ފަޅުރަށްތަކުގެ ބާރު ދޭން ޖެހޭނީ ކައުންސިލްތަކަށް: އަފީފު

ކައުންސިލްތަކުގެ އިހުތިސާސް ކަނޑައަޅައި، އެ އިހުތިސާސްގެ ތެރޭގައި ހިމެނޭ ރަށްތައް، ކައުންސިލްތަކުން ކަނޑައަޅާ ގޮތަކަށް ބޭނުންކުރުމުގެ އިހުތިޔާރު އޮންނަން ޖެހޭ ކަމަށް ވިދާޅުވެ، ފަޅުރަށްރަށާ ބެހޭ ގާނޫނަށް ސަރުކާރުން ހުށަހެޅި އިސްލާހަށް ވިލުފުށި ދާއިރާގެ މެމްބަރު ހަސަން އަފީފު މިއަދު ފާޑުވިދާޅުވެއްޖެ އެވެ.

ރާއްޖޭގައި އަމަލުކުރަމުން އަންނަ ގާނޫނުތަކުގައި ލާމަޒުކަޒީ ގާނޫނަށް ގެނައި އިސްލާހަށް ފަހު، އެ ގާނޫނާ ތައާރުޒުވާ ގޮތަށް ހުރި ބައިތައް ބަަދަލުކުރަން ސަރުކާރުން ވަނީ ރައްޔިތުންގެ މަޖިލީހަށް ގިނަ ބިލުތަކެއް ހުށަހަޅައިފަ އެވެ. ފަޅު ރަށްރަށާ ބެހޭ ގާނޫނަށް ބަދަލު ގެންނަން ސަރުކާރުގެ ފަރާތުން ބާރަށު ދާއިރާގެ މެމްބަރު އަހުމަދު އަބްދުﷲ ހުށަހެޅުއްވި ބިލަކީ އެ ގޮތުން ހުށަހެޅުއްވި އެއް ބިލެވެ.

އެ ބިލްގެ އިބްތިދާއީ ބަހުސްގައި އަފީފް މިއަދު ވިދާޅުވީ ބިލު ހުށަހެޅި މަގުސަދެއް ކަމަށް އޮތީ ކައުންސިލްތަކުގެ އިހުތިސާސްގެ ތެރޭގައި ހިމެނޭ ފަޅުރަށްރަށް ކައުންސިލްގެ ބާރުގެ ދަށަށް ގެންދިއުން ކަމަށާއި އެހެން ނަމަވެސް ބިލުން ކައުންސިލްތަކަށް ދެނީ ހަމައެކަނި ވަރުވާ އަށް ރަށްތައް ދޫކުރުމުގެ ބާރު އެކަނި ކަމަށެވެ. ލާމަޒުކަޒީ ގާނޫނަށް ގެނައި އިސްލާހުގެ މަގުސަދަކީ އެ އެއް ނޫން ކަމަށް ވެސް އޭނާ ވިދާޅުވި އެވެ.

"އެ ރަށެއްގެ އިހުތިސާސްގެ ތެރޭގައި ހިމެނޭ ފަޅުރަށެއް، އެ ރަށެއްގެ ކައުންސިލަށް، އެންމެ ފައިދާ ހުރި ގޮތަކަށް ބޭނުންކުރުމުގެ އިހުތިޔާރު ކައުންސިލަށް އޮންނަން ޖެހޭނެ ކަމަށް އަޅުގަނޑުމެން އޭރު ގަަބޫލުކުރީ،" އަފީފް ވިދާޅުވި އެވެ.

އޭނާ ވިދާޅުވިގޮތުގައި ރަށްގެ އިހުތިސާސްގެ ދަށުގައިވާ ރަށެއް އެންމެ ފައިސާހުރި ގޮތަކަށް ބޭނުންކުރެވޭނީ ޓޫރިޒަމަށް ދޫކޮށްގެން ކަމަށް ކައުންސިލަަކަށް ގަބޫލުުކުރެވޭ ނަމަ، އެ ފަޅުރަށުގައި އެ މައްސަކަތް ކުރުމުގެ އިހުތިޔާރު އެ ކައުންސިލަކަށް އޮންނަން ޖެހޭނެ ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.

