ގޫގުލް އިން 470 މިލިއަން ޑޮލަރުގެ އިންވެސްޓްމަންޓެއް އޮސްޓްރޭލިއާ އަށް

ގޫގުލްގެ ހިދުމަތްތަކާއި މަސައްކަތްތައް އޮސްޓްރޭލިއާގައި ފުޅާކުރުމުގެ ގޮތުން ކުރިއަށް އޮތް ފަސް އަހަރުގެ ތެރޭގައި އެ ގައުމުގައި 470 މިލިއަން ޑޮލަރު (އެއް ބިލިއަން އޮސްޓްރޭލިއާ ޑޮލަރު) އިންވެސްޓް ކުރަން ނިންމައިފި އެވެ.

މިއާއާ އެކު އެކަން ވެފައި ވަނީ އޮސްޓްރޭލިއާގައި ގޫގުލް ހިންގާ އެންމެ ބޮޑު އިންވެސްޓްމަންޓަށެވެ.

"ޑިޖިޓަލް ފިއުޗާ އިނިޝިއޭޓިވް" ގެ ނަމުގައި ކުރިއަށް ގެންދަން ނިންމާފައިވާ އިންވެސްޓްމަންޓްގެ ދަށުން ރިސާޗް ހަބަކާއި ކްލައުޑް ކޮމްޕިއުޓިން ކެޕޭސިޓީ އިތުރު ކުރުމާއި އޮސްޓްރޭލިއާގެ އެކި ޖަމިއްޔާ ޖަމާއަތްތަކާ ގުޅިގެން ޕާޓްނަޝިޕް ޕްރޮޖެކްޓްތައް ހިންގުން ވެސް ހިމެނެ އެވެ. އޭގެ ތެރޭގައި އޮސްޓްރޭލިއާގެ ކޮމަންވެލްތު ސައިންޓިފިކް އެންޑް އިންޑަސްޓްރިއަލް ރިސާޗް އޮގަނައިޒޭޝަން (ސީއެސްއައިއާރްއޯ) ހިމެނެ އެވެ.

ގޫގުލް އިން ބުނި ގޮތުގައި އޮސްޓްރޭލިއާގައި ހިންގާ މި އިންވެސްޓްމަންޓާ އެކު އެ ގައުމުގައި ސީދާކޮށް 6،000 ވަޒީފާ އުފެދި އެއާ ގުޅުން ހުރި 28،000 އެއްހާ ފުރުސަތުތައް ހުޅުވިގެން ދާނެ އެވެ.

"ޑިޖިޓަލް ފިއުޗާ އިނިޝިއޭޓިވް" ލޯންޗް ކުރަން ސިޑްނީގައި ބޭއްވި ހަފުލާފައި ގޫގުލްގެ ސީއީއޯ ސުންދަރު ޕީޗާއީ ވިދާޅުވީ އޮސްޓްރޭލިއާ އަކީ ކުރިއަށް އޮތް ތަނުގައި ޓެކްނޮލޮޖީގެ ދާއިރާ އިން ވަރަށް ބޮޑު ކުރިއެރުމެއް ހޯދާނެ އަދި އެކަމުގެ މުސްތަގުބަލު ވަރަށް ބޮޑަށް އޮތް ގައުމެއް ކަމަށެވެ.

"މީގެ ޒަރީއާއިން އެތައް ބައެއްގެ ދިރިއުޅުމުގެ ހާލަތު ވެސް ވަރަށް ބޮޑުތަނުން ރަނގަޅުވެގެން ދާނެ." އޭނާ ވިދާޅުވި އެވެ.

އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވިދާޅުވީ ދުނިޔޭގެ އެންމެ ބޮޑު އެއް ޓެކް ކުންފުނި އޮސްޓްރޭލިއާގައި ބޮޑު އިންވެސްޓްމަންޓެއް ހިންގުމަކީ ގައުމަށް ތަރައްގީގެ ދުވެއްޔަށް ލިބޭ އިތުރު ބާރެއް ކަމަށާއި މީގެ ސަބަބުން އިގުތިސާދަށް ބޮޑު ކުރިއެރުމެއް އަންނާނެ ކަމަށެވެ. އެހެންވެ އެ ކުންފުންޏަން އެ ގައުމުން ދެވެން އޮތް ހުރިހާ އެއްބާރުލުމަކާއި އެހީތެރިކަމެއް ސަރުކާރުން ދެއްވާނެ ކަމަށް ވިދާޅުވި އެވެ.

"މިހާރު ވެސް ގޫގުލް އަކީ އޮސްޓްރޭލިއާ އިން އެންމެ ބޮޑު ފައިދާއެއް ލިބޭ ޓެކް ކުންފުންޏަށް ވާނެ." ބޮޑުވަޒީރު ވިދާޅުވި އެވެ. "އެ ކުންފުނިން ބޮޑު އިންވެސްޓްމަންޓެއް ކުރިއަށް ގެންދަން ނިންމުމަކީ އަހަަރެމެން ވަރަށް ބޮޑަށް މަރުހަބާ ކިޔާ ކަމެއް."