އީސީ އާއި އިންފޮމޭޝަން ކޮމިޝަނަށް އައްޔަންކުރާ ނަންތައް ކޮމިޓީއަށް

އިލެކްޝަންސް ކޮމިޝަން (އީސީ) އާއި އިންފޮމޭޝަން ކޮމިޝަނަރުގެ މަގާމަށް އައްޔަން ކުރަން ފެންނަ ނަންތައް ރައީސް އޮފީހުން ރައްޔިތުންގެ މަޖިލީހަށް ހުށަހަޅައިފި އެވެ.

އީސީއަށް މެންބަރެއް އައްޔަން ކުރުމަށް ފޮނުވާފައި ވަނީ އެ ކޮމިޝަންގެ ރައީސްގެ މަގާމުގައި ހުންނެވި އަހުމަދު ޝަރީފް އިސްތިއުފާ ދެއްވުމާ ގުޅިގެންނެވެ. އަދި އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަން ކުރަނީ އެ މަގާމަށް މި ސަރުކާރުން ފުރަތަމަ އައްޔަން ކުރި ހުސައިން ފިޔާޒު މޫސާ މި އަހަރުގެ މާޗު 21 ގައި އިސްތިއުފާ ދެއްވުމުންނެވެ.

މަޖިލީހުގެ ތިން ވަނަ ދައުރުގެ ފުރަތަމަ ޖަލްސާ މިއަދު ފެށިއިރު އެންމެ ފުރަތަމަ ވެސް ރިޔާސަތުން ހުށަހެޅުއްވީ މި ދެ މަގާމަށް އައްޔަން ކުރަން ފެންނަ ކަމަށް ރައީސުލްޖުމްހޫރިއްޔާ ފޮނުވާފައިވާ ނަންތައް ދިރާސާ ކުރުމުގެ މައްސަލަ އެވެ.

އިންފޮމޭޝަން ކޮމިޝަނަރުގެ މަގާމަށް ކުރިމަތިލާފައިވާ ފަރާތްތަކުގެ ތެރެއިން ރައީސް މަޖިލީހަށް ފޮނުވާފައި ވަނީ ހަތަރު ބޭފުޅެއްގެ ނަމެވެ. އެއީ ޝިހާމް މުހައްމަދު ވަހީދު، ދަފްތަރު ރސ. 5143 އާއި އަހުމަދު އާހިދު ރަޝީދު، ހ. ގުރުވަ އާއި އަޒްލީމާ އަހުމަދު، ދަފްތަރު ރސ. 341-94 އަދި މަރިޔަމް އަލީމް، ގ. ދާސްތާނާ އެވެ.

އީސީއަށް ކުރިމަތިލެއްވި ފަސް ބޭފުޅެއްގެ ނަން ދިރާސާ ކުރުމަށް ރައީސް ވަނީ ފޮނުވައިފަ އެވެ. އެއީ މުހައްމަދު އާސިފް، ހ. އިރުވައި އާއި ޝަހުލާ އިސްމާއިލް، ފިނިއުނިމާގެ ޅ. ހިންނަވަރު އާއި އަހުމަދު މަންސީރު، ވ. ރިވެތި އާއި މަރިޔަމް ހަނީފާ ހާލިދު، އަނބުގަސްދޮށުގެ ހއ. ކެލާ އަދި އަޒްލީމާ އަހުމަދު، ދަފްތަރު ނަމްބަރު ރސ. 341-94 އެވެ.

މި ހުރިހާ ބޭފުޅުންގެ ނަންތައް ދިރާސާ ކުރުމަށް ރައްޔިތުން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ފޮނުވަން ރިޔާސަތުން ނިންމި އެވެ.

އިންފޮމޭޝަން ކޮމިޝަނަރުގެ މަގާމަށް އައްޔަން ކުރުމަށް މީގެ ކުރިން ވެސް ތިން ނަމެއް މިނިވަން މުއައްސަސާތަކާ ބެހޭ ކޮމިޓީއަށް ފޮނުވި ނަމަވެސް އެއްވެސް ބޭފުޅަކަށް ރުހުން ނުލިބުނެވެ.