ފަލަސްތީނުގެ ޖަމާއަތްތައް މަޝްވަރާގެ މޭޒު ދޮށަށް

ފަލަސްތީނުގައި ވަތަނީ ގުޅުމެއް ގާއިމު ކުރުމަށް، ރައީސް މަހްމޫދު އައްބާސް ގޮވައިލެއްވި ގޮވައިލެއްވުމަށް އިޖާބަ ދިނުމުގެ ގޮތުން، ފަލަސްތީނުގެ ދޭދޭ ޖަމާއަތްތައް މިއަދު ގާޒާގައި ބައްދަލުކުރުމަށް ނިންމައިފި އެވެ.

ހަމާސް ޖަމާއަތުގެ ބާރުގެ ދަށުގައި އޮންނަ ގާޒާގައި، ފަލަސްތީނުގެ ޖަމާއަތްތައް ބައްދަލުކުރާ އިރު، އެޖެންޑާގެ އެންމެ ކުރީގައި އޮތީ ގުދުސް ކަނޑީގެ ހަނގުރާމަ އިން ކުރިމަތިވި ކަންކަމާ މެދު މަޝްވަރާ ކުރުމެވެ.

ގުދުސް ކަނޑީގެ ހަނގުރާމަ އަކީ، ހުސްވި މެއި 10-21 އަށް އިޒްރޭލާއި ފަލަސްތީނުގެ ހަނގުރާމަވެރި ޖަމާއަތްތަކާ ދެމެދު ކުރި ހަނގުރާމަ އަށް ފަލަސްތީނުގެ ޖަމާއަތްތަކުން ދީފައިވާ ނަމެވެ.

ފަލަސްތީނުގެ ރައީސް މަހްމޫދު އައްބާސް، އޭނާގެ ފަތުހު ޖަމާއަތުގެ އިންގިލާބީ މަޖިލީހުގެ ޖަލްސާގައި ވާހަކަފުޅު ދައްކަވަމުން އިއްޔެ ވިދާޅުވީ، ފަލަސްތީނުގައި ވަތަނީ ގުޅުމެއް ގާއިމުކުރުމުގެ ވަގުތު ޖެހިއްޖެ ކަމަށެވެ. އެހެންކަމުން، ހުޅަނގު އައްސޭރީގައި ވެރިކަން ކުރާ ފަތުހު ޖަމާއަތާއި، ގާޒާ ކޮންޓްރޯލް ކުރަމުން އަންނަ ހަމާސް ޖަމާއަތުގެ އިތުރުން، ޕެލަސްޓައިން ލިބަރޭޝަން އޯގަނައިޒޭޝަން (ޕީއެލްއޯ)ގެ ވަކިވަކި ގޮފިތަކާއި، ހަރަކަތުލް ޖިހާދުލް އިސްލާމީގެ މަންދޫބުން ވީހާ އަވަހަކަށް މަޝްވަރާގެ މޭޒު ދޮށަށް އައުމަށް، ރައީސް މަހްމޫދު އައްބާސް އެދިވަޑައިގަތެވެ.

އޭނާ ވިދާޅުވީ ފަލަސްތީނުގެ ދޭދޭ ޖަމާއަތްތަކުގެ މެދުގައި ހުރި ދެބަސްވުންތަކާއި ހިޔާލު ތަފާތުވުންތައް ނައްތާލައި، ހުރިހާ ދާއިރާތަކަކުން ފަލަސްތީނު ރައްޔިތުންނާ ކުރިމަތިވެފައިވާ ގޮންޖެހުންތަކާ ކުރިމަތިލުމަށްޓަކައި، ވަތަނީ ގުޅުމެއް އުފައްދަން ޖެހޭ ކަމަށެވެ. އޭގެ އިތުރުން އޭނާ ވިދާޅުވީ ގާޒާ އަލުން އާރާސްތު ކުރުމާ ގުޅޭ ގޮތުން، މިސްރާއި ޖޯޑަން އަދި ގަތަރާއި ބައިނަލްއަގުވާމީ މުޖްތަމައާ އެކު، ފަލަސްތީނު ސަރުކާރުން މަސައްކަތް ކުރަމުން އަންނަ ކަމަށެވެ.

