އިސްކޮޅު އެންމެ ތަފާތު ދެމަފިރިން: ދިރިއުޅުމުގައި ތަފާތެއް ނެތް

ކައިވެނިކޮށްގެން އުޅޭ މީހުންގެ ތެރެއިން އިސްކޮޅުގައި އެންމެ ބޮޑު ފަރަގެއް ހުރި ޖޯޑުގެ ރެކޯޑް އިނގިރޭސިވިލާތުގެ ދެމަފިރިއަކަށް ލިބިއްޖެ އެވެ.

ދެހާސް ސޯޅަ ވަނަ އަހަރު ކައިވެނިކުރި ޖޭމްސް، 33، އާއި ކްލޯއީ ލަސްޓެޑް، 27، ގެ އިސްކޮޅަށް ބަލާއިރު، އަންހެނުން ކްލޯއީ އަށް ވުރެ ޖޭމްސް އެއް ފޫޓް 10 އިންޗި ކުރެވެ. ޖޭމްސްގެ އިސްކޮޅުގައި ތިން ފޫޓް ހަތަރު އިންޗި (109.3 ސެންޓި މީޓަރު) ހުންނަ އިރު، ކްލޯއީގެ އިސްކޮޅަކީ ފަސް ފޫޓް 5.4 އިންޗި (166.1 ސެންޓި މީޓަރު) އެވެ.

ގިނިސް ވޯލްޑް ރެކޯޑުން ބުނީ ދެމަފިރިންނަށް އިސްކޮޅުގެ އެންމެ ބޮޑު ތަފާތެއް ހުރި ދެމަފިރިންގެ ރެކޯޑް ރަސްމީކޮށް ދީފައި ވަނީ މި މަހުގެ 2 ގައި ކަމަށެވެ.

ޖޭމްސް ބުނި ގޮތުގައި އިސްކޮޅުގައި އަންހެނުންނާ ބޮޑު ތަފާތެއް ހުރުން ފިޔަވައި އެ މީހުންގެ ދިރިއުޅުމުގައި އިތުރު އެއްވެސް ތަފާތެއް ނެތެވެ.

"ކުރަން ޖެހޭ ހުރިހާ ކަމެއް ކުރެވޭ. އަހަރެމެންނަށް އެއްވެސް އިރެއްގައި އިސްކޮޅަކީ އެއްވެސް މައްސަލައެއް ނޫން،" އޭނާ ބުންޏެވެ. "އެހެންވެ މިއާ ހަމަ އާދައިގެ ދިރިއުޅުމެއް."

އެކަމަކު ޖޭމްސް ބުނި ގޮތުގައި އޭނާ ކުރުކަމުން އިންނާނެ މީހަކު ވެދާނެތޯ ވަރަށް ފިކުރު ބޮޑުވި އެވެ. ނަމަވެސް ކްލޯއީއާ ދިމާވި ހިސާބުން އެ ހާސްކަމާއި ނުތަނަވަސްކަން ފިލައި، އޭނާގެ ހަޔާތުގެ ބައިވެރިޔަކަށް ވާނީ ކްލޯއީ ކަމަށް ހިތުގެ އަޑިން ގަބޫލުކުރި ކަމަށް ބުންޏެވެ.

ޖޭމްސް ކިޔައިދިން ގޮތުގައި ކްލޯއީއާ ބައްދަލުވީ 2012 ގެ އޮލިމްޕިކްސްގެ ޓޯޗް އޭނާގެ އުފަން ސިޓީގައި އުފުލަން ލިބުނު ފުރުސަތުގެ ތެރެއިން ރައްޓެހިންތަކެއްގެ ފަރާތުންނެވެ.

ކްލޯއީ ބުނީ ޖޭމްސް ފުރަތަމަ ފެނުނު ވަގުތުން ފެށިގެން ވެސް އޭނާއަށް ހިތްކީ ކަމަށެވެ. އެކަމަކު އެންމެ ބޮޑު ބިރަކަށްވީ އާއިލާ މީހުންނާއި ރައްޓެހިން އެކަމާ ދޭތެރޭ ދެކޭނެ ގޮތަކާ މެދުގަ އެވެ.

"ބައެއް ކަހަލަ ކަންކަމަކީ ހީ ވެސް ނުކުރާ ކަހަލަ ގޮތްގޮތަށް ދިމާވާ ކަންކަން. އިސްކޮޅުން ކުރަސް ޖޭމްސް އަކީ އަހަންނަށް އެންމެ ހާއްސަވި މީހަކީ. އަހަރެން ދެކެނީ އެއީ އަހަންނަށްޓަކައި އައި މީހެކޭ،" ކްލޯއީ ބުންޏެވެ.

އޭނާ ބުނީ ޖޭމްސްއާ އެކު ހަޔާތް ވަރަށް އުފާވެރި ކަމަށާއި ދިރިއުޅުމާ ދޭތެރޭ އަބަދު ވެސް ދެކެނީ ވަރަށް ޕޮޒިޓިވްކޮށް ކަމަށެވެ.

"ފޮތެއްގެ ބަނޑޭރިގަނޑުން އެއަށް އިންސާފެއް ނުކުރެވޭނެ. ހަމަ އެގޮތަށް މީހެއްގެ ބޭރު ފުށުން ފެންނަ ސިފައަކުން އެ މީހަކީ ކޮން ކަހަލަ މީހެއް ނޭނގޭނެ. އަހަންނަށް އެނގޭ ކަމަކީ ޖޭމްސް އަށް ވުރެ ވަކި ރަނގަޅު މީހަކު އަހަންނަށް ބައިވެރިއެއްގެ ގޮތުގައި ނުލިބޭނެކަން،" ކްލޯއީ ބުންޏެވެ.

ދެމަފިރިންގެ މިހާރު އަންހެން ދަރިޔަކު ވެސް އެބަހުއްޓެވެ. އެއީ ދެ އަހަރުގެ އޮލިވާ އެވެ. ދަރިފުޅު މިހާރު ފެންނަނީ ބައްޕައާ ދާދި އެއް އިސްކޮޅެއްގަ އެވެ.