ސިޓީ ކައުންސިލުން ކުނިތައް ގެންގޮސް ވެމްކޯ ސައިޓް ދޮރުމައްޗަށް އަޅާލައިފި

މާލޭ މަގުމަތީގައި ހުރި ކުނިތައް މިއަދު ސިޓީ ކައުންސިލުން ނަގައި، ލޮރީއެއްގައި ގެންގޮސް ވެމްކޯގެ ކުންޏާ ބެހޭ އޮފީސް ގޭޓް ކައިރި އަށް އަޅާލައިފި އެވެ.

އޭގެ ވީޑިއޯއެއް ވެސް ސޯޝަލް މީޑިއާގައި ވަނީ އާންމުވެފަ އެވެ. އެ ވީޑިއޯ އިން ފެންނަނީ، އިންޑަސްޓްރިއަލް ޒޯން ސަރަހައްދުގައި ވެމްކޯގެ ކުންޏާ ބެހޭ އޮފީސް ހަދާފައި ހުންނަ ތަނުގެ ގޭޓް ކައިރިއަށް ލޮރީއަކުން ކުނިތައް އޮއްސާލާ ތަނެވެ.

ވެމްކޯ އިން ބުނީ ކުނި އަޅަން ޖެހޭނީ ބާޖަށް ކަމަށާއި، ކުނީގެ މައްސަލަތަކާ ބެހޭ ގޮތުން މިއަދު މެންދުރު ފަހު ނިއުސް ކޮންފަރެންސެއް ބާއްވާނެ ކަމަށެވެ. މިކަމާ ބެހޭ ގޮތުން އިތުރު މައުލޫމާތެއް އެ ކުންފުނިން ނުދެ އެވެ.

އެކަމަކު މަންޒަރު ދުށް މީހަކު ބުނީ ވެމްކޯ މުވައްޒަފެއްގެ ގަޔަށް ވެސް ކުނި ކޮތަޅެއް ހޫރާލައިފައިވާ ކަމަށެވެ.

އެ ތަން ބަލަހައްޓާ ސެކިއުރިޓީން ބުނީ އެ މީހުންނަށް ވެސް ކުރިން އެނގުމަކާ ނުލައި ލޮރީއެއް ވަދެ ކުނިތައް އަޅާލީ ކަމަށެވެ. އަދި އެއީ އެއްވެސް އިރަކު ކުނި އަޅާ ތަނެއް ނޫން ކަމަށް ސެކިއުރިޓީން ބުނެ އެވެ.

ރެއިން ފެށިގެން އެޕާޓްމެންޓްތަކުން ކުނި ނަގަން ފެށުމާ އެކު ރަޖިސްޓްރީ ނުކޮށް ހުރި ބައެއް އެޕާޓްމެންޓްތަކުން ކުނިތައް ވަނީ މަގުމައްޗަށް ނެރެފަ އެވެ. އެފަދަ ކުނި ނަގާނީ ސިޓީ ކައުންސިލުން ކަމަށް ވެމްކޯ އިން ބުނެ އެވެ. އަދި ސިޓީ ކައުންސިލުން ވެސް ބުނެފައި ވަނީ އެއްބަސްވެފައިވާ ގޮތަށް ވެމްކޯ އަށް ކުނި ނުނެގޭ ކަމަށާއި އެކަން ސިޓީ ކައުންސިލުން ކުރާނެ ކަމަށެވެ.