ގާނޫނުއަސާސީ ބަދަލުކުރަން އެމްއެންޕީގެ އެހީއަށް ނަޝީދު އެދިވަޑައިގެންފި

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު، މޯލްޑިވްސް ނެޝަނަލް ޕާޓީ (އެމްއެންޕީ)އާ މިއަދު ބައްދަލުކުރައްވައި ގާނޫނުއަސާސީ ބަދަލުކުރަން މަޖިލީހުގައި އެ ޕާޓީގެ އެހީތެރިކަމަށް އެދިވަޑައިގެންފި އެވެ.

އިލެކްޝަންސް ކޮމިޝަންގައި އިއްޔެ ރަޖިސްޓްރީކުރި އެމްއެންޕީން މިއަދު ނެރުނު ނޫސް ބަޔާނެއްގައި ބުނީ އެމްޑީޕީގެ ލީޑަޝިޕާ ބައްދަލުކުރީ ނަޝީދުގެ ދައުވަތަކަށް ކަމަށެވެ. އެ ބައްދަލުވުމުގައި ރާއްޖެއަށް ދިމާވެފައިވާ މުހިއްމު އެކި ކަންކަމާ ގުޅޭ ގޮތުން މަޝްވަރާކޮށް، އިސްލާހަށް ދެ ޕާޓީ އެކުގައި މަސައްކަތް ކުރަން ވާހަކަ ދެކެވުނު ކަމަށް ބަޔާނުގައި ބުންޏެވެ.

އެމްއެންޕީން ބުނިގޮތުގައި، އެ ބައްދަލުވުމުގައި ވަނީ ގާނޫނުއަސާސީއަށް ގެންނަންޖެހޭ މުހިންމު އިސްލާހުތަކާ ގުޅޭގޮތުން ވެސް ވާހަކަ ދައްކައިފަ އެވެ.

"އެގޮތުން، ރައްޔިތުންގެ މެދުގައި ޖުޑީޝަރީއާ މެދު އިތުބާރު އިތުރުކުރުމަށްޓަކައި ޖުޑީޝަލް ސަވިސް ކޮމިޝަން އެކުލެވިގެންވާ ގޮތް ބަދަލުކުރުމަށާއި، ވެރިކަން ކުރުމުގެ ނިޒާމްގައި ހުރި ދަތިތަކަށް ހައްލެއް ހޯދުމަށްޓަކައި ވެރިކަމުގެ ނިޒާމް ބަދަލުކުރުމާ ގުޅޭގޮތުންނާއި ރައްޔިތުންގެ މަޖިލީހުގެ މެންބަރުންގެ އަދަދާ ގުޅޭގޮތުން ފަދަ މުހިންމު ކަންކަމާ ގުޅޭގޮތުން ވާހަކަ ދެކެވުނު،" އެމްއެންޕީގެ ބަޔާނުގައި ބުންޏެވެ.

އެމްއެންޕީން ބުނީ ގައުމުގެ މުސްތަގްބަލާ ގުޅޭ އެފަދަ މުހިންމު ނިންމުންތައް ނިންމުމުގެ ކުރިން މިކަންކަމާ ގުޅޭގޮތުން ރައްޔިތުންގެ މެދުގައި ވަރަށް ފުޅާ ދާއިރާއެއްގައި މަޝްވަރާކޮށް، ރައްޔިތުންގެ ހިޔާލު ހޯދުމަކީ މުހިންމު ކަމެއް ކަމުގައި ދެކޭ ކަމަށެވެ. އެހެންވެ ކަންކަމާ ގުޅޭގޮތުން ގޮތެއް ނިންމާނީ، ޕާޓީގެ ގައުމީ ހިންގާ ކައުންސިލްގައި މަޝްވަރާކުރުމުގެ އިތުރުން، ޕާޓީގެ އާންމު މެންބަރުންނާއި ރައްޔިތުން އެކަންކަމާ ގުޅޭގޮތުން ދެކޭގޮތް ސާފުކުރުމަށްފަހު ކަމަށް ބަޔާނުގައިވެ އެވެ.

ނަޝީދު ވަނީ މިދިޔަ އާދިއްތަ ދުވަހު ރައީސް އިބްރާހިމް މުހައްމަދު ސޯލިހްއާ ވެސް ބައްދަލުކުރައްވައި ރާއްޖޭގެ ވެރިކަމުގެ ނިޒާމު ބަދަލުކުރުމާ ގުޅޭގޮތުން މަޝްވަރާކުރައްވައިފަ އެވެ. އެ ބައްދަލުވުމަށް ފަހު ނަޝީދު ދެއްވި އިންޓަވިއުއެއްގައި އެމަނިކުފާނު ވިދާޅުވީ ވެރިކަމުގެ ނިޒާމު ބަދަލުކުރުމާ ގުޅޭ ގޮތުން އުފެދިފައިވާ ބަހުސަށް ހައްްލެއް ހޯދުމަށާއި ގާނޫނުއަސާސީއަށް ބަަދަލުތަކެއް ގެނައުމުގެ މަޝްވަރާތައް ކުރިއަށް ގެންދަން، ރައީސް އިބްރާހީމް މުހައްމަދު ސޯލިހު ލަފާ ދެއްވާފައިވާ ކަމަށެވެ.

ނަޝީދުގެ އިއްޔެ ވަނީ އިދިކޮޅު ޕީޕީއެމް ޕީއެންސީ ލީޑަޝިޕްގެ ބޭފުޅުންނާއި، ޖޭޕީގެ ލީޑަރު ގާސިމް އިބްރާހީމާ ވެސް ބައްދަލުކުރައްވައިފަ އެވެ. އެކަމަކު ކުރީގެ ރައީސް އަބްދުﷲ ޔާމީން މިނިވަން ނުކުރަނީސް ނަޝީދާ އެކު ސިޔާސީ މަޝްވަރާ ކުރަން އިދިކޮޅުން ވަނީ ދެކޮޅު ހަދައިފަ އެވެ.