ފެތުމުން ދުނިޔޭގެ ހަތަރު ރެކޯޑް؛ ޑައުން ސިންޑްރޯމަކީ ހުރަހަކަށް ނުވި

ޑައުން ސިންޑްރޯމް ހުންނަ މެކްސިކޯގެ އަންހެނަކު ފެތުމުގެ ދާއިރާ އިން ހަތަރު ރެކޯޑެއް ހަދައި، ދުނިޔޭގެ ރެކޯޑް ފޮތުން ޖާގަ ހޯދައިފި އެވެ.

އުމުރުން 8 އަހަރުން ފެށިގެން ފެތުމުގެ ތެރޭގައި އުޅެމުން އަންނަ 33 އަހަަރުގެ ޑުނިއާ ކަމާޗޯ ހެދި ރެކޯޑްތަކަކީ ފްރީސްޓައިލްގެ ކުރު ފެތުމުން އެންމެ އަވަހަށް 200 މީޓަރު ހަމަކުރުމާއި (2 މިނިޓް 56.20 ސިކުންތު) އާއި ފްރީސްޓައިލް ކުރު ފެތުމުން އެންމެ އަވަހަށް 800 މީޓަރު ހަމަކުރުމާއި (12 މިނިޓާއި 38 ސިކުންތު) އާއި ފްރީސްޓައިލްގެ ދިގު ފެތުމުން އެންމެ އަވަހަށް 1500 މީޓަރު ހަމަކުރުމާއި (25 މިނިޓް 06.07 ސިކުންތު) އަދި ފްރީސްޓައިލް ކުރި ފެތުމުން އެންމެ އަވަހަށް 1500 މީޓަރު ހަމަކުރުމުގެ (23 މިނިޓް 55.07 ސިކުންތު) ރެކޯޑެވެ.

ޑައުން ސިންޑްރޯމް ހުއްޓަސް ޑުނިއާ އަކީ އަބަދުވެސް ފެތުމުގެ ތެރޭގައި ވަރަށް ގަދައަށް ހަރަކާތްތެރިވާ އެތުލީޓެކެވެ. އަދި ފެތުމުން މިހާތަނަށް އޭނާ ގައުމީ ފެންވަރާއި އިންޓަނޭޝަނަލް ފެންވަރުގައި ވެސް ގިނަ ކާމިޔާބީތަކެއް ހޯދާފައިވެ އެވެ.

"ފެތުމުގައި ކާމިޔާބު މީހަކަށްވީ މިކަމަށް ބަހައްޓާ ސަމާލުކަމާއި ފެތުމަށް ދޭ ޝައުގުވެރިކަމާއި ޑިސިޕްލިންގެ ސަބަބުން،" ޑުނިއާ ބުންޏެވެ. "ހުވަފެނެއް ހަގީގަތަކަށް ހަދަން ބޭނުން ނަމަ އޮތީ އެކަމަށް މަސައްކަތްކުރުން."

މިހާތަނަށް އެކިއެކި މުބާރާތްތަކުގައި ފަތައިގެން އޭނާ 500 އަށް ވުރެ ގިނަ މެޑަލް ހޯދާފައިވާ އިރު އޭގެ ތެރޭގައި ގިނައިން ރަން މެޑެއްޔެވެ. ޑޫނީއާ މިހާތަނަށް އަޔަލޭންޑާއި ޕޯޗްގަލާއި އިޓަލީ އާއި ކެނެޑާ އާއި ކޮލަމްބިއާގެ އިތުރުން ވެނުޒުލެއާގައި ބޭއްވި އެތައް ޗެމްޕިއަންޝިޕެއްގައި ވެސް ވާދަކޮށްފައިވެ އެވެ.

އަދި ގިނަ މުބާރާތްތަކަކީ އޭނާ ވާދަކޮށް މެކްސިކޯ އަށް ރަން މެޑެލް ހޯދައި ދީފައިވާ މުބާރާތްތަކެވެ.

"މުބާރާތެއްގައި މޮޅުވެގެން އަހަރެންގެ ނަމާ އެކު ގައުމުގެ ނަން ޕޯޑިއަމްތަކުގައި އަޑު އިވުމަކީ އެންމެ އުފާވާ ކަންތައް،" ޑުނިއާ ބުންޏެވެ.

އޭނާ ބުނީ ފެތުމުން ކުރިއަށް ދާން ލިބުނު އެންމެ ބޮޑު ހިތްވަރަކީ އެމެރިކާގެ ފެތުމުގެ ލެޖެންޑް މައިކަލް ފެލްޕްސް ކަމަށެވެ. އަދި އޭނާ ފަތާތަން ފެނިފައިވުމަކީ ވެސް ވަރަށް ބޮޑު އުފަލެއް ކަމަށް ބުންޏެވެ. އަބަދު ވެސް ރޯލް މޮޑެލްއެއްގެ ގޮތުގައި ފެލްޕްސް ދެކޭތީ އާންމުންގެ ތެރޭގައި ޑުނިއާ މަޝްހޫރުވެފައި ވަނީ "ފެލްޕްސްގެ ގާލް" ގެ ގޮތުގަ އެވެ.

ޑައުން ސިންޑްރޯމާ އެކު، ހާއްސަ އެހީއަށް ބޭނުންވާ މީހަކަށްވާތީ ޑުނިއާ އަކީ އޭނާ ފަދަ ކުދިންނާއި މީހުންގެ ހައްގުގައި ވެސް މަސައްކަތްކުރާ މީހެކެވެ.

ޑުނިއާ އަކީ ސްޕޯޓްސް ޔުނިއަން ފޯ އެތުލީޓްސް ވިތު ޑައުން ސިންޑްރޯމް (ސަޑްސް) އާއި ސްޕޯޓްސް ޑައުން ސިންޑްރޯމް އިންޓަނޭޝަނަލް ސްވިމިން އޯގަނައިޒޭޝަން (ޑިޒިޒޯ) އަދި ވޯލްޑް އިންޓެލެކްޗްއަލް އިމްޕެއާމަންޓް ސްޕޯޓް (ވާޗޫސް) ގެ ވަރަށް ހަރަކާތްރެރި މެމްބަރެކެވެ.

"ބޭނުން ވަނީ އަހަރެންގެ ކަހަލަ މީހުންނާއި ކުދިންގެ ތެރޭގައި ހޭލުންތެރިކަން އުފައްދައި، ކޮންމެ މީހަކަށް ވެސް އެ މީހަކު ޝައުގުވެރިވާ ދާއިރާއަކުން ކުރިއަށް ދެވިދާނެ މީހެއްކަން އަންގައި ދިނުން،" ޑުނިއާ ބުންޏެވެ.

އޭނާ ބުނީ ކޮންމެ މީހަކަށް ވެސް ދުނިޔޭގެ ރެކޯޑް ފޮތުން ޖާގައެއް ހޯދިދާނެ ކަމަށެވެ.

"މުހިއްމި ކަމަކީ އަމިއްލަ ނަފުސަށް އިތުބާރުކޮށް ކުރިއަށްދާން މަސައްކަތްކުރުން،" ޑުނިއާ ބުންޏެވެ.