ގަލްފް އެއާ ކޮންމެ ދުވަހަކު ރާއްޖެ އަށް

ބަހުރެއިންގެ ގައުމީ އެއާލައިން ގަލްފް އެއާ އިން ކޮންމެ ދުވަހަކު ރާއްޖެ އަށް ދަތުރެއް ބާއްވަން ނިންމައިފި އެވެ.

އެ އެއާލައިނުން ނެރުނު ބަޔާނެއްގައި ބުނީ، ކޮވިޑް-19ގެ ހާލަތުގައި އެ އެއާލައިނުން ދަތުރުކުރާ މީހުންގެ މެދުގައި މަގުބޫލު މަންޒިލަކަށް ރާއްޖެ ވެފައި ވާތީ، މާދަމާ އިން ފެށިގެން ޔޫރަޕާއި ގަލްފުގެ ގައުމުތަކާއި ބަހުރެއިނުން ރާއްޖެ އަށް ކޮންމެ ދުވަހަކު ދަތުރުތައް ބާއްވާނެ ކަމަށެވެ.

ގަލްފް އެއާގެ އެކްޓިން ސީއީއޯ ކެޕްޓަން ވަލީދު އަލްއަލާވީ ވިދާޅުވީ ރާއްޖެ އަށް ކުރާ ދަތުރުތައް އިތުރު ކުރަން ނިންމީ ޑިމާންޑު ބޮޑުވެގެން ކަމަށެވެ. އަދި މި ބަދަލުގެ ސަބަބުން އެ އެއާލައިނުން ދަތުރުކުރާ ފަސިންޖަރުންނަށް ހަފުތާގެ ކޮންމެ ދުވަހަކު ދަތުރު ކުރުމުގެ ފުރުސަތު ފަހިވާނެ ކަމަށް އޭނާ ވިދާޅުވި އެވެ.

ކޮވިޑް-19ގެ ސަބަބުން ގަލްފް އެއާގެ ދަތުރުތައް މެދުކަނޑައިލުމަށް ފަހު، އަލުން ފެށީ މިދިޔަ އަހަރުގެ ޑިސެމްބަރު މަހު އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މި އަހަރުގެ މިހާތަނަށް ގަލްފް އެއާއިން ވަނީ ރާއްޖެ އަށް 252 ދަތުރުކޮށްފަ އެވެ. މި ދަތުރުތަކުގައި 3،549 ޓޫރިސްޓުން ވަނީ އެ އެއާލައިނުން ރާއްޖެ އައިސްފަ އެވެ.