ކޮތަރު ނަޖިހާ ހެދި ގަހެއް ކޮށާލި ގޮތުން ބޮޑު ސަމާލުކަމެއް

ގަހެއްގައި ކޮތަރު ހާލި ހަދައި ތަން ނަޖިސްކުރާ މައްސަލާގައި އިނގިރޭސިވިލާތުގެ ޝެފީލްގެ ދެ އަވަށްޓެރިއެއްގެ މެދުގައި މައްސަލަ ބޮޑުވެ އެތަނުން އެކަކު "މެދުން ފަޅާލައިފި" އެވެ. މީޑިއާގެ ސަމާލުކަން މިވަރުގެ ކަމަކަށް އައީ ގަސް ކޮށާލާފައި ހުރި ގޮތް ތަފާތުކަމުންނެވެ.

ގަސް މިހާރު ހުރީ ސީދާ ދެ ފަޅި ހަމަވާ ގޮތަށް، އެއް ފަޅި ކޮށާލައިފަ އެވެ. ފަތެއް ނެތީ ކޮތަރު ނަޖިހާ ހެދި ތަން ހަޑިވާތީ ޝަކުވާކުރާ މީހާގެ ގެޔާވީ ފަޅީގަ އެވެ.

ގަހުގެ ވެރިމީމާ ބާރަތު މިސްޓްރީ، 56، ބީބީސީ އަށް ބުނީ ފެތުރިގެން ނުދާ ގޮތަށް ރީއްޗަށް ހެދިފައި ހުރި ގަހުގައި ކޮތަރު ހާލި ހަދައި، ތަން ނަޖިސްކުރާ ކަމަށް ބުނެ އަވަށްޓެރިޔާގެ ފަރާތުން ތަކުރާރުކޮށް ޝަކުވާ ލިބެމުން ދިޔަ ކަމަށެވެ. މިދިޔަ މާޗް މަހުގެ ތެރޭގައި އެ ގަސް ކަނޑައިލަން ވެސް އަވަށްޓެރިޔާ އެދުނު ކަމަށް ބުންޏެވެ.

"އޭނަ ބުނަނީ ގަހުގައި ކޮތަރާއި އެހެން ދޫނިތައް ހާލި ހަދާތީ އެ އެއްޗެހީގެ ނަޖިހުން ގެ ކައިރީ ހަޑީވަނީއޭ. އެހެންވެ ގަސް ކަނޑައި ދޭން ފުރަތަމަ، އެދުނީ. ނަމަވެސް ގަސް ކަނޑާނުލައި އަދި އެއްކޮށް ކޮށާވެސް ނުލައި ހައްލެއް ހޯދާނެ ގޮތަކާ ބެހޭ ގޮތުން މަޝްވަރާ ވެސް ކުރެވިފައި އޮތީ،" ބާރަތު ބުންޏެވެ.

ނަމަވެސް އެކަމާ ގުޅިގެން ގޮތެއް ނުނިންމި އުޅެނިކޮށް އަވަށްޓެރިޔާ ބްރަޔަން ޕާކޭޒް ވަނީ ގަސް ކޮށަން ހާއްސަ މީހަކު ގެންގޮސް ގަހުގެ އޭނާގެ ގެއާ ދީމާލަށް ހުރި ބައި ކޮށާލައިފަ އެވެ. މިކަމާ ބާރަތު މިހާރު ހުރީ ވަރަށް ހިތްހަމަނުޖެހިފަ އެވެ.

"މި ގަހުގެ މައްސަލާގައި އަވަށްޓެރިޔާ އަބަދު ހުންނަނީ ރުޅިގަދަވެފައި،" އޭނާ ބުންޏެވެ. "ގަސް އެގޮތަށް ކޮށައިލީމާ ވަރަށް ދެރަވެއްޖެ. މިހާރު ކަންބޮޑުވަނީ ގަސް މަރުވެދާނެތީ."

ގަހުގެ މައްސަލާގައި ދެ އަވަށްޓެރިންގެ މެދުގައި މައްސަލަ ހޫނުވެފައިވާ އިރު، އެ ހިސާބުގައި އުޅޭ މީހުން މީޑިއާ އަށް ކިޔައިދީފައިވާ ގޮތުގައި ބާރަތު އާއި ބްރަޔަން އަކީ ކުރިން ގުޅުން ބަދަހި ދެ އަވަށްޓެރިންނެވެ. ނަމަވެސް ގަހުގެ މައްސަލާގައި ގުޅުން ވަރަށް ބޮޑަށް ހީނަރުވެ އަރައިރުވުންވެފައިވާ ކަމަށް ބުންޏެވެ.

"ބްރަޔަންގެ ޝަކުވާ ހަގީގަތުގައި ވަރަށް ކޫސަނި. އޭނަ ވެސް ގަބޫލުކުރަން ޖެހޭ އަހަރެމެން ގައުމަކީ ގިނަ އަދަދަކަށް ކޮތަރު އުޅޭ ތަނެއް ކަމާއި އެއަށް ވެސް އުޅެވޭނެ މާހައުލު އޮންނަން ވާނެ ކަމަށް،" އޭނާ ބުންޏެވެ.

ބައެއް މީޑިއާތަކުން ބުނީ އަޅައިގަންނަ ކަހަލަ ގޮތަކަށް ގަސް ކޮށާލީ ފަހުން އޭގެ ފޮޓޯތައް ސޯޝަލް މިޑިއާގައި ދައުރުވެ، އާންމުންގެ ސަމާލުކަން ލިބުމުން ގަސް ބަލައިލަން ޝެފީލްޑްގެ އެކި ހިސާބުތަކުން މީހުން އެތަނަށް ދާ ކަމަށެވެ.