ބެލެނިވެރިން ހިތްހަމަނުޖެހި ހިރިމަރަދޫ އެއްވެސް ކުއްޖަކު ސްކޫލަކަށް ނުފޮނުވާ

ދިރާސީ އާ އަހަރުގެ ކިޔެވުން މިއަދު ފެށިއިރު، ހދ. ހިރިމަރަދޫ ސްކޫލްގެ ބެލެނިވެރިން އެދެމުން އަންނަ ގިނަ ކަންތައްތަކެއް އެ ސްކޫލުން ފުރިހަމަކޮށްދީފައި ނުވާ ކަމަށް ބުނެ އެއްވެސް ދަރިވަރަކު މިއަދު ސްކޫލަށް ނުފޮނުވާ ކަމަށް ރަށު ކައުންސިލުން ބުނެފި އެވެ.

ހިރިމަރަދޫ ކައުންސިލްގެ ރައީސް މުހައްމަދު ވަހީދު ވިދާޅުވީ ބެލެނިވެރިން ދަރިވަރުން ސްކޫލަށް ނުފޮނުވި އެންމެ ބޮޑު ސަބަބެއް ކަމަށް ބުނަނީ އެ ސްކޫލްގައި ކިޔަވައިދޭ ގިނަ ދުވަސްވީ ޓީޗަރުންގެ ފަރާތުން ރަނގަޅު ނަތީޖާއެއް މިހާތަނަށް ނެރެދެވިފައި ނުވާތީ، އެކަން ހައްލުކުރަން މިހާތަނަށް ސަރުކާރުން އެއްވެސް މަސައްކަތެއް ކޮށްފައި ނެތުމެވެ.

ގުރޭޑް 10 އާ ހަމަ އަށް ކިޔަވައިދެމުން އަންނަ އެ ސްކޫލްގައި 8-12 އަހަރުވީ ޓީޗަރުން ތިބިއިރު، ގިނައީ ބިދޭސީ ޓީޗަރުންނެވެ. މި ޓީޗަރުން ބަދަލުކޮށްދޭން ބެލެނިވެރިން އެދުމުން އަންނަތާ މިހާރު ވަރަށް ގިނަ ދުވަސް ވެއްޖެ ކަމަށް މުހައްމަދު ވިދާޅުވި އެވެ.

މިހާރު 64 ދަރިވަރުން ކިޔަވަމުން އަންނަ، އެ ސްކޫލްގެ ބެލެނިވެރިންގެ ހުރި އިތުރު ކަންބޮޑުވުންތަކުގެ ތެރޭގައި ސްކޫލް އަލުން ހުޅުވަން އެއްވެސް ވަރަކަށް ތައްޔާރުވެފައި ނުވުމާއި ސްކޫލް އިމާރާތުގެ އާބާތުރަ ފިލުވަން ވެސް އެއްވެސް ކަމެއް ކޮށްފައި ނުވުމުގެ އިތުރުން ދަރިވަރުންނަށް ބޭނުންވާ ފޮތްތައް ހަމަނުވުން ވެސް ހިމެނެ އެވެ.

އެ ސްކޫލުގެ ޕްރިންސިޕަލަކަށް މީގެ ތިން މަސް ކުރިން ވަނީ އިންޑިއާ މީހަކު ހަމަޖައްސައިފަ އެވެ. އެ ޕްރިންސިޕަލް ވެސް ސްކޫލްގައި ހުރި މައްސަލަތައް ހައްލުކުރަން އުޅުއްވާތަން ނުފެންނަ ކަމުގެ ޝަކުވާ ބެލެނިވެރިން ކުރާ ކަމަށް މުހައްމަދު ވިދާޅުވި އެވެ.

މިއަދު އެ ސްކޫލަށް އެއްވެސް ދަރިވަރަކު ހާޒިރުވެފައި ނުވާތީ، އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އަހްމަދު މުޖާހިދު ވަނީ އެ ރަށަށް ވަޑައިގެން ރަށު ކައުންސިލާ ބައްދަލުކުރައްވައިފަ އެވެ.

"ޑެޕިއުޓި މިނިސްޓަރު ވިދާޅުވީ މި ރަށު ސްކޫލުގައި މިފަދަ މައްސަލަތަކެއް ހުރި ކަމުގެ އަޕްޑޭޓެއް ލިބިވަޑައިގެންފައި ނުވާ ކަމަށާއި މިއީ ވަރަށް ދެރަ މައްސަލައެއް ކަމަށް. އަދި މިކަން ހައްލުކުރުމަށް އަވަސް ފިޔަވަޅުތަކެއް އަޅުއްވާނެ ކަމަށް،" މުހައްމަދު ވިދާޅުވި އެވެ.

ކޮވިޑް ކޮންޓްރޯލްކުރުމަށް އެޅި ފިޔަވަޅުތަކާ އެކު ދޮޅު އަހަރުގެ މެދުކެނޑުމަކަށް ފަހު، ހުރިހާ ދަރިވަރުން ސްކޫލަށް ހާޒިރުކޮށްގެން ކިޔަވައިދޭން މިއަދު ވަނީ ފަށައިފަ އެވެ. އަދި އެހެން ދިރާސީ އަހަރުތަކާ ހިލާފަށް، ނިޒާމީ ބަދަލަކާ އެކު މިފަހަރު ކިޔެވުން ފެށީ އަހަރުގެ މެދުތެރެއިންނެވެ.