ޝިލްޕާއަށް ދިމާވި ގޮތުން ފިލްމަށް ދެރައެއް ނުދޭން އެދެފި

ހުކުރު ދުވަހު ޑިޒްނީ ޕްލަސް ހޮޓްސްޓާ އިން ޕްރީމިއާކުރި ފިލްމު "ހަންގާމާ 2" ވީހާ ވެސް ގިނަ ބަޔަކު ބަލަން އެދޭ ކަމަށާއި އެއީ ބެލުންތެރިންނަށް އުފާވެރިންކަން ގެނެސްދޭނެ ފިލްމެއް ކަމަށް ބަތަލާ ޝިޕްލާ ޝެޓީ ބުނެފި އެވެ.

ޕްރިޔަދަރުޝަން ޑައިރެކްޓްކުރި އެ ފިލްމަކީ އެކްޓިންއާ ދުރުގައި ހުންނަތާ 14 އަހަރު ފަހުން ޝިލްޕާ ފެންނަ ފުރަތަމަ ފިލްމެވެ. "ހަންގާމާ 2" ރިލީޒްކުރަން ޖެހުނު ވަގުތަކީ، ޝިލްޕާގެ ފިރިމީހާ ރާޖް ކުންދުރާ ބަރަހަނާ ފިލްމު ހަދައިގެން އާމްދަނީ ހޯދަމުން ދިޔަ މައްސަލަ ފަޅާއަރައި އޭނާ ހައްޔަރުކޮށް، މައްސަލައިގެ ދިލަގަނޑު ހޫނުވެފައި އޮތް ވަގުތެވެ.

ޝިލްޕާ ކުރި ޓްވީޓްތަކެއްގައި އޭނާ އަށް ދިމާވި ކަންތައްތަކަށް އިޝާރާތްކޮށް ބުނީ އެކަމުގެ ނޭދެވޭ އަސަރު ފިލްމަށް ކުރަން ބޭނުން ނުވާ ކަމަށެވެ.

"މިއީ ވަރަށް ގިނަ ބަޔަކު ގުޅިގެން ބުރަ މަސައްކަތުން ހަދާފައި އޮތް ވަރަށް ރަނގަޅު ފިލްމެއް. އެހެންވެ ފިލްމަށް އެއްވެސް ދެރައެއް ލިބުން ހައްގެއް ނޫން،" އޭނާ ބުންޏެވެ.

"ހަންގާމާ 2" އަކީ ޕްރިޔަދަރުޝަން 2003 ގައި ގެނެސްދިން ކާމިޔާބު ކޮމެޑީ "ހަންގާމާ" ގެ ދެވަނަ ބައިގެ ގޮތުގައި ގެނެސްދިން ފިލްމެކެވެ. އާ ފިލްމުގެ ކާސްޓުންނަކީ ކުރީ ފިލްމުގައި ވެސް މުހިއްމު ރޯލެއް ކުޅުނު ޕަރޭޝް ރާވަލްގެ އިތުރުން ޝިލްޕާ އާއި މީޒާން ޖެފްރީ އަދި ޕްރަނީތާ ސުބާޝް އެވެ.

މަޝްހޫރު ފިލްމު ކްރިޓިކް ތަރަން އަދާޝްގެ ރިވިއުގައި ބުނީ "ހަންގާމާ 2" އަކީ ކުރީގެ ފިލްމުހާ މަޖާ ފިލްމެއް ނޫން ކަމަށެވެ. އޭނާ ބުނި ގޮތުގައި މީގެ އެންމެ ބޮޑު މައްސަލަ އަކީ ޝައުގުވެރި ޕްލޮޓެއް އޮތް ނަމަވެސް ސްކްރީންޕްލޭ އޮތް ގޮތުން ފިލްމުގެ ވާހަކަ އަށް އެންމެ ރަނގަޅަށް އިންސާފުކޮށް ނުދެވުން ކަމަށެވެ. އަދި ފިލްމުގައި ހަމަނުޖެހޭ ކަންތައް ވެސް ވަރަށް ގިނަ ކަމަށާއި "ހަންގާމާ 2" އަކީ އޭގެ ދިގުމިނާ ހެދި ވެސް ފޫހިކަން އަންނަ އަދި އުންމީދުކުރި ވަރުގެ ފިލްމެއް ނޫން ކަމަށް ބުންޏެވެ.

ނަމަވެސް ފިލްމުގެ ހުރިހާ ތަރިންގެ އެކްޓިން ވެސް ރަނގަޅު ކަމަށާއި އެހާ ދުވަސްކޮށްފައި ފިލްމެއް ކުޅުނަސް ޝިލްޕާގެ ފަރާތުން އަދިވެސް އެކްޓް ކުރެވިދާނެކަން ފެނުނު ކަމަށް ތަރަން ބުންޏެވެ.

ތަރަން ފިލްމަށް ދީފައި ވަނީ ފަހަކުން ދެ ތަރީގެ ރޭޓިންއެކެވެ.