ފަނޑިޔާރު ސުއޫދުގެ އާ ފޮތެއް ޝާއިއުކޮށްފި

"އިސްލާމީ ޝަރީއާގެ ހެއްކާ ބެހޭ އުސޫލުތައް ދިވެހިރާއްޖޭގައި ތަތުބީގުކުރަމުންދާ ގޮތް"ގެ ނަމުގައި ސުޕްރީމް ކޯޓުގެ ފަނޑިޔާރު ހުސްނުއްސުއޫދު ލިޔުއްވާފައިވާ ފޮތެއް ޝާއިއުކޮށްފި އެވެ.

މި ފޮތަކީ އިސްލާމީ ޝަރީއަތުގެ އެންމެ މުހިންމު އެއްބައި ކަމަށްވާ ހެކިބަހާ ބެހޭ އުސޫލުތައް ބަޔާންކޮށް، އިސްލާމީ ޝަރީއަތުގައި ބަޔާންކޮށްފައިވާ ހެކިބަހާ ބެހޭ އުސޫލުތައް ދިވެހިރާއްޖޭގެ ކޯޓުތަކުން ތަންފީޒުކުރަމުންގެންދާ ގޮތް ބަޔާންކުރުމަށް އޭނާ ލިޔުއްވާފައިވާ ފޮތެކެވެ.

މޯލްޑިވްސް ލޯ އިންސްޓިޓިއުޓުން ޝާއިއު ކުރި މި ފޮތަކީ 15 ޗެޕްޓަރުގެ މައްޗަށް އެކުލެވިގެންވާ 406 ސަފުހާގެ ފޮތެކެވެ.

މި ފޮތުގެ އިތުރުން ދިވެހިރާއްޖޭގެ ގާނޫނާ ބެހޭ ގޮތުން ސުއޫދު ލިޔުއްވާފައިވާ 15 ފޮތެއް މޯލްޑިވްސް ލޯ އިންސްޓިޓިއުޓުން ޝާއިއުކޮށްފައިވެ އެވެ.

އޭނާ ކުރިން ޝާއިއު ކުރެއްވި ފޮތްތަކުގެ ތެރޭގައި ދިވެހިރާއްޖޭގެ ބިމާބެހޭ ތަރުތީބު، ދިވެހިރާއްޖޭގެ ގާނޫނީ ނިޒާމު، ކޮންޓްރެކްޓާ ބެހޭ ގާނޫނު، ކުންފުންޏާ ބެހޭ ގާނޫނު، އިސްލާމީ ޝަރީއަތުގައި ތަރިކަ މުދާ ބެހުން ފަދަ ފޮތްތައް ހިމެނެ އެވެ.

މި ނޫނަސް ގާނޫނީ ފަންނުގެ މީހުން އެ ދާއިރާގެ އެކި ކަންކަމާ ގުޅޭ ފޮތްތައް މޯލްޑިވްސް ލޯ އިންސްޓިއުޓް މެދުވެރިކޮށް ޝާއިއު ކުރެ އެވެ. އެ އިންސްޓިއުޓުން މީގެ ކުރިން ވަނީ ގާނޫނީ ބަސްތައް ހިމެނޭ ރަދީފް އެޕްލިކޭޝަނެއް ވެސް ހަދައިފަ އެވެ.