ފްލެޓްގެ އަގު ކުރިން ހެޔޮކޮށް އޮތީ ނުބައިކޮށް ހިސާބު ޖެހުމުން: އަސްލަމް

ކުރީގެ ރައީސް އަބްދުﷲ ޔާމީންގެ ސަރުކާރުގައި ތަރައްގީކުރި ހިޔާ މަޝްރޫއުގެ ފްލެޓްތަކުގެ އަގުގެ ގޮތުގައި އޭރުގެ ސަރުކާރުން 5،600ރ. ކަމަށް ޖެހި ހިސާބަކީ ރަނގަޅު ހިސާބެއް ނޫން ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.

ހައުސިން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވީ، ހިޔާ ފްލެޓްތައް އަޅާފައި ވަނީ ލޯނެއް ނަގައިގެން ކަމަށާއި، އެ ލޯނު އަނބުރާ ދެއްކުމަށް އެތަނުގައި އުޅޭ މީހުންނާއި އެތަނުން ވިޔަފާރީގެ ބޭނުމަށް ދޫކޮށްފައިވާ ތަންތަނުން އަދި ސަރުކާރުން ވެސް ފައިސާގެ ވަކި މިންވަރެއް ދޭން ޖެހޭ ކަމަށެވެ. އެގޮތުން 15 އަހަރު ދުވަހުގެ ތެރޭގައި ފައިސާ އަނބުރާ ދައްކަން ޖެހޭ ކަމަށް ވިދާޅުވި އެވެ.

އަސްލަމް ވިދާޅުވީ ފްލެޓްތަކުގެ ކޮންސްޓްރަކްޝަން ޕީރިއަޑްގެ އިންޓަރެސްޓް ރޭޓާއި ކޮންސްޓްރަކްޝަން އަގަކީ ޔުނިޓެއްގެ އަގު ކަމަށެވެ. އެހެންވެ، މަހަކު 7،500ރ. ފްލެޓެއްގެ އަގުގެ ގޮތުގައި ކަނޑައެޅިއިރު ބިމުގެ ކުއްޔާއި އެތަނުން ލިބޭ ހިދުމަތްތަކުގެ އަގު އަދި ލޯނު ދައްކާ މުއްދަތުގައި އަރައި އިންޓަރެސްޓް ވެސް އޭގައި ނުހިމަނާ ކަމަށް އަސްލަމް ވިދާޅުވި އެވެ.

"އެހެންވީމަ އެ މުއްދަތުގައި ދެއްކީމަ މަހަކު ދައްކަން ޖެހޭ އީއެމްއައިއަކީ ކިހާވަރެއްކަން ހިސާބު ޖެހީ. ސަރުކާރުން ބިމުގެ އަގު މީގެ ތެރެއަކު ނުހިމަނާ. މީގެ ތެރެއަކު ނުހިމަނާ އެ ތަނަށްލާންޖެހޭ އެހެން ހިދުމަތްތަކުގެ އަގު ވެސް. އަދި ލޯނު ރިޕޭ ޕީރިއަޑްގައި އޮންނަ އިންޓަރެސްޓް ވެސް މީގެ ތެރެއަކު ނުލައި ހިސާބު ޖެހީމަ 7.500ރ. އަންނަނީ،" ކުރީގެ ހައުސް މިނިސްޓަރު އަދި މާލޭގެ މޭޔަރު ޑރ. މުހައްމަދު މުއިއްޒްއާ އެކު ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވި އެވެ.

މިނިސްޓަރު ވިދާޅުވީ އެޗްޑީސީގެ ހިސާބު ޖަހައި މީހުން ވަނީ އެ އަގު އައި ގޮތް މާލޭ ސިޓީ ކައުންސިލްގެ ބޭފުޅުންނަށް ހިއްސާކޮށްފައި ކަމަށެވެ.

"ދެން ސިޓީ ކައުންސިލްގެ ބޭފުޅުން ބޭނުންވޭ ހިސާބުތައް އެބޭފުޅުން އަމިއްލަ އަށް ވެރިފައި ކުރަން ބައްލަވާލަން. އަޅުގަނޑުމެން ހިސާބުތައް ހިއްސާކުރާނަން،" އަސްލަމް ވިދާޅުވި އެވެ.

