ކަލާޒް އިން މިރޭ އާ ދެ ސިލްސިލާއެއް ފަށަނީ

ކަލާޒް ޗެނެލުން މިރޭ އާ ދެ ސިލްސިލާއެއް ފަށާނެ އެވެ.

މި ދެ ސިލްސިލާ އަކީ މިހާރު ޕްރޮމޯތައް ވެސް ދައްކަމުން އަންނަތާ ދުވަސްކޮޅެއްވެފައިވާ "ތޯޅާ ސާ ބާދަލް، ތޯޅާ ސާ ޕާނީ" ގެ އިތުރުން "ނީމާ ޑެންޒޯންގްޕާ" އެވެ.

އާ ދެ ސިލްސިލާގެ ތެރެއިން "ނީމާ ޑެންޒޯންގްޕާ" ދައްކަން ފަށާނީ ރާއްޖެ ގަޑިން 8:30 ގަ އެވެ. މި ސިލްސިލާ އަކީ ސިއްކިމް ސްޓޭޓަށް ނިސްތަބްވާ ޒުވާން އަންހެން ކުއްޖެއްގެ ވާހަކަ އެވެ. ކައިވެނިިކޮށްގެން މުމްބާއީ އަށް ދިރިއުޅުން ބަދަލުކުރުމުން ފިރިމީހާގެ އާއިލާ އިން އޭނާ ބަލައިނުގަތުމާއި ސިފައާ ހެދި އާންމުންގެ ފަރާތުން ކުރިމަތިވާ މަލާމާތާއި ފުރައްސާރައާ ހެދި ކުރިމަތިވާ ހިތްދަތި ކަންތައްތަކެއް މިއިން ފެނިގެން ދާނެ އެވެ.

"ނީމާ ޑެންޒޯންގްޕާ" ގެ ޓައިޓްލް ރޯލުން ކުޅެފައި ވަނީ ސުރާބީ ދާސް އެވެ.

މިރޭ ރާއްޖެ ގަޑިން 9:30 ގައި ފަށާ ސިލްސިލާ "ތޯޅާ ސާ ބާދަލް، ތޯޅާ ސާ ޕާނީ" އަކީ ކަލާޒް އިން 2019 ގައި ނިންމާލި ކާމިޔާބު ސިލްސިލާ "ބޭޕަނާ ޕިޔާރު" ގެ ބަތަލާ އިޝިތާ ދައްތާ ލީޑުން ރޯލުން ފެންނާނެ އެއްޗެކެވެ. މިއީ ވަކިން ހާއްސަކޮށް އަންހެން ދަރިއަކާއި ބައްޕައަކާ އޮންނަ ގުޅުމާއި ބައްޕަ ކުއްލި ގޮތަކަށް ވަކިވެދިއުމުން އާއިލާއަކަށް ކުރިމަތިވާ ހާދިސާތަކެކެވެ.

އެއް ދުވަހެއްގައި އާ ދެ ސިލްސިލާ ކަލާޒް އިން ފަށާ އިރު، އެ ޗެނެލުން މިހާރު ގެނެސްދޭ ސިލްސިލާތަކުގެ ތެރޭގައި މި މަހުގެ ތެރޭގައި ފެށި "ބަލިކާ ވަދޫ 2" އާއި "ޗޯޓީ ސަރުދާނީ" އާއި "ބަރިސްތަ ބާބޫ" އަދި "ޝަކްތީ" ހިމެނެ އެވެ. އަދި އާ ދެ ސިލްސިލާއެއް މިރޭ ފަށަނީ މިދިޔަ ހަފުތާގައި ދެ ސިލްސިލާއެއް ނިންމައިލުމަށް ފަހު އެވެ.

އެއީ މިދިޔަ އަހަރު ދައްކަން ފެށި "ނަމަކް އިސްކާ" އާއި "ބާވްރާ ދިލް" އެވެ. އެ ދެ ސިލްސިލާގެ ވެސް ފަހު އެޕިސޯޑް ދެއްކީ 20 ވަނަ ދުވަހުގެ ރޭގަ އެވެ.