އެރިޔަދޫ ރިސޯޓް ވިއްކާލުމުގެ މަސައްކަތް މަޑުޖައްސާލަން އަމުރުކޮށްފި

އެރިޔަދޫ އައިލެންޑް ރިސޯޓް ވިއްކައިލުމުގެ މަސައްކަތް މަޑުޖައްސާލަން ސިވިލް ކޯޓުން އަމުރުކޮށްފި އެވެ.

ސްޓޭޓް ބޭންކް އޮފް އިންޑިއާ (އެސްބީއައި) އިން އެ ރިސޯޓް ވިއްކާލަން މިދިޔަ ހަފުތާގައި އިއުލާންކުރީ އެ ރިސޯޓް ރަހުނު ކުރުމަށް ފަހު ކްރިސްޓަލް ލެގޫން ރިސޯޓް ކުންފުނިން 2006 ވަނަ އަހަރާއި 2008 ވަނަ އަހަރު ނަގާފައިވާ ދެ ލޯނަކަށް ދައްކަންޖެހޭ 20 މިލިއަން ރުފިޔާ އާއި 2.8 މިލިއަން ޑޮލަރު (43 މިލިއަން ރުފިޔާ) ގެ މައްސަލައެއްގަ އެވެ. އެ ފައިސާ ނުދައްކައިފި ނަމަ، އެރިޔަދޫ ވިއްކާލުމުގެ ހުއްދަ ސިވިލް ކޯޓުން 2015 ގައި އޮތީ އެސްބީއައިއަށް ދީފަ އެވެ.

އެސްބީއައި އިން މިދިޔަ ހަފުތާގައި އިއުލާންކުރީ އެރިޔަދޫ އައިލެންޑް ރިސޯޓް ނީލަމުގެ އުސޫލުން ވިއްކައިލުމަށެވެ. އެ އިއުލާނުގައިވާ ގޮތުން ނީލަން ފެށޭ އަގަކީ 28 މިލިއަން ޑޮލަރު (431 މިލިއަން ރުފިޔާ) އެވެ.

އެ ރިސޯޓް ވިއްކާލުން މަޑުޖައްސާލަން ސިވިލް ކޯޓުން ވަގުތީ އަމުރެއް އިއްޔެ ނެރުނީ އެ ލޯނަށް ގެރެންޓީ ދިން ފަރާތްތަކުގެ ތެރޭގައި ހިމެނޭ ޕްލެޓިނަމް ކެޕިޓަލް ހޯލްޑިންގްސް ކުންފުނިން ކޯޓަށް ހުށަހެޅި މައްސަލައަކާ ގުޅިގެންނެވެ.

ސިވިލް ކޯޓުން އިއްޔެ ނެރުނު ވަގުތީ އަމުރުގައި ވަނީ ވަގުތީ އަމުރުތައް ނެރުމުގައި ފުރިހަމަވާން ޖެހޭ ކަންކަން އެ މައްސަލާގައި ފުރިހަމަވާ ކަމަށާއި އެހެންވެ، އެ މައްސަލަ ކޯޓުން ނިމެންދެން ނުވަތަ އެހެން ގޮތަކަށް އަންގަންދެން، އެރިޔަދޫ ރިސޯޓް ވިއްކާލަން ކުރި އިއުލާނަށް އަމަލުކުރުން ފަސްކުރަން އަންގާ ކަމަށެވެ.

ޕްލެޓިނަމް ކުންފުނިން މައްސަލަ ހުށަހެޅީ އެ ރިސޯޓް ވިއްކޭނީ ރަހުނު ކޮށްފައިވާ މުދާ ވިއްކުމާ ބެހޭގޮތުން ހައި ކޯޓުން ކުރިން ކަނޑައަޅާފައިވާ އުސޫލުތަކާ އެއްގޮތަށް ކަމަށް ކަނޑައަޅައި ދިނުމަށެވެ. އަދި އެ މައްސަލަ ނިމެންދެން އެރިޔަދޫ ވިއްކާލުމުގެ މަސައްކަތް މަޑުޖައްސާލަން އެ ކުންފުނިން އެދިފައިވެ އެވެ.