އީރާނާއެކު ދެން މުއާމަލާތް ކުރާނީ އެހެން ގޮތަކަށް: އެމެރިކާ

އީރާނުން މިހާރު ދަތުރުކުރަމުންދާ މިސްރާބު ބަދަލުކޮށް، 2015ގެ ނިއުކްލިއާ މުއާހަދާއާ އެއްގޮތަށް އަމަލުތައް ނުބަހައްޓާ ނަމަ، އީރާނާ އެކުގައި ދެން މުއާމަލާތް ކުރާނެ އެހެން ގޮތަކާ މެދު ވިސްނަމުން އަންނަ ކަމަށް އެމެރިކާ އިން އިއްޔެ ބުނެފި އެވެ.

އެމެރިކާ އާއި އެމިރޭޓްސް އަދި އިޒްރޭލުގެ ހާރިޖީ ވަޒީރުންގެ މެދުގައި، ވޮޝިންޓަންގައި ބޭއްވި ބައްދަލުވުމުގައި އެމެރިކާގެ ހާރިޖީ ވަޒީރު އެންޓޮނީ ބްލިންކެން ވިދާޅުވި ގޮތުގައި، އީރާންގެ ކުރިމަތީގައިވާ މުއްދަތު އަންނަނީ ހަމަވަމުންނެވެ. އެހެންކަމުން އޭގެ ކުރިން، އީރާން އެނބުރި، ނިއުކްލިއާ މުއާހަދާގެ އިމުގެ ތެރެއަށް އައުމަށް އޭނާ ގޮވައިލެއްވި އެވެ.

"ނިއުކްލިއާ މުއާހަދާގެ ތެރެއަށް އެނބުރި އައުމަށް އަހަރެމެން އީރާނަށް ހުޅުވައިދިން މަގު މިހާރު އެ އަންނަނީ ކުރުވަމުން މަގު ބެދެމުން،" ބްލިންކެން ވިދާޅުވި އެވެ.

އީރާނާ ދެކޮޅަށް އަސްކަރީ ފިޔަވަޅެއް އަޅަން ވިސްނަންތޯ ސުވާލު ކުރުމުން ބްލިންކެން ވިދާޅުވީ، އެމެރިކާ އިން އަބަދުވެސް އިސްކަން ދެނީ ޑިޕްލޮމެޓިކް ވަސީލަތްތަކުން މައްސަލަތައް ހައްލު ކުރަން ކަމަށެވެ. އެހެން ނަމަވެސް، "އީރާނުން މިސްރާބު ބަދަލު ނުކޮށްފިއްޔާ، އެހެން ގޮތްތަކާ ދިމާލަށް އެނބުރެން ވެސް އަހަރެމެން މިތިބީ ތައްޔާރަށް" ކަމަށް ބްލިންކެން އިންޒާރު ކުރެއްވި އެވެ.

ބްލިންކެންގެ މި ވާހަކަތަކަށް އިޒްރޭލުގެ ހާރިޖީ ވަޒީރު ޔައީރް ލެޕިޑް ވެސް ތާއީދުކުރެއްވި އެވެ.

"ޑިޕްލޮމެޓިކް ވަސީލަތްތައް ފެއިލްވެއްޖެ ހާލަތެއްގައި، އެހެން އިޚްތިޔާރުތައް ވެސް މޭޒުމަތީގައި ހުންނާނެ. އެހެން އިޚްތިޔާރުތަކޭ ބުނީމާ، އެ ބުނެވެނީ ކީކޭކަން، އިޒްރޭލާއި އެމިރޭޓްސް އަދި އީރާނުގައި އުޅޭ ކޮންމެ މީހަކަށް ވެސް އެނގޭނެ،" އިޒްރޭލުގެ ހާރިޖީ ވަޒީރު ޔައީރް ލެޕިޑް ވިދާޅުވި އެވެ.

އެމެރިކާ އާއި ޔޫރަޕްގެ އިއްތިހާދުގެ އިތުރުން ރަޝިޔާ އާއި ޗައިނާ ވެސް ހިމެނޭ ގޮތަށް، އީރާނާ އެކު ނިއުކްލިއާ މުއާހަދާއެއް ގާއިމުކުރީ 2015 ވަނަ އަހަރުގެ ތެރޭގަ އެވެ. އެ މުއާހަދާގެ ހަމައެކަނި މަގްސަދަކީ، ނިއުކްލިއާ ހަތިޔާރު އުފެއްދުމުގެ ގާބިލްކަން އީރާނަށް ލިބުނަ ނުދިނުމެވެ.

އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި، އެމެރިކާ ވަނީ އީރާނާއެކު ސޮއިކުރި ނިއުކްލިއާ މުއާހަދާ އިން 2018 ވަނަ އަހަރު ވަކިވެ، އީރާނަށް ދަތި ކުރުމުގެ ފިޔަވަޅުތަކެއް އަޅައިފަ އެވެ. އެމެރިކާގެ އެ ނިންމުމާ ވިދިގެން، އީރާނުން އަންނަނީ ނިއުކްލިއާ މުއާހަދާ އިން މަނާކުރާ ބައެއް ކަންތައް ކުރަމުންނެވެ. އޭގެ ބޭނުމަކީ، އެމެރިކާ އިން އެޅި ދަތިކުރުމުގެ ފިޔަވަޅުތަކުން ލިބޭ ގެއްލުމަށް، އެ މުއާހަދާގެ އެހެން ބައިވެރިންގެ ފަރާތުން ބަދަލު ހޯދުމަށް ފިއްތުންތައް ކުރިމަތިކުރުމެވެއެވެ.

އެމެރިކާގެ ރައީސްގެ މަގާމަށް މިއަހަރުގެ ޖެނުއަރީ މަހުގެ، ޖޯ ބައިޑެން އިސްވުމާ އެކު، އީރާންގެ ނިއުކްލިއާ މުއާހަދާގައި އެމެރިކާ އަލުން ބައިވެރިވާން ނިންމި އެވެ. އަދި އެކަމާ ގުޅޭ ގޮތުން، ވިލާތުގެ އިއްތިހާދާއި އެމެރިކާ އާއި އީރާނާ ދެމެދު، މިއަހަރުގެ ކުރީކޮޅު ޖެނީވާގައި މަޝްވަރާތަކެއް ވެސް ފެށި އެވެ. ނަމަވެސް އީރާންގެ ރިއާސީ ދައުރު ހަމަވަމުން ދިއުމާއެކު، ޖުލައި މަހުގެ ތެރޭގައި އެ މަޝްވަރާތައް އީރާނުން މެދުކަނޑައިލި އެވެ. އޭގެ ފަހުން މިއަދާ ހަމައަށް ވެސް އެ މަޝްވަރާތައް ފެށޭ ގޮތެއް ނުވެ އެވެ.