ނަޝީދުގެ ސެކިއުރިޓީ ބްރީޗްވި ގޮތުގެ އިންކުއަރީ އަށް މާރިޔާ ހާޒިރުކޮށްފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބަޔަކު ބޮމުގެ ހަމަަލާއެއް ދިން އިރު އެ މަނިކުފާނުގެ ސެކިއުރިޓީ ބްރީޗްވި ގޮތް ބަލަން ރައްޔިތުންގެ މަޖިލީހުން ކުރިއަށް ގެންދާ އިންކުއަރީ އަށް ޑިފެންސް މިނިސްޓަރު މާރިޔާ އަމަދު ދީދީ މަޖިލީހުގެ ކަމާ ބެހޭ ކޮމިޓީ އަށް މިއަދު ހާޒިޒުކޮށްފި އެވެ.

ނަޝީދުގެ ސެކިއުރިޓީ ބްރީޗްވި ގޮތް ބަލަން މަޖިލީހުން ނިންމި ނިންމުމާ އެއްގޮތަށް، އިންކުއަރީ ކުރިއަށް ގެންދަނީ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އިންނެވެ. އިންކުއަރީގައި ހޯދާ މައުލޫމާތު ތަކަކީ ނަޝީދުގެ ސިއްރު މައުލޫމާތުތަކާއި ސަލާމަތީ ބާރުތަކުގެ ސިއްރު މައުލޫމާތުތަކަކަށް ވާތީ ކޮމިޓީގެ ހުރިހާ ބައްދަލުވުންތަކެއް ކުރިއަށް ގެންދަނީ ސިއްރުންނެވެ.

ކޮޮމިޓީގެ މިއަދުގެ ބައްދަލުވުމަށް މިނިސްޓަރު މާރިޔާ ހާޒިރުކޮށްފައި މި ވަނީ ހަމަލާއާ ގުޅުވައިގެން، ނަޝީދުގެ ވަރަށް އަރިސް ބޭފުޅުން މާރިޔާ އަށް ބޮޑެތި ފާޑުކިއުންތައް އަމާޒުކޮށްފައި ވަނިކޮށެވެ.

އެންމެ ބޮޑު ފާޑުކިއުމެއް އަމާޒުވީ ނަޝީދަށް ހަމަލާއެއް ދޭން ބަޔަކު ރާވާކަމުގެ މައުލޫމާތު، މެމްބަރަކު މާކުރިން މާރިޔާ އަށް އަންގާފައި އޮތްކަން އެނގުމުންނެވެ. އިންކުއަރީ ކުރިއަށް ގެންދާ 241 ކޮމިޓީގައި ވެސް އިންނަވާ ހުޅުދޫ ދާއިރާގެ އެމްޑީޕީ މެމްބަރު އިލްޔާސް ލަބީބު އެ މައުލޫމާތު ދެއްވުމުން ވެސް ނަޝީދުގެ ރައްކާތެރިކަމަށްޓަކައި އެކަށީގެންވާ ފިޔަަވަޅު ނޭޅި ކަމުގެ ތުހުމަތު ވެސް މާރިޔާ އަށާއި އެމްއެންޑީއެފަށް ބައެއް ފަރާތްތަކުން ގެންދަނީ ކުރަމުންނެވެ.

މާރިޔާ މިއަދު ހާޒިރު ކުރިއިރު، އިންކުއަރީގައި ސުވާލުކުރަން ސިފައިންގެ ވެރިންނާއި ވަކިވަކި ސިފަައިންގެ އެތައް ބަޔަކު މީގެ ކުރިން ވަނީ ހާޒިރުކޮށް ސުވާލުކޮށްފަ އެވެ. އޭގެ ތެރެއިން ބައެއް އޮފިސަރުން ވަނީ ދެވަނަ ބުރަށް ވެސް 241 ކޮމިޓީ އަށް ހާޒިރުކޮށްފަ އެވެ.

މޭ މަހުގެ ހަވަނަ ދުވަހު ބޮމެއް ގޮއްވާލައިގެން ދިން ހަމަލާގައި ނަޝީދު ވަރަށް ބޮޑަށް ޒަހަަމްވި އެވެ. އެ ޒަހަމްތަކަށް އޭޑީކޭގައި ފަރުވާ ހޯއްދެވުމަށް ފަހު އިތުރު ފަރުވާއަށް ވަޑައިގެން އެމަނިކުފާނު މިހާރު ހުންނެވީ ޖަރުމަނުގަ އެވެ. އެމަނިކުފާނަށް ހަމަލާ ދިނުމުގައި އަމަލީ ގޮތުން ބައިވެރިވިކަމުގެ ތުހުމަތަށް ފުލުހުން ވަނީ ބަޔަކު ހައްޔަރުކޮށްފަ އެވެ.