ގޫގުލް އިން އަންނަ އަހަރު ސްމާޓް ގަޑި ނެރެނީ

އެޕަލްގެ ސްމާޓް ގަޑިތަކާ ވާދަކުރަން ގޫގުލް އިން އަންނަ އަހަރު ސްމާޓް ގަޑި ނެރެން ނިންމާފައިވާ ކަމަށް ރިޕޯޓްތައް ބުނެފި އެވެ.

ޓެކް ޚަބަރުތައް ގެނެސްދޭ ނޫސްތަކުން ބުނި ގޮތުގައި ގޫގުލް އިން ސްމާޓް ގަޑި އުފެއްދުމުގެ މަސައްކަތް ވަރުގަދަކުރީ މި އަހަރު އެވެ. ކޯޑް ނަމަކަށް "ރޯހަން" ގެ ނަން ދީފައިވާ ގޫގުލްގެ ގަޑި އަކީ އެޕަލްގެ ގަޑިއާ ހުރިހާ ގޮތަކުން ވެސް ވާދަކުރެވޭ ނުވަތަ އެއަށް ވުރެ ހުރިހާ ގޮތަކުން ފެންވަރު ރަނގަޅު އަދި ފީޗާތައް ގިނަ އެއްޗަކަށް ވާނެ އެވެ.

ބައެއް މީޑިއާތަކުން ބުނެފައިވާ ގޮތުގައި ކުންފުނީގެ ތެރޭގައި "ޕިކްސެލް ވޮޗް" އަދި "އެންޑްރޮއިޑް ވޮޗް" ގެ ނަން ވެސް އެއަށް ކިޔަމުން އަންނަ އިރު، ރަސްމީކޮށް އަދި ގޫގުލްގެ ސްމާޓް ގަޑިއަށް ކިޔާނެ ނަމެއް ކަށަވަރެއް ނުވެ އެވެ. އެކަމަކު މި ގަޑި މިހާރު ޓެސްޓްކުރަމުން އަންނަ ކަމަށް މީޑިއާތަކުން ބުނެ އެވެ.

ސްމާޓް ގަޑި ނެރެން ގޫގުލް އިން މަސައްކަތް ފަށާފައި މި ވަނީ އެފަދަ ޑިވައިސްތައް ނެރޭ ކުންފުނި ފިޓްބިޓް ވެސް ގަނެފައި ވަނިކޮށެވެ. އެހެންވެ ގޫގުލްގެ ގަޑީގައި ފިޓްބިޓްގެ ރަހަގަނޑު ވަރަށް ބޮޑުވާނެ ކަމަށް ބެލެވެ އެވެ. އެކަން ކަށަވަރުވާ ކަމަކީ ފިޓްބިޓާއި ގޫގުލްގެ ވެއާ އޯއެސް ސޮފްޓްވެއާ ވެސް މަސްހުނިކޮށްގެން ދެން މަސައްކަތްތައް ކުރިއަށް ގެންދަން ރާވާފައިވާތީ އެވެ.

ގޫގުލްގެ ސްމާޓް ގަޑިއާ ބެހޭ ގޮތުން މިހާތަނަށް ރަސްމީކޮށް އެއްވެސް އެއްޗެއް ނުބުނެ އެވެ. އެކަމަކު މީޑިއާތަކުން ބުނީ ގަޑި ނެރޭނެ ކަމަށް ބެލެވެނީ އަންނަ އަހަރުގެ ބަހާރު މޫސުމުގައި ކަމަށެވެ.