ޑިޒްނީ އަށް ޖޮހަންސަން ކުރި ދައުވާ ކޯޓުން ބޭރުގައި ހައްލުކޮށްފި

މިދިޔަ ޖުލައި މަހުގެ ތެރޭގައި ޑިޒްނީން ސުޕަހީރޯ ފިލްމު "ބްލެކްވިޑޯ" ޑިޖިޓަލްކޮށް ޕްރީމިއާކުރީ އެއްބަސްވުމާ ހިލާފަށް ކަމަށާއި އެކަމާ ގުޅިގެން މާލީ ގޮތުން ވެސް ގެއްލުންތަކެއް ލިބުނު ކަމަށް ބުނެ ބަތަލާ ސްކާލެޓް ޖޮހަންސަން ކުރި ދައުވާ ކޯޓުން ބޭރުގައި ހައްލުކޮށްފި އެވެ.

މިކަން ދެ ފަރާތުން ވެސް ކަށަވަރުކޮށްދިން ނަމަވެސް ކޯޓުން މައްސަލަ ނިންމައިލި ގޮތާ ބެހޭ އެއްވެސް ތަފުސީލެއް ހާމައެއްނުކުރެ އެވެ. އެކަމަކު ބައެއް މީޑިއާތަކުން ބުނީ ކޯޓުން ބޭރުގައި މައްސަލަ ނިންމީ ޖޮހަންސަނަށް ފައިސާގެ ބޮޑު އަދަދެއް ވެސް ދީފައި ކަމަށެވެ.

"ބްލެކް ވިޑޯ" އޭނާ ކުޅުނީ 20 މިލިއަން ޑޮލަރަށެވެ.

ހޮލީވުޑްގެ އެންމެ ކާމިޔާބު ބަތަލާއިންގެ ތެރޭގައި ހިމެނޭ ޖޮހަންސަން ޑިޒްނީއާ ދެކޮޅަށް ދައުވާކުރަން ލޮސް އެންޖެލިސްގެ ސުޕީރިއާ ކޯޓަށް ހުށަހެޅީ ޖުލައި މަހުގެ 29 ގަ އެވެ. ދައުވާގައި ބުނީ ފިލްމު ސިނަމާތަކާ އެއް ދުވަހެއްގައި ޑިޒްނީ ޕްލަސް އިން ޕްރީމިއާކުރުމަކީ އެއްބަސްވުމާ ހިލާފަށް ކުރި ކަމެއް ކަމަށެވެ. އަދި އެއްބަސްވުމުގައި އޮތީ ފިލްމު ޑިޖިޓަލްކޮށް ޕްރީމިއާކުރާނީ ސިނަމާތަކުގައި ދައްކާތާ މަދުވެގެން 90 ދުވަސް ނުވަތަ ތިން މަސް ފަހުން ކަމަށެވެ. އެހެންވެ އެއްބަސްވުމާ ހިލާފަށް ޑިޒްނީން އަމަލުކުރުމުން މާލީ ގޮތުން ގެއްލުން ލިބިފައިވާ ކަމަށް ބުންޏެވެ.

ނަމަވެސް މިހާރު ދެ ފަރާތުން ވާހަކަ ދައްކައިގެން ކޯޓުން ބޭރުގައި މައްސަލަ ނިންމުމުން ޑިޒްނީން ވަނީ ޖޮހަންސަނަށް ޝުކުރު ވެސް އަދާކޮށްފަ އެވެ. އެ ކުންފުނީގެ ކޮންޓެންޓް ޗެއާމަން އެލަން ބާގްމަން ވިދާޅުވީ މައްސަލަ ސުލްހަވެރިކޮށް ނިމުމުން އުފާކުރައްވާ ކަމަށެވެ.

"މާވެލް ސިމަނެޓިކް ޔުނިވާސް އަށް ޖޮހަންސަން ކޮށްދިން ހިދުމަތްތައް އަހަރެމެން އަބަދު ވެސް ބަލައިގަންނަން. އަދި ކުރިއަށް އޮތް ތަނުގައި ވެސް އެކީގައި މަސައްކަތްކުރެވޭނެ." އޭނާ ވިދާޅުވި އެވެ.

ޑިޒްނީގެ ޕްރޮޖެކްޓެއްގެ ގޮތުގައި ޖޮހަންސަންގެ އަތުގައި "ޓަވާ އޮފް ޓެރާ" ކިޔާ ފިލްމެއް ވެސް އެބައޮތެވެ. އެއީ އަދި މަސައްކަތް ނުފަށާ އެއްޗެކެވެ. މި ފިލްމުގެ ޕްރޮޑިއުސަރެއްގެ ގޮތުގައި ވެސް އޭނާ ހިއްސާވެ އެވެ.

ދާދި ފަހުން ދެވަނަ ދަރިޔަކު ވެސް ލިބުނު 36 އަހަރުގެ ބަތަލާ ބުނީ މައްސަލަ ހައްލުވުމުން ބޮޑު ހިތްހަމަޖެހުމެއް ލިބިފައިވާ ކަމަށާއި ޑިޒްނީއާ ގުޅޮިގެން މިހާތަނަށް ކުރެވުނު މަސައްކަތްތަކާ ދޭތެރޭ ފަހުރު ވެރު ވެސް ވާ ކަމަށެވެ.