ތާލިބާނުންނާ ވާހަކަ ދައްކަން އީޔޫ އިން ގޮވާލައިފި

އަފްގާނިސްތާނުގައި އޮތް ސަރުކާރު ވައްޓާލައި، ތާލިބާން ޖަމާއަތުގެ ހަނގުރާމަވެރިން އެ ގައުމު ހިފާފައިވާތީ، ތާލިބާނުންނާ އެކުގައި ވާހަކަތައް ފެށުމަށް، ވިލާތުގެ އިއްތިހާދުން ގޮވާލައިފި އެވެ.

ވިލާތުގެ އިއްތިހާދުގެ ހާރިޖީ ވަޒީރުން އިއްޔެ ބޭއްވި ކުއްލި ބައްދަލުވުމަށް ފަހު، އެ އިއްތިހާދުގެ ހާރިޖީ ސިޔާސަތުގެ ވެރިޔާ ޖޯސެފް ބޮރެލް ވިދާޅުވީ ތާލިބާނުން އަފްގާނިސްތާނު ހިފުމާ ގުޅިގެން، ބައިނަލްއަގުވާމީ މުޖްތަމައުން އެ ޖަމާއަތާ އެކު ވާހަކަ ދައްކަންޖެހޭ ކަމަށެވެ.

"ތާލިބާނުން އެވަނީ ހަނގުރާމަ ކާމިޔާބު ކޮށްފަ. އެހެންވީމާ، އަހަރެމެން އެމީހުންނާ ވާހަކަ ދައްކަން އެބަޖެހޭ،" ބޮރެލް ވިދާޅުވި އެވެ.

އޭނާ ވިދާޅުވީ މިހާރު އަފްގާނިސްތާނުގައި ކަންތައް ހިނގަމުންދާ ގޮތާ ބެހޭ ގޮތުން، އަދި އަފްގާނިސްތާނުގެ އާންމު ރައްޔިތުންގެ ހާލަތާ ބެހޭ ގޮތުން ތާލިބާނުންނާ އެކުގައި ވާހަކަ ދެއްކުމަކީ، ރަސްމީކޮށް ތާލިބާން ޖަމާއަތުގެ ވެރިކަން ގަބޫލުކުރުން ނޫން ކަމަށެވެ.

ބޮރެލް ވިދާޅުވި ގޮތުގައި ތާލިބާނުންގެ ވެރިކަމެއް އަފްގާނިސްތާނުގައި ފެށުމުން، އެ ގައުމުގެ ގިނަ ބަޔަކު ގައުމު ދޫކޮށް ދާން އުޅޭ ހާލަތެއްގައި، އިންސާނީ އެހީތެރިކަން ފޯރުވައިދިނުމާއި ހިޖްރަ ކުރުމުގެ މައްސަލަތަކެއް އުފެދުނަ ނުދިނުމަށްޓަކައި، ބްރަސެލްސް އިން ވަރަށް އަވަހަށް ތާލިބާނުންނާ އެކު މަޝްވަރާތައް ފަށާނެ އެވެ.

"އަހަރެމެން މި ފަށަން ގަސްދުކުރާ މަޝްވަރާތަކުގައި، ބިދޭސީ ޓެރަރިސްޓުން އަލުން އެނބުރި އަފްގާނިސްތާނަށް އަތުވެދާނެ ކަމަށް ބެލެވޭ މައްސަލަ ވެސް ހިމެނޭނެ. މިއީ ރަސްމީކޮށް ތާލިބާނުންގެ ވެރިކަން ބަލައިގަތުމެއް ނޫން، މިއީ ތާލިބާނުންނާ އެކުގައި މުއާމަލާތު ކުރުން." ބޮރެލް ވިދާޅުވި އެވެ.

"ޔޫރަޕްގެ ވަފުދުތަކުގެ މެމްބަރުންނާ އެކުގައި މަސައްކަތް ކުރި އަފްގާނިސްތާނު މީހުންނާއި އެމީހުންގެ އާއިލާތަކުގެ 400 ވަރަކަށް މީހުން، އެ ގައުމުން ބޭރަށް ދިއުމަށްޓަކައި ކާބުލްގެ ވައިގެ ބަނދަރަށް ދާން ބޭނުންވެއްޖެ ނަމަ، ތާލިބާންގެ އިސް ފަރާތްތަކާ އެކު އަހަރެމެން ވާހަކަ ދައްކަންޖެހޭނެ ކަން އެންމެން ވެސް ގަބޫލުކުރާނެ. އެނޫން ގޮތަކަށް އެމީހުން ވައިގެ ބަނދަރަށް ދިއުން ވަރަށް ދަތިވާނެ."

ބޮރެލް މި މޭރުމުން ވާހަކަ ދެއްކެވި އިރު، ވިލާތުގެ ބައެއް ގައުމުތަކުން ވަނީ، ތާލިބާނުންނާ އެކުގައި އެއްވެސް ގައުމަކުން އެކަހެރި ގޮތެއްގައި ވާހަކަ ނުދެއްކުމަށް ގޮވާލައިފަ އެވެ. އަދި ވިލާތުގެ ގައުމުތަކުގެ މެދުގައި އެއްބަސްވެވޭ ގޮތެއްގެ މަތިން މެނުވީ، ތާލިބާނުންގެ ވެރިކަން ގަބޫލު ނުކުރުމަށް ވެސް ގައުމުތަކުން ވަނީ ގޮވާލައިފަ އެވެ.

ޖަރުމަންގެ މުސްރަޝާރު އެންޖެލާ މާކެލް އިއްޔެ ވިދާޅުވީ އަފްގާނިސްތާނުގައި ނުރައްކަލަށް ހުށަހެޅިފައި ތިބި މީހުން އެ ގައުމުން ބޭރަށް ގެންދިއުމަށްޓަކައި މަސައްކަތް ކުރަންޖެހޭނީ، ވިލާތުގެ ހުރިހާ ގައުމުތައް ގުޅިގެން، ވަރަށް ފަރުވާތެރިކަމާ އެކުގައި ކަމަށެވެ. އަދި އަފްގާނިސްތާނު ދޫކޮށް ނުކުންނަން ބޭނުންވާ މީހުންނަށް އެންމެ ފުރަތަމަ އެހީތެރިވާންވީ، އދ.ގެ ރެފިއުޖީންނާ ބެހޭ އިދާރާގެ ބެލުމުގެ ދަށުން، އަވައްޓެރި ގައުމުތަކުން ކަމަށް ވެސް އޭނާ ވިދާޅުވި އެވެ.

"އޭގެ ފަހުގައި ދެ ވަނަ މަރުހަލާގެ ކަމެއްގެ ގޮތުގައި، އެންމެ ބޮޑަށް އަސަރުކޮށްފައިވާ މީހުން ޔޫރަޕަށް ގެނައުމާ ބެހޭ ގޮތުން އަހަރެމެންނަށް ވިސްނިދާނެ،" އެންޖެލާ މާކެލް ވިދާޅުވި އެވެ.