ފަލަސްތީނުގެ ޖަމާއަތްތައް މިއަދު ގާޒާގައި ބައްދަލު ކުރާއިރު، ހަމާސް ޖަމާއަތުގެ ގާޒާ ގޮފީގެ އިސް ވެރިޔާ ޔަހްޔާ އައްސިންވާރް އާއި މެދުއިރުމަތީގެ ސުލްހައާ ބެހޭ އދ.ގެ ހާއްސަ ކޯޑިނޭޓަރު ޓޯރް ވެނެސްލޭންޑް، އިއްޔެ ބޭއްވި ބައްދަލުވުމުގެ ތަފްސީލުތައް ހިއްސާ ކުރާނެ އެވެ.

ޓޯރް ވެނެސްލޭންޑްއާ އެކު ގާޒާގައި އިއްޔެ ބޭއްވި ބައްދަލު ކުރެއްވުން ސިފަކުރައްވަމުން ސިންވާރް ވިދާޅުވީ އެއީ ވަރަށް ގޯސް ބައްދަލުވުމެއް ކަމަށެވެ. ސިންވާރް ވިދާޅުވީ ގާޒާ އަށް ކުރިމަތިކުރުވާފައިވާ އިންސާނިއްޔަތާ ހިލާފު ހާލަތު އެގޮތުގައި ބާއްވަން ހަމާސް އިން ފުރުސަތު ނުދޭނެކަން، އދ.ގެ ކޯޑިނޭޓަރަށް ދަންނަވާފައިވާނެ ކަމަށެވެ.

ސިންވާރު ވިދާޅުވި ގޮތުގައި އިޒްރޭލުގެ އިސްތިއުމާރީ ދައުލަތުން އަދިވެސް މަސައްކަތް ކުރަނީ، އިޒްރޭލުގެ އަޅުވެތިކަމާ ދެކޮޅު ހަރަކާތްތަކާއި ފަލަސްތީނު ރައްޔިތުން ރަހީނުކުރާށެވެ. އަދި ފަލަސްތީނު ރައްޔިތުންނާއި ފަލަސްތީނުގެ އަސީރުންނާ ދެކޮޅަށް ހިންގާ ސިޔާސަތުތަކުގައި އިޒްރޭލު އަދިވެސް ދަނީ ކުރިއަށް ކަމަށާއި، ގާޒާގައި ދިރިއުޅޭ ފަލަސްތީނު ރައްޔިތުންނަށް ކުރިމަތިކުރުވާފައިވާ އިންސާނިއްޔަތާ ހިލާފު ހާލަތުން ގާޒާ ރައްޔިތުން ސަލާމަތްކޮށްދިނުމުގެ އެއްވެސް އިސްނެގުމެއް އިޒްރޭލުގައި ނެތް ކަމަށް ވެސް އޭނާ ވިދާޅުވި އެވެ.

ސިންވާރު ވިދާޅުވީ މިއަދު ގާޒާގައި ފަލަސްތީނުގެ ދޭދޭ ޖަމާއަތްތައް ބައްދަލުކުރާ އިރު، ގާޒާގެ ހިސޯރު އުވައިލުމަށް އިޒްރޭލަށް ފިއްތުންތައް ކުރިމަތިކުރުވުމަށްޓަކައި، ފަލަސްތީނު ރައްޔިތުން އަލުން ތެދުވުމާ ބެހޭ ގޮތުން އެކަށީގެންވާ ގޮތެއް ނިންމާނެ އެވެ.

ހުސްވި މެއި މަހުގެ 10-21 އަށް، އިޒްރޭލުން ގާޒާ އަށް ދިން އުދުވާނީ ހަމަލާތައް ހުއްޓައިލީ، މިސްރާއި އެމެރިކާ އަދި ބައިނަލްއަގުވާމީ މުޖްތަމައުން ވަރަށް ބޮޑަށް އިޒްރޭލަށް ބާރުއަޅައިގެންނެވެ. އެ ހަމަލާތަކުގައި ގާޒާ އަށް ވަރަށް ބޮޑެތި ގެއްލުންތައް ލިބިފައިވާ އިރު، ގާޒާ އަލުން އާރާސްތު ކުރުމަށް ބައިނަލްއަގުވާމީ މުޖްތަމައުން ކުރަމުން އަންނަ މަސައްކަތަށް ވެސް އިޒްރޭލުން އަންނަނީ ހުރަސް އަޅަމުންނެވެ.

އިޒްރޭލުން ބުނާ ގޮތުގައި ގާޒާ އަލުން އާރާސްތުކުރުމުގެ ކަންކަމަށް އިޒްރޭލުން ހުރަސް އެޅުން ހުއްޓައިލާނީ، ހަމާސް އިން ރަހީނު ކޮށްފައިވާ އިޒްރޭލުގެ ހަތަރު ޔަހޫދީން މިނިވަން ކުރުމުންނެވެ.