އަނިޔާ ލިބުނު ކުއްޖާއަށް އަޝްމަލީ އެނގޭތޯ ބަލަން ކޯޓަށް ހާޒިރުކޮށްފި

ސްރީ ލަންކާގައި އުމުރުން 15 އަހަރުގެ ކުއްޖަކު ލައްވާ ހަށިވިއްކުވުމާއި އަގު ދީގެން އެ ކުއްޖާގެ ބޭނުން ނަހަމަ ގޮތުގައި ހިފި ކަމުގެ ތުހުމަތުގައި ހައްޔަރުކޮށްފައިވާ މީހުންގެ ތެރޭގައި ހިމެނޭ، ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރު "އައިޑެންޓިފިކޭޝަން ޕެރޭޑް" އަކަށް މިއަދު އަލުން ކޯޓަށް ހާޒިރުކޮށްފި އެވެ.

އައިޑެންޓިފިކޭޝަން ޕެރޭޑަކީ ކުށުގެ ތުހުމަތުގައި ހައްޔަރުކޮށްފައިވާ މީހުންނަކީ އެކަމުގައި ހިމެނޭ މީހުންކަން ކަށަވަރު ކުރުމަށް، އަނިޔާ ލިބުނު މީހާ ނުވަތަ ހެކިންނަށް އެ މީހަކު ދެއްކުމެވެ.

ކުޑަކުއްޖާ ލައްވާ ހަށިވިއްކުވި މައްސަލާގައި ހިމެނޭ އެހެން ބައެއް މީހުން ވެސް އައިޑެންޓިފިކޭޝަނަށް މީގެ ކުރިން ވަނީ ކޯޓަށް ހާޒިރުކޮށްފަ އެވެ.

މިހާތަނަށް 40 އަށް ވުރެ ގިނަ މީހުން ހައްޔަރުކޮށްފައިވާ މި މައްސަލާގައި އަޝްމަލީ ހައްޔަރުކުރީ މި މަހުގެ ހަތަރު ވަނަ ދުވަހު އެވެ. އޭގެ ފަހުން އޭނާ ކޯޓަށް ހާޒިރުކޮށް މިއަދުގެ ނިޔަލަށް ބަންދުގައި ބަހައްޓަން ކޯޓުން ވަނީ ބަންދުގެ މުއްދަތު އިތުރުކޮށްދީފަ އެވެ.

ބެލެވޭ ގޮތުގައި މިއަދު އަޝްމަލީ އިތުރަށް ބަންދުގައި ބެހެއްޓުމާ މެދު ވެސް ގޮތެއް ނިންމާނެ އެވެ.

އަޝްމަލީގެ ބަންދު އިތުރުކުރި ދުވަހު އޭނާގެ ވަކީލް ކޯޓުގައި ވިދާޅުވެފައި ވަނީ އަޝްމަލީ ކުޑަ ކުއްޖާއާ ޖިންސީ އެއްވެސް މުއާމަލާތެއް ނުކުރާ ކަމަށާއި އަޝްމަލީ ފައިސާ ދެއްކީ "އޮއިލް މަސާޖް" އެއް ކުރަން ކަމަށެވެ. އަދި އޭރު އެއީ ކުޑަކުއްޖެއްކަން އަޝްމަލީ އަށް ނޭނގޭ ކަމަށް ވެސް ވިދާޅުވި އެވެ.

އަޝްމަލީ އޮންލައިންކޮށް އެކަމަށް 20،000 ރުޕީސް ދެއްކި ކަމަށްވެ އެވެ. އަދި އޭގެ ފަހުން ކުއްޖާއާ އެކު ހޮޓަލަށް ގޮސްފައިވާ ކަމަށް ވެސް ފުލުހުން ވަނީ ބުނެފަ އެވެ. އަޝްމަލީ ދިޔަ ހޮޓަލުގެ މެނޭޖަރު ވެސް ވަނީ ހައްޔަރުކޮށްފަ އެވެ.

ވެބްސައިޓްތަކާއި ސޯޝަލް މީޑިއާ ޕްލެޓްފޯމްތައް މެދުވެރިކޮށް ކުއްޖާ އިޝްތިހާރުކޮށް އެކި މީހުންނަށް ޖިންސީ ބޭނުމަށް ކުއްޖާ ވިއްކަމުން ގެންދާތާ ތިން މަސް ވެފައިވާ ކަމަށް ފުލުހުން ވަނީ ބުނެފަ އެވެ. މި މައްސަލާގައި މިހާތަނަށް ހައްޔަރުކޮށްފައިވާ މީހުންގެ ތެރޭގައި ކުއްޖާގެ މަންމަ ވެސް ހިމެނެ އެވެ. އަދި ލަންކާގެ ސިޔާސީ މީހަކާއި ފާދިރީއަކާއި ފުލުހަކު ވެސް ހިމެނެ އެވެ.