އިހުތިސާސް ދިނީ މޮހޮނަށް އޮޑިދިން ހެން

އަފީފު ވިދާޅުވީ ފަަޅުރަށްރަށް ކައުންސިލްތަކާ ހަވާލުކުރަން ބިލްގައި އޮތް ގޮތުން އެކަމަކީ "މޮހަނަށް އޮޑި ދިންހެން" ހެން ކުރާ ކަމެއް ކަމަށެވެ. ކަައުންސިލްްތަކަށް ބޭރުދިިނުމަކީ އެގޮތަށް ކުރާކަަމެއް ނޫން ކަމަށް ވެސް އޭނާ ވިދާޅުވި އެވެ. ބިލުގައި އޮތް ގޮތުން، ރަށެއްގެ އިހުތިސާސްްގައި ހިމެނޭ ރަށެއް ވެސް އިންޑިއަސްޓްރިއަލް ބޭނުމަކަށް ނަގާފައި ސަރުކާރުން ބޭނުން ބަަޔަަކަށް ދެވޭނެ ކަމަށް ވެސް އޭނާ ވިދާޅުވި އެވެ.

"އުނގޫފާރު ދާއިރާގެ އިއްޒަތްތެރި މެމްބަރު މުހައްމަދު ވަހީދު ފާހަގަކުރެއްވިހެން މޮހޮނަށް އޮޑިދިންހެން މިއޮތީ ފަޅުރަށްރަށުގެ އިހުތިސާސް ދީފައި. އެގޮތަކަށް ނޫން އަޅުގަނޑުމެން މިކަންތައް ކުރަންވީ. ރަަށެއްގެ އިހުތިސާސްގެ ތެރޭގައި ހިމެނޭ ފަޅުރަށެއް އިންޑަސްޓްރިއަލް ބޭނުމަށް ބޭނުންވެއްޖެއްޔާ ސަރުކާރުން އެ ރަށް ނަގާފައި ސަރުކާރުން ބޭނުންވާ ފަރާތަކަށް އެބަ ދެވޭ،" އަފީފް ވިދާޅުވި އެވެ.

އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވީ ފަޅުރަށްރަށާ ބެހޭ ގާނޫނަށް ބަަދަލުގެންނަން ސަރުކާރުން ފޮނުވާފައިވާ ބިލު އޮތީ ކައުންސިލްތަކުގެ އިހުތިސާސްގެ ތެރޭގައި ހިމެނޭ ރަށްތައް ބޭނުން އިރަކު އަތުލެވޭ ގޮތަށް ކަމަށެވެ. އެއީ ލާމަރުކަޒީ ގާނޫނުގެ މަގުސަދު ހާސިލުވާ ގޮތަށް އޮތް ބިލެއް ނޫން ކަމަށް ވެސް އޭނާ ވިދާޅުވި އެވެ.

"މޮހޮނަށް އޮޑިދޭ އުސޫލުން އިހުތިސާސް ކަނޑައަޅާފައި އޭގައި ހުރި އެއްޗެއް ދަމައިގަންނަ ކަހަލަ ބަހުރުވަޔަކުން އޮތް ބިލެއް މީ،" ވައްޑެ ވިދާޅުވި އެވެ.

ފަޅު ރަށްރަށާ ބެހޭ ގާނޫނަށް ބަދަލު ގެންނަން ސަރުކާރުން ހުށަހެޅި ބިލުގައިވާ ގޮތުން ކައުންސިލެއްގެ އިހުތިސާސްގެ ތެރޭގައި ހިމެނޭ ރަށެއް ވަރުވާއަށް ލިޔެދިނުމާއި ވަކިކުރުމުގެ އިހުތިޔާރު އޮންނާނީ ކައުންސިލްތަކަށެވެ. އެކަމަކު އެގޮތަށް އިހުތިޔާރު އޮންނާނީ އިންޑަސްޓްރިއަލް ކަންތައްތަކަށް ބޭނުންކުރަން ސަރުކާރުން ކަނޑައަޅާ ރަށްތައްް ފިޔަވައި އެހެން ރަށްތަކަށެވެ. އިންޑަސްޓްރިއަލް ބޭނުންތަކަށް ދޫކުރާނެ ރަށްތައް ކަނޑައަޅާނީ ވެސް އަދި ދޫކުރާނީ ވެސް ސަރުކާރުންނެވެ.