އަންހެނުންގެ ކޮމިޓީން ހޯދައިދިނީ މި ރަށުގެ ހުރިހާ އަންހެނުންނަށް ވަޒީފާ

މި ރަށުގެ ނިސްބަތުން އާމްދަނީ ހޯދަން މަސައްކަތެއް ނުކުރާ އަންހެނަކު ނޫޅެ އެވެ. އަންހެނުންގެ ކޮމިޓީން ވަނީ އާމްދަނީ ލިބޭނެ ކޮންމެ ވެސް ގޮތެއް އެންމެންނަށް ޔަގީންކޮށްދީފަ އެވެ. އެންމެ ގިނަ މީހުންނަށް ހޯދައިދިން ވަޒީފާއަކީ ރަށާ ކައިރި ރިސޯޓްތަކަށް ރޮށި ފިހުމެވެ. އަނެއް ބަޔަކު ރިސޯޓްތަކަށް ކުނި ކަހަން ދެ އެވެ. ނޫން ނަމަ އަމިއްލަ ކޮންމެވެސް މަސައްކަތެއް ކޮށްގެން އާމްދަނީ ހޯދަ އެވެ.

މިއީ، ނ. ކުޑަފަރީ އަންހެނުން ކޮމެޓީން އެ ރަށުގައި އާމްދަނީ ހޯދޭނެ ގޮތެއް ނެތި ތިބި އަންހެނުންގެ ދިރިއުޅުން ބަދަލުކޮށްދިން ގޮތުގެ ވާހަކަ އެވެ.

ރަށުގައި ތިބެގެން ހުރިހާ އަންހެނުންނަށް ވަޒީފާ

ރާއްޖެއަށް އާމްދަނީ ލިބޭ އެންމެ ފުޅާ ދާއިރާކަމުގައިވާ ޓޫރިޒަމް ދާއިރާ ދުވަހެއް ދުވަހަކަށް ކުރިއަރަމުން އަންނައިރު އެ ދާއިރާގައި އެންމެ ގިނައީ ވެސް ރާއްޖޭގެ ޒުވާނުންނެވެ. ހާއްސަކޮށް ފިރިހެނުންނެވެ.

"އަޅުގަނޑުމެން އެންމެ ފުރަތަމަ ކުރިކަމަކީ ވަޒީފާ ނެތި ތިބި އަންހެނުން ކައިރިއަށް ގޮސް ބޭނުންވަނީ ކޮން ކަމެއްތޯ ބެލުން. މައުލޫމާތު ހޯދީ އެންމެ ފުރަތަމަ. ރަށުގެ ގާތްގަނޑަކަށް 90 ޕަސެންޓު މީހުން ބުނީ ބޭނުންވަނީ އާމްދަނީއެއް ލިބޭނެ ގޮތެކޭ. ބޭނުންވަނީ މޮޅެތި މުބާރާތްތަކާއި އެކަހަލަ ކަންކަމެއް ނޫނޭ،" އެ ރަށު އަންހެނުން ކޮމެޓީގެ ރައީސާ މިލްހާނާ އިބްރާހިމް ވިދާޅުވި އެވެ.

ރަށް ކައިރީ ކިތަންމެ ގިނަ ރިސޯޓެއް އޮތަސް ގޮންޖެހުމަކަށްވީ ވަޒީފާއެއް ހޯދަން އަހަން އެ ތަންތަނުގެ ބޮޑެތި މީހުންނާ ގުޅުން ނެތުމެވެ. އެހެންވެ އެންމެ ފަސޭހަ ގޮތެއް ކަމަށް ގަބޫލުކޮށް އަންހެނުން ކޮމެޓީގެ މެމްބަރުން ރަށު ކައުންސިލާ ވާހަކަ ދެއްކީ އެ މީހުންގެ ގުޅުން ރިސޯޓުތަކާ ރަނގަޅުވުމުންނެވެ.

ރައްޔިތުންގެ ފައިދާއަށް ކުރާ ކޮންމެ ކަމަކީ ރަށަށް ލިބޭ ކުރިއެރުމެއް ކަމަށް ގަބޫލުކުރާ ކުޑަފަރީ ކައުންސިލް މެމްބަރުން، އަންހެނުން ކޮމެޓީއާ ގުޅިގެން އެކަން ކޮށްދިނެވެ.

