯން ބޭނުންކުރާ މީހުންގެ އަށް ޕަސެންޓް މީހުން އަދިވެސް ބޭނުން ކުރަނީ އައިފޯން 5އެސް، އައިފޯން6 އަދި އައިފޯން 6 ޕްލަސް އެވެ.

އެޕަލް އިން މިހާރު އަންނަނީ މި އަހަރުގެ ސެޕްޓެމްބަރުގައި އައިފޯން 13އާ އެކު އައިއޯއެސް 15 ދޫކޮށްލަން ތައްޔާރުވަމުންނެވެ.