ދަރިން ތަރުބިއްޔަތު ކުރުމުގައި އިތުރަށް ސަމާލުވާން ރައީސް އެދިވަޑައިގެންފި

އިޖުތިމާއީ އަދަބު އިހުތިރާމުގެ ތެރޭގައި ދަރިން ތަރުބިއްޔަތުކުރުމަށް އިތުރު ސަމާލުކަމެއް ދިނުމަށް ރައީސް އިބްރާހިމް މުހައްމަދު ސޯލިހު މިއަދު އެދިވަޑައިގެންފި އެވެ.

ޓީޗަރުންގެ ދުވަހުގެ ތަހުނިޔާ ފޮނުއްވައި، އެ މަނިކުފާނު ދެއްވި ހިތޯބުގައި ވިދާޅުވީ މުޖުތަމައު އަށް އެންމެ ބޭނުންވާ ގޮތަށް ދަރިން ތަރުބިއްޔަތު ކުރުމުގައި ޓީޗަރުން އަދާކުރަނީ ގައުމީ ހިދުމަތެއް ކަމަށެވެ. އެއާއެކު، ޒުވާން ޖީލު ސަލާމަތްކުރުމުގައި ވެސް ޓީޗަރުން އަދާކުރައްވަނީ ވަރަށް މުހިއްމު ޒިންމާއެއް ކަމަށް ރައީސް ވިދާޅުވި އެވެ.

އެ މަނިކުފާނު ވިދާޅުވީ ޓީޗަރުން ކުރައްވަނީ ދުލަކުން އަދި ގަލަމަކުން ބަޔާންކުރެވޭ ވަރަށް ވުރެ ބުރަ މަސައްކަތެކެވެ. އެއީ މުދަލާއި ފައިސާއިން ވަޒަންކުރެވޭ ވަރަށް ވުރެ މާތް ޖިހާދެއް ކަމަށް ރައީސް ވިދާޅުވި އެވެ.

"ގައުމުގެ އިންސާނީ ވަސީލަތް ތަރައްގީކޮށް ބިނާކުރުމުގެ އެންމެ މުހިންމު މަސައްކަތް ކުރައްވާ ބަޔަކީ މުދައްރިސުން. އެކަމަށްޓަކައި، ދިވެހިރާއްޖޭގެ ހީވާގި އެންމެހާ މުދައްރިސުން އެ ކުރައްވާ މިންނެތް މަސައްކަތުގެ އަގު ވަޒަންކޮށް ވަރަށް އިހުލާސްތެރިކަމާއެކު ޝުކުރު ދަންނަވަމެވެ،" އެ މަނިކުފާނު ވިދާޅުވި އެވެ.

ޓީޗަރުން އަދާކުރައްވަނީ، ރައީސް ވިދާޅުވި ގޮތުގައި، ހަމައެކަނި ވަޒީފާއެއް ނޫނެވެ. އަމިއްލަ ޝައުގުވެރިކަމާއި ހިތުގައި އޮންނަ ލޯތްބާއެކު ހަޔާތުގެ މުހިއްމު އެތައް ދުވަސްތަކަކާއި ވަގުތުތަކެއް ގުރުބާން ކުރަމުން އަންނަނީ ގައުމުގެ ކުރިމަގުގެ ޖީލު ބިނާކުރެއްވުމަށްކަމަށް އެ މަނިކުފާނު ފާހަގަކުރެއްވި އެވެ.

އެއާއެކު، ސްކޫލު އުމުރުގެ ދަރިވަރުންނަށް މި ވަގުތު ސަމާލުކަން ދޭންޖެހެނީ ކޮން ދާއިރާތަކަކުންތޯ ވިސްނުމަށް އެ މަނިކުފާނު ބާރުއެޅުއްވި އެވެ.

ރައީސް ވިދާޅުވި ގޮތުގައިި މަސްތުވާތަކެތީގެ ވަބާއިން ގައުމުގެ ޒުވާން ޖީލު ސަލާމަތްކުރުމާއި ހަރުކަށި ފިކުރުތަކާއި އަމަލުތަކުން ޅަދަރީން ސަލާމަތްކުރުމަކީ ގައުމީ ފެންވަރުގައި މި ވަގުތު އެންމެ ސަމާލުކަން ދީގެން ކުރަންޖެހިފައިވާ ކަމެވެ.

އޭގެ އިތުރުން، މުޖުތަމައުގެ ނޭދެވޭ ކަންކަން އިސްލާހުކުރުމަށް ދަރިންގެ ހިތްތަކުގައި އިސްލާމް ދީނުގެ ސައްހަ އަގީދާ އަށަގަންނުވައި އިސްލާމީ ރިވެތި އަހުލާގާއި އިޖުތިމާއީ އަދަބު އިހުތިރާމުގެ ތެރޭގައި ދަރިން ތަރުބިއްޔަތުކުރުމަށް އިތުރު ސަމާލުކަމެއް ދިނުމަށް އެދިވަޑައިގެންފަ އެވެ.