މޭޔަރު މުއިއްޒު ހައުސިން މިނިސްޓަރުގެ މަގާމުގައި ހުންނެވިއިރު 2018 ވަނަ އަހަރުގެ ތެރޭގައި ފްލެޓެއްގެ އަގުގެ ގޮތުގައި 5،600ރ. ކަނޑައަޅާފައި ވަނީ ރަނގަޅަށް ނޫން ކަމަށް އަސްލަމް ވިދާޅުވުމުން މުއިއްޒު ވަނީ އޭރުގެ ސަރުކާރުން ކަނޑައެޅި އަދަދަކީ ކަމާ ބެހޭ އިދާރާތަކުގެ މައުލޫމާތަށް ބަލާފައި ހެދި އަގެއް ކަމަށް ވިދާޅުވެފަ އެވެ.

"މެއިންޓޭނަންސް ފީއާ އެކު 8،500ރ. ދައްކަން ޖެހޭ ކަމަށް މިހާރު މިއޮތީ. އޭރުގައި ހަދާފައި އޮތް ހިސާބުތައް އެއީ ކަމާ ބެހޭ ހުރިހާ އިދާރާތަކުގެ މައުލޫމާތަށް ބަލާފައި އައި އަދަދު. އެއީ 5،600ރ. އަޅުގަނޑުމެން ވާނީ މިހާރުގެ ހިސާބުތައް އައި ގޮތް ބަލަން އެ މައުލޫމާތު ދިނުމަށް އެދިފައި،" މުއިއްޒު ވިދާޅުވި އެވެ.

މުއިއްޒު ވިދާޅުވި ގޮތުގައި އަދިވެސް ގަބޫލުކުރައްވަނީ ފްލެޓްތަކުގެ އަގު 5000-6000ރ. އާ ދެމެދުގައި ލިބެން ޖެހޭ ކަމަށެވެ. ކަމާ ބެހޭ ފަރާތްތަކުން މަޝްވަރާކޮށް އެވަރުގެ އަތްފޯރާ އަގަކަށް ފްލެޓްގެ އަގު ބަދަލުވާނެ ކަމަށް އުއްމީދުކުރައްވާ ކަމަށް ވެސް އޭނާ ވިދާޅުވި އެވެ.

އަންނަ މަހުގެ ތެރޭގައި ފްލެޓްތަކުގެ އެގްރީމެންޓްގައި ސޮއިކުރުމުގެ މަަސައްކަތް ކުރަން ނިންމާފައިވާއިރު އެތަންތަނަށް އަންނަ މަހުގެ ފަހުކޮޅު ވަދެވޭނެ ކަމަށް ވެސް މިނިސްޓަރު ވިދާޅުވި އެވެ.

ކުރިން ވެސް މުއިއްޒު ވިދާޅުވެފައި ވަނީ ފިނިޝިންގެ މަސައްކަތާ އެކު ފްލެޓްތަކުގެ އަގަކީ 5،600ރ. އަށް ކަމަށް އޭރުގެ ސަރުކާރުން ކަނޑައެޅި ކަމަށެވެ. އެކަމަކު މި ސަރުކާރުން ކަނޑައަޅާފައިވާ 7،500ރ. އަކީ ވެސް އެތަނުގެ ފިނިޝިން މަސައްކަތް ނުހިމެނޭ ގޮތަށް ކަނޑައަޅާފައިވާ އަގެކެވެ. ސަރުކާރުން ވަނީ ފްލެޓް ހަވާލުކުރުމަށް ފަހު ތިން މަަސް ދުވަހަށް އެއްވެސް ކުއްޔެއް ނުނަގަން ނިންމައިފަ އެވެ. އެއީ ފްލެޓްގެ މަސައްކަތް ނުނިންމާ ހަވާލުކުރާތީ އެ މަސައްކަތް ކުރަންދޭ މުއްދަތެެކެވެ.