ޕޮޒިޓިވިޓީ ރޭޓް 5 ޕަސެންޓަށް ވުރެ މަތީ 7 ރަށެއްގައި

ރާއްޖޭގެ ހަތް ރަށެއްގެ ކޮވިޑް ޕޮޒިޓިވިޓީ ރޭޓް ހުރީ ފަސް ޕަސެންޓަށް ވުރެ މަތީގައި ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިއުލާންކޮށްފި އެވެ.

ރޭ ނެރުނު އިއުލާނުގައި އެޗްޕީއޭ އިން ބުނެފައި ވަނީ މާލޭގެ އިތުރުން، ކ. ހުރާ އާއި ދިއްފުއްޓާއި ބ. މާޅޮހާއި ޅ. ނައިފަރާއި އދ. މާމިގިލި އަދި ތ. ވޭމަންދޫ ގައި މިވަގުތު ކޮވިޑް ޕޮޒިޓިވިޓީ ރޭޓް ހުރީ ފަސް ޕަސެންޓުން މަތީގައި ކަމަށެވެ. ދެ ވެކްސިން ފުރިހަމަ ކޮށްފައި ވިޔަސް މި ރަށްރަށަށް ދަތުރުކުރެވޭނީ ކޮވިޑްގެ ނެގެޓިވް ނަތީޖާއަކާ އެކު އެވެ.

ހަފްތާ އަކު އެއް ފަހަރު މި ލިސްޓް އެޗްޕީއޭ އިން ނެރޭނެ އެވެ.

ކޮވިޑް-19 އިން ރައްކާތެރިވާން ޖަހާ ވެކްސިންގެ ދެ ޑޯޒް ޖަހާ ފަހުން ދެ ހަފްތާ ފާއިތުވުމުން، ރަށެއްގެ އާބާދީގެ 60 ޕަސެންޓަށް ވެކްސިން ޖަހާފައިވާ ރަށްރަށަށް ކަރަންޓީން ވުމަކާ ނުލާ ދަތުރުކުރެވޭނެ އެވެ. ނަމަވެސް އަދި ގިނަ ރަށްރަށުގެ 60 ޕަސެންޓަށް ވެކްސިންގެ ދެ ޑޯޒް ޖަހާފައެއް ނުވެ އެވެ.

އެ ފަދަ ރަށްރަށާއި، އެ ރަށެއްގައި ފަސް ޕަސެންޓުން މަތީގެ ޕޮޒިޓިވިޓީ ރޭޓެއް ހުންނަ ރަށްރަށުން އެހެން ރަށްރަށަށް ދަތުރު ކުރެވޭނީ ޕީސީއާރް ޓެސްޓެއް ހެދުމަށް ފަހު އެވެ. ނެގެޓިވް ނަތީޖާއެއް ލިބުމުން އެ ރަށްރަށަށް ދަތުރުކުރާ އިރު ކަރަންޓީންވާކަށް ނުޖެހޭނެ އެވެ.

އެހެންވެ، އެ ހަތް ރަށުން އެހެން ރަށަކަށް ދަތުރުކުރެވޭނީ، އަދި އެ ހަތް ރަށަށް ދަތުރު ކުރެވޭނީ ވެސް ޕީސީއާރް ޓެސްޓެއް ހެދުމަށް ފަހު އެވެ.

ކޮވިޑް ފެތުރުން ހުއްޓުވުމަށްޓަކައި 11 ރަށަކުން އަރާފޭބުން މަނާކޮށްފައިވާ ކަމަށް ވެސް އެޗްޕީއޭ އިން ރޭ ނެރުނު އިއުލާނުގައި ވެ އެވެ.

އެޗްޕީއޭ އިން ނެރުނު އުސޫލުގައި، އާބާދީގެ 60 ޕަސެންޓަށް ވެކްސިންގެ ދެ ޑޯޒް ޖަހާފައިވާ ރަށްރަށް ވެސް އިއުލާންކުރަން ޖެހެ އެވެ. ނަމަވެސް އެ ލިސްޓެއް އެޗްޕީއޭ އަކުން އަދި އިއުލާނެއް ނުކުރެ އެވެ.

ރާއްޖޭގައި މިހާތަނަށް 26،505 މީހުންނަށް ކޮވިޑް ޖެހިފައިވާ އިރު މިވަގުތު މި ބައްޔަށް ފަރުވާ ހޯދަމުން ދަނީ 2،735 މީހުންނެވެ. އެޗްޕީއޭ އިން އިއްޔެ އާންމުކުރި ހިސާބުތަކުން ފެންނަ ގޮތުގައި 3،122 ސާމްޕަލް އިން 157 މީހުން ޕޮޒިޓިވްވެފައި ވެ އެވެ. މިހާތަނަށް 70 މީހަކު ކޮވިޑް ޖެހިގެން މަރުވެފައި ވެ އެވެ.