އީޔޫ އިން ގެސްޓް ހައުސްތަކާއި ސަފާރީ އިންޑަސްޓްރީ އަށް ދެ މިލިއަން ޔޫރޯ ދެނީ

ރާއްޖޭގެ ގެސްޓް ހައުސްތަކާއި ސަފާރީތަކުގެ އިންޑަސްޓްރީ ކުރިއަރުވަން ޔޫރަޕިއަން ޔޫނިއަން (އީޔޫ) އިން ދެ މިލިއަން ޔޫރޯ (35 މިލިއަން ރުފިޔާ) ގެ ހިލޭ އެހީއެއް ދޭން އިއްޔެ އެއްބަސްވެއްޖެ އެވެ.

ރާއްޖޭގެ ޓޫރިޒަމް ދާއިރާގެ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް އެހީވުމަށް ރާއްޖެއާއެކު ވި އެއްބަސްވުމުގައި އީޔޫގެ ފަރާތުން ސޮއިކުރެއްވީ އެ އިއްތިހާދުން ރާއްޖެއަށް ކަނޑައަޅާފައި ހުންނަވާ ސަފީރު ޑެނިސް އެވެ. މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އިން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހަސަން މަނިކެވެ. މި ރަސްމިއްޔާތުގައި އިކޮނޮމިކް މިނިސްޓަރު ފައްޔާޒު އިސްމާއިލާއި ޓޫރިޒަމް މިނިސްޓަރު ޑރ. އަބްދުﷲ މައުސޫމް ވެސް ބައިވެރިވެވަޑައިގަތެވެ.

މިއީ ކޮވިޑް-19ގެ ސަބަބުން ޓޫރިޒަމް ދާއިރާގެ ކުދި އަދި މެދު ފަންތީގެ ވިޔަފާރިތަކަށް ލިބުނު ގެއްލުމުން އަރައިގަނެ، އެ ވިޔަފާރިތައް ފުޅާކުރުމަށް އެހީވުމުގެ ގޮތުން ސޮއިކުރި އެއްބަސްވުމެކެވެ. މި އެއްބަސްވުމުގެ ދަށުން ޑައިރެކްޓް ޓްރާންސްފާގެ ގޮތުގައި 1.4 މިލިއަން ޔޫރޯ (25.2 މިލިއަން ރުފިޔާ)ގެ އެހީ ދޭއިރު ފަންނީ އެހީތެރިކަމަށް 600،000 ޔޫރޯ (10 މިލިއަން ރުފިޔާ) ދޭނެ ކަމަށް އެމްއެފްއެމްސީން ބުންޏެވެ.

ފަންނީ ގޮތުން ދޭ އެހީއަކީ ވިޔަފާރިތައް ހިންގުމާއި ފައިނޭންސް މެނޭޖު ކުރުމާއި ދެމެހެއްޓެނިވި ގޮތެއްގައި ކުނި މެނޭޖު ކުރުމާއި ބައިނަލްއަގްވާމީ މާކެޓަށް ވަނުމަށް ބޭނުންވާ ތަމްރީނު ދިނުމަށް ކަމަށް އިކޮނޮމިކް މިނިސްޓްރީން ބުންޏެވެ. މި އެހީގެ ދަށުން ފަރުމާ ކުރާ އޮންލައިން ޓްރެވަލް އެޖެންސީގެ ޒަރީއާ އިން ގެސްޓް ހައުސްތަކާއި ސަފާރީތައް އިޝްތިހާރު ކުރާނެ ކަމަށް ވެސް އެ މިނިސްޓްރީން ބުންޏެވެ.

ޓޫރިޒަމް ދާއިރާގައި ކުދި އަދި މެދު ފަންތީގެ ވިޔަފާރިތަކުގެ ތެރެއިން މި ފަންޑުގެ ދަށުން އެހީފޯރުކޮށްދިނުމުގައި އިސްކަން ދޭނީ 40 އެނދަށް ވުރެ މަދުން ހުންނަ ސަފާރީ އާއި ގެސްޓް ހައުސްތަކަށެވެ. އެހެންކަމުން މި ކެޓަގަރީއަށް ފެތޭ 600 އެއްހާ ވިޔަފާރިއަށް އެހީތެރިކަން ފޯރުކޮށްދެވޭނެ ކަމަށް އީޔޫ އިން ވަނީ ލަފާ ކޮށްފަ އެވެ.

މި ފަންޑުގެ ދަށުން މާލީ އެހީތެރިކަން ބޭނުންވާ ގެސްޓް ހައުސްތަކާއި ސަފާރީތަކަށް އެކަމަށް އެދި ފޯމު ހުށަހެޅުމުގެ ފުރުސަތު ވަރަށް އަވަހަށް ހުޅުވައިލާނެ ކަމަށް އެމްއެފްއެމްސީން ބުންޏެވެ.

އީޔޫ އިން ވަނީ ކޮވިޑް-19އާ ގުޅިގެން ރާއްޖެ އަށް ކުރިން ވެސް އެހީ ފޯރުކޮށްދީފަ އެވެ. އެގޮތުން، ޔޫރަޕިއަން އިންވެސްޓްމަންޓް ބޭންކު މެދުވެރިކޮށް ރާއްޖޭގެ އިގްތިސާދު ކުރިއެރުވުމަށް 20 މިލިއަން ޔޫރޯގެ އެހީ ދީފައިވާއިރު ސިއްހީ ދާއިރާ އަށް ހާއްސަ ކޮށްގެން އެއް މިލިއަން ޔޫރޯގެ ހިލޭ އެހީ ވެސް ވަނީ ދީފަ އެވެ.