ޔާމީނަށް މަރުގެ އިންޒާރު ދިން މައްސަލައެއް ފުލުހުން ބަލަނީ

ކުރީގެ ރައީސް އަބްދުﷲ ޔާމީނަށް ސޯޝަލް މީޑިއާ ޕްލެޓްފޯމް، ފޭސްބުކްގައި މަރުގެ އިންޒާރު ދިން މީހެއްގެ މައްސަލަ ބަލަމުން އަންނަ ކަމަށް ފުލުހުން މިއަދު ބުނެފި އެވެ.

ފުލުހުން ބުނީ، މަނީ ލޯންޑަރިންގެ ކުށް ސާބިތުވެ، ފަސް އަހަރުގެ ޖަލު ހުކުމެއް ކޮށްފައިވީ ނަމަވެސް މިހާރު ގޭ ބަންދުގައި ހުންނެވި ޔާމީނަށް މަރުގެ އިންޒާރު ދިން މައްސަލައެއް ފުލުހުންގެ އިދާރާގެ ސަމާލު ކަމަށް އައިސްފައިވާ ކަމަށެވެ. އަދި އެ އިންޒާރާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.

ޔާމީނަށް ފޭސްބުކްގައި އިންޒާރު ދިން މައްސަލަ ބަލައި، އެ މަނިކުފާނަށް ފުރިހަމަ ރައްކާތެރިކަން ފޯރުކޮށްދިނުމަށް އިދިކޮޅު ޕީޕީއެމް/ޕީއެންސީ ކޯލިޝަންގެ ފަރާތުން މިއަދު ވަނީ ފުލުހުންނަށް ސިޓީއެއް ވެސް ފޮނުވައިފަ އެވެ.

އެ މީހާ ފޭސްބުކްގައި ޔާމީނަށް ނިސްބަތްކޮށް ކުރި ކޮމެންޓެއްގައި ބުނެފައި ވަނީ "ރައީސް ޔާމީނަކީ މަރަންޖެހޭ މީހެއް" ކަމަށެވެ.

ޔާމީންގެ ފަސް އަހަރުގެ ވެރިކަމުގައި ހިންގެވި ކަމަށް ތުހުމަތުކުރާ ހިޔާނާތާ ގުޅޭ އެހެން ބައެއް މައްސަލަތަކުގެ ޝަރީއަތްތައް މިހާރު ވެސް ކުރިއަށް އެބަގެންދެ އެވެ.