އިންތިހާބު ފަސްކުރުމުން ގާނޫނީ ހުސްކަމެއް އަންނާނެ: މައުމޫން

ލޯކަލް ކައުންސިލްތަކުގެ އިންތިހާބު ފަސްކުރުމަކީ ރާއްޖޭގެ ހުރިހާ ރަށެއްގެ ކައުންސިލްތައް ގާނޫނީ ހުސްކަމެއްގެ ތެރެއަށް ގޮސް ރައްޔިތުންނަށް ފޯރުކޮށްދޭން ޖެހޭ އަސާސީ ހިދުމަތްތަކުން މަހްރޫމް ވެގެންދާނެ ކަމެއް ކަމަށް ޕީޕީއެމްގެ ރައީސް މައުމޫން އަބްދުލްގައްޔޫމް ރޭ ވިދާޅުވެއްޖެ އެވެ.

އަންނަ ޖެނުއަރީ މަހު ބާއްވަން ނިންމާފައިވާ ކައުންސިލްތަކުގެ އިންތިހާބު ދެ މަހަށް ފަސްކުރަން ޕީޕީއެމްގެ މުސްތަޝާރު، ރައީސް އަބްދުﷲ ޔާމީންގެ ފެކްޝަނުން ވަނީ ސިވިލް ކޯޓަށް ހުށަހަޅައިފަ އެވެ. މި މައްސަލާގައި ވަކި ގޮތެއް ނިމެންދެން އިންތިހާބުގެ ރީ-ރެޖިސްޓްރޭޝަން ވަކި މުއްދަތެއް ނެތް ގޮތަށް ހުޅުވައިލަން އިލެކްޝަންސް ކޮމިޝަންގެ މައްޗަށް ވަނީ އަމުރެއް ނެރެފަ އެވެ.

މި މައްސަލައަށް އިޝާރާތްކުރައްވައި މައުމޫން ނެރުއްވި ބަޔާނެއްގައި ވިދާޅުވީ ޕީޕީއެމްގެ ވަކި ބަޔަކު އިންތިހާބު ފަސްކުރަން ކޯޓަށް ހުށަހެޅީ، އެ ޕާޓީގެ އަމިއްލަ މަސްލަހަތު ދިފާއު ކުރުމަށް ކަމަށެވެ. މީގެ ސަބަބުން އެހެން ސިޔާސީ ޕާޓީތަކާއި ކެންޑިޑޭޓުންގެ މަސްލަހަތު ގެއްލޭނެތީ ޕާޓީގެ އާއްމު މެމްބަރުން ކަންބޮޑުވާ ކަމަށް މައުމޫން ވިދާޅުވި އެވެ.

ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ކައުންސިލްތަކުގެ އުމުރަކީ، ތިން އަހަރު ކަން މައުމޫން ފާހަގަކުރެއްވި އެވެ. އަދި ވިދާޅުވީ، ކައުންސިލްތަކުގެ އުމުރު ހަމަވުމުގެ 30 ދުވަސް ކުރިން އާ ކައުންސިލެއް އިންތިހާބުުކުރަން ޖެހޭ ކަމަށް ގާނޫނުގައި ބުނެފައިވާ ކަމަށެވެ.

ކައުންސިލްތަކުގެ ދައުރު ފެބުރުއަރީ 27 ގައި ހަމަވާއިރު، އާ ކައުންސިލް ޖެނުއަރީ 27 ގެ ކުރިން އިންތިހާބު ކުރަން ޖެހޭ ކަމަށް ވެސް މައުމޫން ވިދާޅުވި އެވެ.

ކައުންސިލްތަކުގެ އިންތިހާބު ފަސްކުރުމަށް ހުށަހެޅުމުން އިދިކޮޅު ފަރާތްތަކުން ވެސް ވަނީ ކަންބޮޑުވުންފާޅުކޮށްފަ އެވެ.

އިލެކްޝަންސް ކޮމިޝަންގެ މައްޗަށް ސިވިލް ކޯޓުން ނެރުނު އަމުރުގައި ބުނެފައި ވަނީ، ޕީޕީއެމް ހިންގަން ކުރިމަތިވެފައިވާ ހުރަސްތައް ގިރާކުރުމަށް ފަހު އިންތިހާބަށް ތައްޔާރުވާން އެކަށީގެންވާ ވަގުތު ނެތުމުގެ އިތުރުން ޕާޓީގެ ޑޭޓާ ބޭސް އާއި އާއްމު މެމްބަރުންގެ ދަފްތަރު ވެސް ނެތުމާއި އަދި އެހެން ވެސް މުހިއްމު ލިޔެކިޔުންތަކެއް ޕާޓީގައި ނެތް ކަމަށް އެ ޕާޓީން ހުށަހެޅި މައްސަލައިގައި ބަޔާންކޮށްފައިވާ ކަމަށެވެ. މި ހާލަތުގައި އިންތިހާބު ބާއްވައިފި ނަމަ އެ ޕާޓީ އަށް އިޔާދަނުކުރެވޭ ވަރުގެ ގެއްލުންތަކެއް ލިބޭނެ ކަމަށް ވެސް މައްސަލައިގައި ބަޔާންކޮށްފައިވާ ކަމަށް ބުންޏެވެ.

އެ ހާލަަތަށް ރިއާޔަތްކުރާއިރު ޒަރޫރީ ކަންތައް ކުރިމަތިވެފައިވާ ކަމަށް ސިވިލް ކޯޓުގެ ވަގުތީ އަމުރުގައިވެ އެވެ.