ފިޔަވަތީގައި ކުދިންތަކަކަށް އަނިޔާކުރި ކަމަށް ބުނާ ވާހަކަ ދޮގުކޮށްފި

ހުޅުމާލޭ ފިޔަވަތީގައި އުޅޭ ކުދިންތަކަކަށް އަނިޔާކުރާ ކަމަށް ބުނެ ރޭ އެތަނުގައި ކުދިންތަކެއް އަޑުގަދަކުރި ނަމަވެސް އެތަނުގައި ކުއްޖަކަށް އަނިޔާކޮށްފައި ނުވާ ކަމަށް ޗައިލްޑް އެންޑް ފެމިލީ ޕްރޮޓެކްޝަން ސާވިސް އިން މިއަދު ބުނެފި އެވެ.

ސޯޝަލް މީޑިއާގައި ރޭ އާންމުވި ވީޑިއޯއެއްގައި، ފިޔަވަތީ ތެރޭގައި ހުރި ކުއްޖަކު "އަނިޔާކުރަނީ" އޭ ބުނާ އަޑު ވެސް އިވެ އެވެ. އޭރު އެ ސަރަހައްދަށް ބަޔަކު އެއްވެ ތިއްބެވެ. އެކަކު އެތަނުގެ ތެރޭގައި ވާގޮތެއް ފާރުމަތިން ބަލަން ހުރުމަށް ފަހު، "މި ދޮރު އަވަހަށް ހުޅުވާ" ށޭ ބުނާ އަޑު ވެސް އިވެ އެވެ.

އެކަމަކު އެ ހިސާބުން ވީޑިއޯ ނިމޭތީ އެ ވަގުތު ދެން އެ ސަރަހައްދުގައި ތިބި މީހުން ކަންތައް ކުރި ގޮތެއް ނޭނގެ އެވެ.

އެކަމާ ގުޅިގެން ޗައިލްޑް އެންޑް ފެމިލީ ޕްރޮޓެކްޝަން ސާވިސް އިން ނެރުނު ބަޔާނެއްގައި ބުނީ ދައުލަތުގެ ބެލުމުގެ ދަށުގައިވާ ކުދިންނަކީ އެކި ބާވަތްތަކުގެ އަނިޔާ ލިބި އެ ކަންކަމުގެ އަސަރު މުޅި ދިރިއުޅުމަށް ދެމިގެންދާ ފަދަ ކަންކަން ތަހައްމަލްކުރާ ކުދިން ކަމަށެވެ. އަދި އެ ކަންކަމަކީ ކުއްޖާގެ ނަފްސާނީ ސިއްހަތާ ގުޅިފައިވާ ކަންކަމަށްވާތީ އެ އިހުސާސްތައް އެކި ގޮތްގޮތަށް ބުނެދިނުމަށް މަސައްކަތް ކުރާ ކަމަށް އެ ބަޔާނުގައި ބުނެފައިވެ އެވެ.

"މި ހިނގާދިޔަ ހާދިސާގެ މައުލޫމާތު ލިބުމާ އެކު މި ސާވިސް އިން ވަނީ ވަގުތުން އެޓެންޑް ކުރަން ފަށާފައި. އަދި މިހާދިސާގައި އެއްވެސް ކުއްޖަކަށް އަނިޔާއެއް ލިބިފައިނުވާކަން ކަށަވަރުކޮށްދެމެވެ،" އަނިޔާކުރި ކަމަށް ބުނެ އާންމުކުރި ވީޑިއޯއާ ގުޅިގެން ބުނެފައިވެ އެވެ.

ނަމަވެސް ފިޔަވަތީގައި ހިނގީ ކޮން ކަމެއްކަން ބަޔާނުގައި ބުނެފައެއް ނުވެ އެވެ.

އެ ވީޑިއޯއާ ގުޅިގެން ފުލުހުން ވެސް ބުނީ ފިޔަވަތީ ފާރުމައްޗަށް ބަޔަކު އަރައިގެން އުޅޭކަމުގެ މައުލޫމާތު ރޭ ފުލުހުންނަށް ލިބިގެން އެ ސަރަހައްދަށް ދިޔަ ކަމަށެވެ. އެކަމަކު ފުލުހުން ދިޔައިރު އެތަނުގައި އެއްވެސް މީހަކު ނެތް ކަމަށް ވެސް ފުލުހުން ބުންޏެވެ. އަދި ފިޔަވަތީގެ ކުދިންނަށް އެތަނުގެ މުވައްޒަފުން އަނިޔާކުރި ކަމުގެ މައުލޫމާތެއް ވެސް ލިބިފައި ނެތް ކަމަށް ފުލުހުން ބުންޏެވެ.