ޖޭޕީ އޮފީހުގެ ބޭރުގައި "ސާލިހު ޕާޓީ" އާއި "އެމްއެމްޕީ" ޖެހި މައްސަލަ ބަލަން އެދިއްޖެ

ރައްޔިތުންގެ މަޖިލީހުގެ އިދާރާގައި ހުންނަ ޖުމްހޫރީ ޕާޓީގެ އޮފީހުގެ ބޭރުގައި "ސާލިހު ޕާޓީ" އާއި "އެމްއެމްޕީ" ނުވަތަ މޯލްޑިވްސް މިލިޓަރީ ޕާޓީ ޖެހި ބައެއް ބަލައިދޭން ޖޭޕީން މަޖިލީހުގެ އިދާރާގައި އެދިއްޖެ އެވެ.

މަޖިލީހުގެ އިދާރާ އިން ކޮންމެ ސިޔާސީ ޕާޓީއަކަށް އޮފީހެއް ދޫކޮށްފައިވާއިރު، ފުރަތަމަ ބުރީގައި ހުންނަ ޖޭޕީގެ އޮފީހުގެ ބޭރުގައި މިއަދު މެންދުރެއްހާއިރު ވަނީ "ސާލިހު ޕާޓީ" އާއި "އެމްއެމްޕީ" ޖަހާފައިވާ ކަރުދާސްގަނޑެއް ތައްކޮށްފަ އެވެ.

ޖޭޕީ އޮފީހުގެ ބޯޑުގެ ތިރީގައި ތައްކޮށްފައިވާ އެ ލިޔުން މިއަދު މެންދުރެއްހާއިރު ފެނިފައިވާއިރު، "އެމްއެމްޕީ ނުވަތަ މޯލްޑިވްސް މިލިޓަރީ ޕާޓީ ނިސްބަތް ކޮށްފައި ވަނީ ދަނގެތި ދާއިރާގެ މެމްބަރު އަދި ސިފައިންގެ އޮފިސަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރެއްވި ކުރީގެ ޑިފެންސް މިނިސްޓަރު މުހައްމަދު ނާޒިމަށް ކަމަށް މެމްބަރަކު ވިދާޅުވި އެވެ.

"ސާލިހު ޕާޓީ" ނިސްބަތް ކޮށްފައި ވަނީ ރައީސް އިބްރާހިމް މުހައްމަދު ސޯލިހަށެވެ.

މިހާރު ޖޭޕީގައި ހުންނެވި ނާޒިމް މިހާރު ވަނީ ސިޔާސީ ޕާޓީއެއް އުފެއްދުމުގެ މަސައްކަތް ފައްޓަވައިފަ އެވެ. "އެމްއެމްޕީ" އޭނާ އަށް ނިސްބަތްކުރީ އެހެންވެ ކަމަށް ވެ އެވެ.

ކެންދޫ ދާއިރާގެ ޖޭޕީގެ މެމްބަރު އަލީ ހުސައިން "މިހާރު" އަށް މިރޭ ވިދާޅުވީ، އެ އޮފީހުގެ ބޭރުގައި ކަރުދާސްގަނޑު ތައްކުރި ބަޔަކު ހޯދަން މަޖިލީހުގެ އިދާރާގެ ސީސީޓީވީ ފުޓޭޖު ބަލައިދޭން އެ ޕާޓީން މަޖިލީހުގެ އަމީން އާންމުގެ އަރިހުގައި އެދިފައިވާ ކަމަށެވެ.

މި ސަރުކާރު ހިންގާ ކޯލިޝަންގެ އެއް ޕާޓީ ޖޭޕީގެ އޮފީހުގެ ބޭރުގައި "ސާލިހު" ޕާޓީ އާއި "އެމްއެމްޕީ" ޖެހިއިރު މަޖިލީހުގައި މިއަދު ވަނީ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ދެ ފެކްޝަންގެ އަރައިރުމާ ހެދި ޓެކްސް ގާނޫނުގެ އިސްލާހުތަކަށް ވޯޓަށް ނޭހި ފަސްކުރަން ޖެހިފަ އެވެ.

މަޖިލީހުގެ ގަވައިދު ބުނާ ގޮތުން ޓެކްސްއާ ގުޅޭ ބިލްތަކާއި ސީދާ ގޮތެއްގައި ރައްޔިތުން އަމަލުކުރަން ޖެހޭ ގާނޫނުތަކުގެ ބިލްތަކަށް ވޯޓަށް އެހޭނީ މަޖިލީހުގެ ޖުމުލަ މެމްބަރުންގެ ތެރެއިން ދެބައިކުޅަ އެއްބަޔަށް ވުރެ ގިނަ މެމްބަރުން ބައިވެރިވާ ޖަލްސާތަކުގަ އެވެ. މަޖިލީހުގެ ޖުމުލަމެމްބަރުންގެ އަދަދަކީ 87 ކަމަށް ވާތީ އެ އަދަދު ހަމަވާނީ 44 މެމްބަރުން ވޯޓު ގަޑީގައި ޖަލްސާގައި ތިއްބަވައިގެންނެވެ.

އެހެންވެ، އެ އަދަދަށް ވޯޓު ހަމަކުރުމުގައި އެމްޑީޕީގެ ދެ ފެކްޝަންގެ މެދުގައި އުފެދިފައިވާ ކޯޅުމުގެ ތެރެއިން ވޯޓަށް އެހި ގަޑީގައި މަޖިލީހުގެ ތަޅުމަށް ދެ ފަޅިން ވެސް މެމްބަރުން ވަޑައިނުގަތުމުން ޓެކްސް ގާނޫނުގެ އިސްލާހަށް ވޯޓަށް ނޭހުނީ އެވެ.

މިއީ، ސަރުކާރުން ރައްޔިތުންގެ މަޖިލީހަށް ހުށަހެޅި ކަމެއް، ރައީސް އިބްރާހިމް މުހައްމަދު ސޯލިހާއި ނަޝީދުގެ ފެކްޝަންގެ "އަރައިރުން" ގެ ސަބަބުން ވޯޓަށް ނޭހި ލަސްކުރި ފުރަތަމަ ފަހަރު ވެސް މެ އެވެ.