ކުޑަފަރީގެ 68 އަންހެނުންނަށް، ކޮމިޓީން ވަޒީފާ ހަމަޖައްސައިދީފައި ވާއިރު އޭގެ ތެރެއިން 60 މީހުން ރޮށި ފިހަނީ އެވެ. އަނެއް ބަޔަކު ސިޔާމް ވޯލްޑު ރިސޯޓަށް، ކުނި ކެހުމަށެވެ. އެ ދުވަހު ގޮސް އެ ދުވަހު އަންނަ ގޮތަށެވެ.

"އަޅުގަނޑުމެން އޭރު ބެލިއިރު މަސައްކަތް ކުރެވޭ ހާލަތުގައި ތިބި އެންމެން ވަޒީފާގެ ފުރުސަތު ހަމަޖައްސައިދިނިން. ބަލިވެ، ކަންކަން ރިކަވާ ވެގެން އަނެއްކާ މަސައްކަތް ކުރެވޭ ހާލަތަށް އައިސްފައި މިހާރު އެބަ ތިބި މީހުން ކޮޅެއް، އެ މީހުންނަށް ވަޒީފާ ހޯދައިދޭން މަސައްކަތް ކުރަމުން މި އަންނަނީ،" އޭނާ ވިދާޅުވި އެވެ.

ރައްޔިތުންނަށް ކޮށައިދިނީ އެ މީހުންނާއި ރަށަށް އާމްދަނީ ލިބޭނެ މަގެއް!

އެންމެންނަށް ބަހާލައިގެން ކޮންމެ ދުވަހަކު 2،000 އަށް ވުރެ ގިނަ ރޮށި ފިހާއިރު ރަނގަޅު މަހެއްގައި އުޖޫރައެއްގެ ގޮތުގައި 3000 ލިބެ އެވެ. އަނެއްބައި މަސް މަހު ރޮށި ފިހަން ޖެހޭ ވަރު މަދުވެ، މީހަކަށް 60 ރޮށި ފިހަން ވެސް ލިބެ އެވެ.

ރޮށި ފިހަން ލިބެނީ ރިސޯޓަށް ގެސްޓުން އަންނަ އަދަަށް ބަލައިގެން އެވެ. ކުނިކަހަން ދާ ކޮންމެ އަންހެނަކަށް މަހެއްގެ މައްޗަށް 8000ރ. ލިބޭއިރު އެ މީހުން ކުނި ކަހާ ނިންމުމަށް ފަހު ރަށަށް ގެނެސް ވެސް ދެ އެވެ.

އާމްދަނީއެއް ލިބޭނޭ ގޮތެއް ނެތް އެތައް ބަޔަކަށް އެ ފުރުސަތު ލިބުމަކީ އެ މީހުން ދެކޭ ގޮތުގައި، ކުޑަކަމެއް ނޫނެވެ. އެ މީހުންގެ ދިރިއުޅުމުގެ ހާލަތު ކުރިއަށް ވުރެ މިހާރު ރަނގަޅުވެއްޖެ އެވެ.

"މި ރަށު ފިހާރަތަކުގެ ވެރިން ވެސް އެބަ ބުނޭ މިހާރު، ކުރިއަށް ވުރެ ވިޔަފާރި ރަނގަޅު ވެއްޖެއޭ. އެއްޗެހި ގަންނަން އަންނަ މީހުން އިތުރުވެ، ފިހާރަތަކަށް ލިބޭ އާމްދަނީ އިތުރު ކަމަށް،" އެ ރަށުން ވާހަކަ ދެއްކި މީހަކު ބުންޏެވެ.

ފެށުނީއްސުރެ ރޮށި ފިހުމުގައި ހަރަކާތްތެރިވާ ޔުމްނާ މުހައްމަދު ފަހީމް ބުނީ އެ މަސައްކަތާ އެކު ފިރިމީހާއަށް ލިބޭ އާމްދަނީއަށް ދިރިއުޅުން ބަރޯސާވުން ނިމުނު ކަމަށެވެ.

