އިންވެސްޓަރުންނަށް ނައިބު ރައީސްގެ މެސެޖު: ފައިދާ ލިބޭނެކަން ޔަގީން

ރާއްޖޭގައި އިންވެސްޓް ކުރަން ޝައުގުވެރިވާ ފަރާތްތަކަށް އަބަދު ވެސް އެ ފުރުސަތު އޮންނާނެ ކަމަށް ވިދާޅުވެ، އެ ފަރާތްތަކުން ކުރާ އިންވެސްޓްމަންޓުތަކުގެ ފައިދާ ލިބޭނެ ކަމުގެ ޔަގީންކަން ނައިބު ރައީސް އަބްދުﷲ ޖިހާދު މިއަދު ދެއްވައިފި އެވެ.

އިންޑިއާގެ ވެރިރަށް ނިއު ދިއްލީގައި ބާއްވާ ރާއްޖޭގެ އިންވެސްޓްމަންޓް ފޯރަމް ހުޅުވައިދެއްވުމަށް ފަހު، ނައިބު ރައީސް ޖިހާދު ވިދާޅުވީ ރައީސް އަބްދުﷲ ޔާމީން ކުރިއަށް ގެންދަވާ އިގްތިސާދީ އިންގިލާބީ މަސައްކަތުގެ އެންމެ މައިގަނޑު އެއް އަސާސަކީ ބޭރުގެ އިންވެސްޓްމަންޓްތައް ކަމަށެވެ. ރާއްޖޭގެ ތަރައްގީގެ ރާސްތާ ވަރަށް އުޖާލާކޮށް އޮތް އިރު، ރާއްޖޭގައި ކުރާ އިންވެސްޓްމަންޓްތައް އިތުރު ކުރުމުން ލިބޭ އިގްތިސާދީ ފައިދާގެ މުހިއްމުކަން ސަރުކާރުން ގަބޫލުކުރާ ކަމަށް އެ މަނިކުފާނު ވިދާޅުވި އެވެ.

އެހެންވެ، ރައީސް ޔާމީންގެ އިސްނެންގެވުމާ އެކު ރާއްޖޭގެ އިގްތިސާދު ފުޅާކޮށް ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަކަން ނައިބު ރައީސް ފާހަގަކުރެއްވި އެެެވެ. އެ ގޮތުން، އެ މަނިކުފާނު ދެއްކެވި ބައެއް މިސާލުތަކަކީ ދައުލަތުގެ ދަރަނި ކުޑަ ކުރުމަށް ކުރާ މަސައްކަތްތަކާއި އަހަރަކު ހަތް މިލިއަން ފަސިންޖަރުންނަށް ހިދުމަތް ދެވޭ ފެންވަރަށް ރާއްޖޭގެ މައި އެއާޕޯޓް ތަރައްގީ ކުރުމަށް ހިންގާ މަޝްރޫ އެވެ.

"ބައިނަލްއަގުވާމީ ޖަމިއްޔާއެއް ކަމަށްވާ މޫޑީޒް އިންވެސްޓާސް ސާވިސް އިން ފުރަތަމަ ފަހަރަށް ރާއްޖެ ރޭޓް ކޮށްފައި ވާތީ، މިއީ އިގްތިސާދީ ދާއިރާ އިން ރާއްޖެ އެޅި ވަރަށް އުއްމީދީ ފިޔަވަޅެއް،" ނައިބު ރައީސް ވިދާޅުވި އެވެ.

ދިއްލީގެ ތާޖު ޕެލެސް ހޮޓަލުގައި ކުރިއަށް ދާ އިންވެސްޓްމަންޓް ފޯރަމް ފައްޓަވައިދެއްވުމުގެ ކުރިން ޖިހާދު ވަނީ އިންޑިއާގެ ނައިބު ރައީސް އެމް ހާމިދު އަންސާރީއާ ރޭ ބައްދަލުކުރައްވައިފަ އެވެ. އެ ބައްދަލުކުރެއްވުމުގައި، ރާއްޖެ އާއި އިންޑިއާއާ ދެމެދު ކުރާ ވިޔަފާރީގެ މުއާމަލާތްތައް އިތުރަށް ހަރުދަނާ ކުރުމަށް މަޝްވަރާ ކުރެއްވި އެވެ. އެ މަޝްވަރާތަކުގައި ބޭންކިން އާއި މާލީ ދާއިރާ ހަރުދަނާކުރުމުގެ މުހިއްމުކަން ދެ ބޭފުޅުން ހާއްސަކޮށް ފާހަގަކުރެއްވި އެވެ.

އިންޑިއާގެ އެންމެ ބޮޑު ވިޔަފާރިވެރިންގެ ޖަމިއްޔާ ކަމަށްވާ ފެޑެރޭޝަން އޮފް އިންޑިއަން ޗެމްބާސް އޮފް ކޮމާސް އެންޑް އިންޑަސްޓްރީ (ފިކީ)އާ ގުޅިގެން ބާއްވާ އިންވެސްޓްމަންޓް ފޯރަމްގައި ރާއްޖެ އާއި އިންޑިއާގެ 400 އަށް ވުރެ ގިނަ ފަރާތަކުން ބައިވެރިވެ އެވެ. އޭގެ ތެރޭގައި، ދެ ގައުމުގެ ބޮޑެތި ކުންފުނިތަކާއި އިންވެސްޓަރުން ހިމެނެ އެވެ.

މި އަހަރުގެ ފޯރަމްގައި ހުޅުވާލި މަޝްރޫއުތައް އަމާޒުކޮށްފައި ވަނީ މައިގަނޑު ތިން ދާއިރާ އަކަށެވެ. އެއީ އިންފްރަސްޓްރަކްޗާ އާއި ޓޫރިޒަމް އަދި ރެކްރިއޭޝަނަލް ދާއިރާގެ މަޝްރޫއުތަކެވެ. އެ ދާއިރާތަކުން ސަރުކާރާއި ސަރުކާރު ހިއްސާވާ ކުންފުނިތަކުން އެ މަޝްރޫއުތައް ހުޅުވާލާފައިވެ އެވެ. އެކަމަކު، އޭގެ ތަފްސީލެއް އަދި ނުލިބެ އެވެ.

މީގެ ކުރިން ރާއްޖޭން ވަނީ ބޭރުގައި ދެ އިންވެސްޓްމަންޓް ފޯރަމް ބާއްވައިފަ އެވެ. މިިދިޔަ އަހަރު ޗައިނާގެ ވެރިރަށް ބެއިޖިންގައި އަދި އޭގެ ކުރީ އަހަރު ސިންގަޕޫރުގައި ބޭއްވި ފޯރަމްގައި ސަރުކާރުން އިއުލާންކޮށްފައިވާ ބޮޑެތި މަޝްރޫއުތަކަށް އިންވެސްޓަރުން ހޯދަން މަސައްކަތް ކުރި އެވެ. އޭގެ ތެރޭގައި މައި އެއާޕޯޓު ތަރައްގީ ކުރުމާއި ވިޔަފާރި ބަނދަރު ތިލަފުއްޓަށް ބަދަލުކުރުމާއި އައިހަވަން މަޝްރޫއު ހިމެނެ އެވެ.