ތ. އަތޮޅުން 500 އަށް ވުރެ ގިނަ މީހުން އެމްއެންޕީއާ ގުޅިއްޖެ

އުފައްދަން މަސައްކަތްކުރާ މޯލްޑިވްސް ނޭޝަނަލް ޕާޓީ (އެމްއެންޕީ) އާ ތ. އަތޮޅުން 500 އަށް ވުރެ ގިނަ މީހުން ގުޅިއްޖެ އެވެ.

ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ އުފައްދަން މަސައްކަތް ކުރައްވާ އެމްއެންޕީއާ ތ. އަތޮޅުން ގިނަ ބަޔަކު ގުޅުނު އިރު، އެއީ އޭނާއާއެކު ސިޔާސީ ކަންކަމުގައި މަސައްކަތް ކުރައްވާ އަބްދުﷲ ރިޔާޒްގެ ދާއިރާ ހިމެނޭ އަތޮޅެކެވެ. ތިމަރަފުށި ދާއިރާގެ މެމްބަރު އަދި އެމްއެންޕީގެ ފައުންޑިން މެމްބަރު ރިޔާޒް ވަނީ މިދިޔަ ހަފުތާގައި ތ. އަތޮޅަށް ވަޑައިގެން އެ ޕާޓީ އަށް މީހުން ހޯދުމުގެ ކެމްޕެއިނެއް ކުރައްވައިފަ އެވެ.

އެމްއެންޕީން މިއަދު ބުނީ، އެ ޕާޓީ އަށް ސޮއިކުރި މީހުންގެ ތެރޭގައި ހިރިލަންދޫ ކައުންސިލްގެ ރައީސް މުހައްމަދު ޖަލާލާއި އެ ކައުންސިލް މެންބަރު އަލީ އައްސަދު ހިމެނޭ ކަމަށެވެ. އޭގެ އިތުރުން ތ. އަތޮޅު ކައުންސިލްގެ ކުރީގެ ނައިބު ރައީސް ހުސައިން އަހުމަދު ވެސް އެމްއެންޕީ އަށް ސޮއިކުރެއްވި ކަމަށް އެ ޕާޓީން ބުންޏެވެ.

ތ. އަތޮޅުން އެމްއެންޕީއާ ގުޅުނު 500 މީހުންގެ ފޯމު ނާޒިމްއާ މިއަދު ހަވާލު ކޮށްފައިވާއިރު، ރިޔާޒް ވިދާޅުވީ އެ އަތޮޅުގެ 11 ރަށަކަށް ވަޑައިގެން އެމްއެންޕީގެ މައުލޫމާތު ހިއްސާ ކުރައްވާފައިވާ ކަމަށެވެ. އަދި އެ ރަށްރަށުގައި އެ ޕާޓީގެ ފޯކަލް ޕޮއިންޓުން ވެސް މިހާރު ތިބޭނެ ކަމަށް ރިޔާޒް ވިދާޅުވި އެވެ.

އެމްއެންޕީގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން ދީފައި ވަނީ މިދިޔަ މަހު 15 ގަ އެވެ. އެ ޕާޓީ ވުޖޫދުވުމާއެކު ވެގެން ދާނީ ރައްޔިތުންގެ މަޖިލީހުގައި ތިން ވަނަ އަށް އެންމެ މެންބަރުން ގިނަ ޕާޓީ އަށެވެ.

އިލެކްޝަންސް ކޮމިޝަންގެ ދަފްތަރުގައި އެމްއެންޕީ ރަޖިސްޓަރީ ކުރުމަށްޓަކައި މިހާރު އެންމެ ބާރަށް ކުރިއަށް ގެންދަނީ މެމްބަރުން ހޯދުމުގެ ކަންކަމެވެ.