ރިހިވެލި ރިސޯޓު އަތުލަން ބަޔަކު އެރުމުން ހަމަނުޖެހުން ހިނގައިފި

ސަބްލީޒް އެގްރިމެންޓެއްގެ ދަށުން ރިހިވެލި ރިސޯޓް ހިންގަމުން އައި ފްރާންސް ކުންފުނީގެ މުވައްޒަފުން އެތަނުން ގަދަކަމުން ބޭރުކުރަން ބަޔަކު މަސައްކަތްކޮށް ރިސޯޓްގައި ހަމަނުޖެހުންތަކެއް ހިންގައިފި އެވެ.

ފުލުހުންގެ މީޑިއާ އޮފިޝަލް ވިދާޅުވީ ރިހިވެލީގައި ހަމަނުޖެހުންތަކެއް ހިނގާކަމުގެ މައުލޫމާތު ލިބުމުން ފުލުހުން އެ ރިސޯޓްގައި ހަރަކާތްތެރިވަމުން އަންނަ ކަމަށާއި ފުލުހުން މަސައްކަތްކުރަމުން އަންނަނީ ވާހަކަ ދައްކައިގެން މައްސަލަ ހައްލުކުރަން ކަމަށެވެ. އޭނާ ވިދާޅުވި ގޮތުގައި އެ ރިސޯޓްގައި ހަމަނުޖެހުންތަކެއް ހިނގި ނަމަވެސް އެއްވެސް މީހަކަށް އަނިޔާ ވެފައެއް ނުވެ އެވެ.

ރިހިވެލި ރިސޯޓް ހިންގަމުން އަންނަ ސޭވް ދަ ޑްރީމްގެ ވަކީލް ނާޒިމް އަބްދުއްސައްތާރު "މިހާރު" އަށް މިއަދު ވިދާޅުވީ ރިސޯޓްގެ ވެރިފަރާތްކަމަށްވާ މާހަލް ޕްރައިވެޓް ލިމިޓެޑްގެ ފަރާތުން ރިސޯޓަށް ދިޔަ ބަޔަކު ގަދަކަމުން އެެރަށުގެ ކޮންޓްރޯލް ނަގަން މަސައްކަތް ކޮށްފައިވާ ކަމަށެވެ. އެގޮތަށް ކަންތައް ކުރި އިރު އެ ދެފަރާތުގެ ދެމެދުގައި ގިނަ މައްސަލަތަކެއް ޖެހި ކޯޓުތަކުގައި ޝަރީއަތް ކުރިއަށްދާ ކަމަށާއި ސޭވް ދަ ޑްރީމް އިން މަސައްކަތްކުރަނީ އެ މައްސަލަތައް ޝަރުއީ އެންމެ ފަހު މަރުހަލާއިން ނިމެންދެން ރިސޯޓްގައި ތިބެން ކަމަށް އޭނާ ވިދާޅުވި އެވެ.

"އަޅުގަނޑުމެންގެ ކަންބޮޑުވުމަކީ ބައެއް ހުކުމްތައް މިހާރު ވެސް އެޕީލްކޮށްފައި ހުއްޓާ، ދަށުކޯޓުގެ ހުކުމެއް އަމިއްލައަށް ތަންފީޒުކުރަން އުޅުން. އެ ހުކުމަކީ ވެސް މިއަދު ކުރި ހުކުމެއް. އެ ހުުކުމް އަދި އެ ޕީލް ނުކުރެވި އޮތީ އެހެންވެ،" ސޭވް ދަ ޑްރީމްގެ ވަކީލް ނާޒިމް ވިދާޅުވި އެވެ.

ބަޔަކު މިއަދު ރިސޯޓަށް އެރީ ރިސޯޓްގެ މައްސަލަތަކުގެ ތެރެއިން ހުށަހަޅާފައިވާ ދައުވާއެއްގައި، ރަށުގެ ސަބްލީޒް އެއްބަސްވުން ބާތިލްވެފައި ވާތީ ސޭވް ދަ ޑްރީމް އަށް ނުވަތަ އެ ކުންފުނީގެ އެއްވެސް ހިއްސާދާރަކަށް ވެސް މާހަލްގެ ހުއްދަ ނެތި ރިސޯޓްގައި ނުތިބެވޭނެ ކަމަށާއި އެތަނުން މަންފާ ހޯދުމުގެ ހައްގު ނޯންނާނެ ކަމަށް ގާޒީ އަލީ ނަސީރު މިއަދު ކުރެއްވި ހުކުމަކަށް ފަހުގަ އެވެ.

މާހަލް އަށް ރިސޯޓްގެ ކޮންޓްރޯލް ހޯދަން އެތަަނަށް އެރި ބައެއް މީހުން، ފްރާންސްގެ އަންހެނަަކަށް ހުރަސް އަޅާ މަންޒަރު ފެންނަ ވީޑިއޯ އެއް ސޯޝަލް މީޑިއާގައި މިހާރު ވަނީ އާއްމުކޮށްފަ އެެވެ. އަދި މިކަމާ ކަންބޮޑުވުން ފާޅުކޮށް ރިސޯޓްގެ މެނޭޖްމަންޓުން ވާހަކަ ދައްކާ ވީޑިއޯއެއް ވެސް ވަނީ އާންމުކޮށްފަ އެވެ. އެ ވީޑިއޯގައި ވެސް ބުނަނީ 15 ނުވަތަ ވިއްސަކަށް މީހުންގެ ގްރޫޕެއް ރިސޯޓަށް އަރައި، ސެކިއުރިޓީ އަށް ހުރަސް އަޅައި ފޯނު އަތުލައި އަދި ގައިގައި އަތްލައި އަމިއްލައަށް ކަންކަން ތަންފީޒުކުރަން އުޅޭ ކަމަށާއި ރާއްޖޭގައި މިފަދަ ކަންކަން ހިނގުމަކީ ވަރަށް ދެރަ ކަންތައް ކަމަށެވެ. ރަށުގައި ތިބި މީހުންގެ ރައްކާތެރިކަން ޔަގީން ނުވާ ކަމަށާއި މި ކަންބޮޑުވުމާ އެކު ފުލުހުންގެ އެހީތެރިކަމަށް ވަނީ އެދިފަ އެވެ.