ކެންސަރު ހޮސްޕިޓަލާއި ޓާޝަރީ ހޮސްޕިޓަލުގެ އަމަލީ މަސައްކަތް އަންނަ އަހަރު ފަށަނީ

ލ. ގަމުގައި އިމާރާތްކުރަން ނިންމާފައިވާ ކެންސަރު ހޮސްޕިޓަލާއި ޓާޝަރީ ހޮސްޕިޓަލުގެ އަމަލީ މަސައްކަތް އަންނަ އަހަރު ފެށޭނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރައީސް އޮފީހުން ބުނީ، މިއަދު މުލިއާގޭގައި ލ. ގަމު ކައުންސިލްގެ މެމްބަރުންނާ ރައީސް ބައްދަލުކުރައްވައި، އެ ދެ ހޮސްޕިޓަލުގެ އަމަލީ މަސައްކަތް އަންނަ ފެށޭނެ ކަމަށް ވިދާޅުވި ކަމަށެވެ. ނަމަވެސް އެ މަސައްކަތް ފަށާނެ ސީދާ ތާރީހެއް ވިދާޅެއްނުވެ އެވެ.

މި ބައްދަލުކުރެއްވުމުގައި ގަމު ކައުންސިލްގެ މެމްބަރުން ވަނީ އެ އެބޭފުޅުންގެ ހުރި ބައެއް ކަންބޮޑުވުންތައް ވެސް ރައީސްއާ ހިއްސާކުރައްވައިފަ އެވެ.

ގަމުގައި ކެންސަރު ހޮސްޕިޓަލެއް އިމާރާތް ކުރަނީ އިންޑިއާގެ ލޯނު އެހީގެ ދަށުންނެވެ. މި ހޮސްޕިޓަލުގެ މަސައްކަތް ފެށުމަށްޓަކައި ކުރަން ޖެހޭ ދިރާސާގެ މަސައްކަތަށް އިންޑިއާގެ ޓީމެއް މިދިޔަ ސެޕްޓެމްބަރު މަހު ވަނީ ރާއްޖެ އައިސްފަ އެވެ.

ދައުލަތުން އަންނަ އަހަރަށް ލަފާކުރާ ބަޖެޓުގައިވާ ގޮތުން މި ކެންސަރު ހޮސްޕިޓަލު އެޅުމަށް ލޯނުގެ ގޮތުގައި 45 މިލިއަން ރުފިޔާ ހަރަދު ވާނެ އެވެ. އަދި މި މަޝްރޫއު އަށް ދައުލަތުގެ ބަޖެޓުން ހަތް މިލިއަން ރުފިޔާ ހަރަދު ކުރާނެ ކަމަށް ވެސް ބުނެފައިވެ އެވެ.

ލޯނު އެހީގައި ގަމުގައި އިމާރާތްކުރަން ނިންމާފައިވާ ޓާޝިއަރީ ހޮސްޕިޓަލު އެޅުމަށް 18 މިލިއަން ރުފިޔާ ހަރަދުވާނެ ކަމަށް ވެސް ބަޖެޓުގައިވެ އެވެ. އަދި ގަމު ރީޖަނަލް ހޮސްޕިޓަލް ތަރައްގީ ކުރުމަށް ވެސް ގިނަ މަޝްރޫއުތަކެއް ބަޖެޓުކޮށްފައިވެ އެވެ.

ސަރުކާރުގެ ވިސްނުމުގެ ދަށުން ގަމުގައި ތަރައްގީގެ ގިނަ މަޝްރޫއުތައް ހިންގޭނެ ކަމަށް ރައީސް ވިދާޅުވީ ކަމަށާއި ކައުންސިލަރުން ހުށަހެޅުއްވި ކަންކަމުގައި ކަމާ ބެހޭ ފަރާތްތަކާ މަޝްވަރާކުރެއްވުމަށް ފަހު އެދެވޭ ހައްލެއް ހޯއްދަވައިދެއްވާނެ ކަމަށް ރައީސް އޮފީހުން ބުންޏެވެ.

ގަމު ދާއިރާގެ މެމްބަރު މުހައްމަދު ވިސާމު ވެސް ބައިވެރިވެވަޑައިގެންނެވި މި ބައްދަލުވުމުގައި އެ ރަށު ކައުންސިލުގެ މެމްބަރުން ވަނީ އަންނަ އަހަރުގެ ބަޖެޓުގައި އެ ރަށުގައި ހިންގަން ހިމަނާފައިވާ މަޝްރޫއުތަކާ ގުޅޭ ގޮތުން މަޝްވަރާކުރައްވައިފަ އެވެ. އަންނަ އަހަރު ގަމުގައި ތަރައްގީގެ އެކި މަޝްރޫއުތަކަށް ހިންގުމަށް 91 މިލިއަން ރުފިޔާ ވަނީ ބަޖެޓުކޮށްފަ އެވެ.

ކުރިން ކެންސަރު ހޮސްޕިޓަލު އަޅަން ނިންމީ ހުޅުމާލޭގަ އެވެ. ނަމަވެސް، ރާއްޖޭގެ ސިއްހީ ހިދުމަތްތައް ލާމަރުކަޒީ ކުރުމަށް ސަރުކާރުން ވިސްނާފައި ވާތީ މި ހޮސްޕިޓަލު ގަމަށް ބަދަލުކުރަން އިންޑީއާ ސަރުކާރާ އެކު މަޝްވަރާކޮށް އެ ގޮތަށް ވަނީ ނިންމައިފަ އެވެ.