"މީގެ ކުރިން ފިރިމީހާއަށް ލިބޭ އެއްޗަކުން އެކަނި އަޅުގަނޑުމެން ދިރިއުޅެމުން އައީ. މިހާރު މީގެން [ރޮށި ފިހެގެން] ލިބޭ އެއްޗަކުން ގޭގެ ކަރަންޓު ބިލު، ދަރިންގެ ޓިއުޝަން ފީ، ކަހަލަ ކަންކަން ނޫނީ ގެެއަށް ބޭނުންވާ އެއް ސާމާނު ވެސް ގަނެވޭ،" އޭނާ ބުންޏެވެ.

ވަރަށް ހިތްހަމަ ޖެހޭ މަސައްކަތެއް މިއީ. 100 ރޮށި ފިހަން ގަޑިއެއްހާ އިރު ވެސް ހޭދަ ނުވޭ، ކުޑަ ވަގުތުކޮޅަކުން ފަސޭހައިން އާމްދަނީ ހޯދޭނެ މަގެއް މި ކޮށައިދިނީ."

ރޮށި ފިހަން ހަވާލު ކުރުމުން އަންހެނުން ކޮމެޓީގެ ދައުރު ނިމުނީކީ ނޫނެވެ. ރޮށި ފިހެގެން ގެންގޮސް ރިސޯޓަށް ފޯރަންދެން އެ މީހުން ދެކެނީ އެއީ ހަވާލު ވެފައިވާ ބޮޑު ޒިންމާއެއްގެ ގޮތުގަ އެވެ.

ކޮންމެ މީހަކު ވެސް އެ ދުވަހަކަށްވާ ރޮށި ފިހެ، ފޮއިލްގައި ރަނގަޅަށް ބަންދުކުރަން ޖެހެ އެވެ. އެއަށް ފަހު ކަނޑައަޅާފައި އޮންނަ ގަޑިއަށް ގެންދަނީ ކައުންސިލް އިދާރާއަށެވެ. ވައިބާ ގްރޫޕްގައި ކޮންމެ ދުވަހަކު ވެސް ތަފްސީލްތައް އަޕްޑޭޓް ކުރަމުންދެ އެވެ. އެތަނުން އެއާ ހަވާލުވާން ތިބެނީ އަންހެނުން ކޮމެޓީގެ މެމްބަރުންނެވެ. އެއި ރޮށިތައް ޗެކޮށް، ހުންނަން ޖެހޭ ކޮލިޓީގައި ރިސޯޓަށް ފޮނުވައިދެނީ އެ މީހުންނެވެ.

ރިސޯޓަށް ރޮށި ފޮނުވަން، ކޮމިޓީން މުސާރަ ދީފައި މީހަކު ހަމަޖައްސާފައި ހުރެ އެވެ.

ކޮމެޓީން މިހާރު ކުރަމުން އަންނަ މަސައްކަތަކީ ރަށުގައި އެ މަސައްކަތް ކުރާ ހުރިހާ އެންމެން އެއް ތަނެއްގައި ތިބެ މަސައްކަތް ކުރެވޭނެ މާހައުލެއް ހޯދައިދިނުމެވެ. "މަސް ބަދިގެ" އެއް ތައްޔާރު ކުރުމެވެ.

އަމިއްލަ ރަށަށް އޮންނަ ލޯތްބަކީ ވަރުގަދަ ލޯތްބެކެވެ. ތަފާތު އިހުސާސެކެވެ. ރަށުގެ ރައްޔިތުންނަށް އެހީތެރިވުމަކީ ގުޅުންތައް ބަދަހިވެ، ރަށް ކުރިއަރާނެ ކަމެއް ކަމަށް އެ ރަށު ކައުންސިލާއި އަންހެނުން ކޮމެޓީން ގަބޫލު ކުރެ އެވެ.

އުފަން ފަސްގަނޑުގައި ތިބެ، ރަނގަޅު އާމްދަނީއެއް ހޯދޭނެ މަގެއް ކޮންމެ މީހަކަށް ހޯދައި ދިނުމަކީ އެ ރަށު އަންހެނުން ކޮމެޓީއަށް ލިބުނު އެންމެ ބޮޑު ހިތްހަމަޖެހުމެވެ.